ភ្នំពេញ៖ព្រាប សុវត្ថិ ត្រូវបានភរិយាអ្នកស្រីឡុង ស្រីមុំ និងកូនៗលោកលើកនំខេកធ្វើខួបកំណើតឲ្យលោកគម្រប់អាយុ៤៨ឆ្នាំកាលពីថ្ងៃទី២២ ឧសភា បើទោះជាថ្ងៃខួបលោកពិតនៅថ្ងៃទី២៥ ឧសភា ក៍ដោយ។តារាGalaxy រូបនេះទទួលបានសារជូនពរជាច្រើនពីមិត្តរួមអាជីព និងបុគ្គលិកក្រុមហ៊ុនរបស់លោកឈ្មោះព្រាប សុវត្ថិ អ៊ីនវេសមិន ដោយគ្រប់គ្នាបានហៅលោកថាជាឧកញ៉ាៗ និងភរិយាលោកអ្នកស្រីឡុង ស្រីមុំ ជាជំទាវ។នៅថ្ងៃពិសេសរបស់លោកសុវត្ថិ ឬហៅថាឧកញ៉ាស្នាយ រូបនេះ អ្នកស្រីឡុង ស្រីមុំ បានបង្ហាញកាយវិការកាន់តែស្រលាញ់ស្វាមីអ្នកនាងពោលគឺស្វីតមិនចាញ់គូស្នេហ៍យុវវ័យឡើយបើទោះជាពេលនេះអ្នកទាំងពីរមានវ័យរាងជ្រេបន្ដិចទៅហើយក្ដី។ដោយឡែកសម្រាប់Fan របស់លោកសុវត្ថិ វិញពួកគេបានជូនពរលោកសូមឲ្យល្បីល្បាញថែមទៀត ពិសេសគឺក្មេងជាងវ័យ។
សូមបញ្ជាក់ថាព្រាប សុវត្ថិ មិនដែលធ្វើខួបកំណើតដោយជប់លៀងធំនិងហៅតារាសិល្បកររួមអាជីពរាប់រយនាក់ឲ្យចូលរួមឡើយ តែជារៀងរាល់ឆ្នាំភរិយានិងកូនៗរបស់លោកបានSurprise លោកដោយលើកនំខេកទៅជូនលោកនៅក្រោមដើមត្នោតតាមវាលស្រែ ឬនៅហាងរបស់លោកផ្ទាល់តែម្ដង។សម្រាប់ឆ្នាំនេះក៍ដូចគ្នាព្រោះលោកសុវត្ថិ ច្រើនតែប្រើជីវិតយ៉ាងសាមញ្ញ តែគេកត់សម្គាល់ថាមុនគម្រប់ខួប៤៨ឆ្នាំនេះលោកឧកញ៉ាស្នាយ មានការប្រែប្រួលច្រើនក្នុងឋានៈជាឧកញ៉ានេះ ព្រោះបច្ចុប្បន្នលោកមានរថយន្ដទំនើបៗជិះមិនចាញ់ឧកញ៉ាល្បីៗពីមុននោះទេក្នុងនោះមានដូចជាRolls Royce ,Escalade ,Bmw ,Ford និងIsuzu ជាដើមជាមួយក្បួនរថយន្ដរបស់លោកពេលចេញទៅណាមានកងអង្គរក្សបើកម៉ូតូធំ២គ្រឿងអមជានិច្ចដែលនេះបញ្ជាក់ថាឥទ្ធិពលរបស់លោកកាន់តែធ្វើឲ្យគេស្ញប់ស្ញែង។ក្រោយឡើងជាឧកញ៉ាជាង១ឆ្នាំមកនេះលោកក៍ធ្លាប់ធ្វើសប្បុរសធ័មជាបន្ដបន្ទាប់ផងដែរ ក្នុងនោះមានដូចជាផ្ដល់ថវិការដល់កីឡាប្រដាល់ ជួយតារាទីទ័លក្រ និងថ្មីៗនេះតាមព័តមានថាលោកនឹងចំណាយថវិការចេញថ្លៃព្យាបាលតារាចម្រៀងរួមទ្រនុំលោកវង្ស ថាណាន់ ដែលរងគ្រោះថ្នាក់ចរាចរណ៍បាក់ភ្លៅកាលពីពេលថ្មីៗនេះទៀតផង។ចំណែកអ្នកដែលរិះគន់ព្រាប សុវត្ថិ ច្រៀងបទ”មីឆុង មីកំប៉ុង មីឆា”ថ្ងៃបើកឆាកស៊ីហ្គេមនោះក៍ចាប់ផ្ដើមស្ងប់ស្ងាត់ទៅវិញ ក្រោយលោកនាយករដ្ឋមន្រ្ដីបានប្រកាសមុននេះថានាងលោកនឹងឡង់សេបទមួយនេះឲ្យកាន់តែល្បីថែមទៀត។
