ភ្នំពេញ៖តាមទិន្នន័យមួយចំនួនបង្ហាញថាបទចម្រៀងរបស់ស្រីស្រស់តន់ ច័ន្ទសីម៉ា បានធ្លាក់ចុះViews នារយៈពេលចុងក្រោយនេះបើប្រៀបធៀបឆ្នាំមុន ដែលនេះជាសញ្ញាមួយគេអាចសន្និដ្ឋានបានថាតំណែងជាតារាចម្រៀងស្រីវ័យក្មេងកំពុងតែឈានមុខគេរបស់នាងនៅGalaxy នោះហាក់គ្មានសុវត្ថិភាពខ្ពស់ឡើយបើទោះជានាងមានដៃគូដល់ទៅ៣នាក់សុទ្ធតែជាតារាចម្រៀងប្រុសលំដាប់ជូរមុខគេនាពេលបច្ចុប្បន្នគឺព្រាប សុវត្ថិ ,ខេម និងលោកខែម ប៊ុនថៃ ក៍ដោយ។ចំពោះការចាប់ផ្ដើមប្រែប្រួលសន្ទុះគាំទ្ររបស់នាងច័ន្ទសីម៉ា នាពេលនេះគឺគេកត់សម្គាល់ថាក្រោយនាងមានភាពចម្រូងចម្រាសជាមួយFan និងបានបង្ហាញសកម្មភាពតាមការពារថៅកែនៅលើបណ្ដាញសង្គមជាបន្ដបន្ទាប់ ទើបធ្វើឲ្យនាងសីម៉ា និងFan ហាក់ដូចជាមានគំនិតខ្វែងគ្នាច្រើន។ប៉ុន្