សូមបញ្ជាក់ថាព្រាប សុវត្ថិ ក្នុងវ័យ៤៨ឆ្នាំនេះលោកបានជោគជ័យក្នុងអាជីពចម្រៀងរយៈពេលជាង២០ឆ្នាំមកហើយ ខណៈដែលកាលពីខែកញ្ញា ឆ្នាំ២០២០ លោកត្រូវបានមនុស្សជំនិតទម្លាយប្រាប់អ្នកកាសែតថាលោកសុវត្ថិ សល់ទ្រព្យប្រម៉ាណខ្ទង់៣០លានដុល្លារពីការប្រឡូកសិល្បៈជាង២ទសវត្សន៍។ចំណងស្នេហាលោកសុវត្ថិ និងអ្នកស្រីមុំ បានរក្សាររយៈពេល២៦ឆ្នាំ(១៩៩៧-២០២៣)មកហើយនិងមានកូនប្រុស៣នាក់ក្នុងនោះកូនទី១ឈ្មោះ សុវត្ថិ មុនីវណ្ណ កំពុងប្រកបអាជីពចម្រៀងជាមួយលោកនៅGalaxy និងកូនទី២សុវត្ថិ មុនីនាគ និងកូនទី៣សុវត្ថិ សិរីវុឌ្ឍ ក្រោយចាកចេញពីហង្សមាសអត់ទាន់ចូលផលិតកម្មថ្មី បើទោះជាមានការព្យាករណ៍ថា ពួកគេនឹងចូលរូមជាមួយឪពុកគេនាពេលខាងមុខនេះក្ដី។អ្វីដែលគូរឲ្យកត់សម្គាល់ព្រាប សុវត្ថិ ក្នុងវ័យ៤៨ឆ្នាំនេះលោកគ្មានបំណងយកកូនថែមទៀតទេ បើទោះជាមានការជម្រុញពីអ្នកស្និតលោកថាគូតែតាមយកកូនស្រីក្ដី តែលោកបានហៅសិរីវុឌ្ឍ ថាជាកូនពៅទៅហើយគឺមានន័យថាអត់មានរៀបគម្រោងយកកូនថែម។
មជ្ឈដ្ឋានមហាជនមើលឃើញថាលោកព្រាប សុវត្ថិ ហាក់មានទីផ្សារចម្រៀងគ្រាន់បើឡើងវិញនៅឆ្នាំទី៣ដែលលោកជ្រកនៅGalaxy នេះ បើទោះជា២ឆ្នាំដំបូងលោកធ្វើឲ្យFan ខ្លះខកចិត្តក្ដី។ប៉ុន្ដែអ្នកគាំទ្រតារាចម្រៀងរូបនេះហាក់មិនអស់ចិត្តនូវលោកសុវត្ថិ ដែលបន្ដច្រៀងតែជាមួយដៃគូម្នាក់គត់ជាមួយនាងតន់ ច័ន្ទសីម៉ា គ្មានដៃគូតារាស្រីផ្សេងដែលមានវ័យនិងសម្ថភាពត្រូវគ្នាជាមួយលោក។តែអ្នកជំនាញសិល្បៈបានលើកឡើងថាលោកព្រាប សុវត្ថិ មិនត្រូវបានថៅកែផលិតកម្មឬអ្នកដឹកនាំបង្ខំឲ្យលោកច្រៀងសម្ដែងនូវបទចម្រៀងណាដែលលោកមិនពេញចិត្តឡើយ ដែលចំណុចនេះមានន័យថាបើនាងសីម៉ា គ្មានសម្ថភាពកុំថាឡើយលោកសុវត្ថិ ច្រៀងជាដៃគូជាបន្ដបន្ទាប់នោះ ប៉ុន្ដែសូម្បីតែសាកល្បង១បទដំបូងក៍មិនអាចដែរ។ទស្សនិកជនរងចចាំមើលថានៅឆ្នាំ២០២៣ លោកព្រាប សុវត្ថិ នៅតែជាតួឯក គ្មានតារាណាអាចផ្ដួលលោកបានទៀត ឬមួយក៍រលកក្រោយច្រានរលកមុន ធ្វើឲ្យលោកឧកញ៉ាស្នាយ ប្រឈមពិបាកទប់លំនឹងក្នុងវ័យលោកកាន់តែជ្រេបែបនេះ?
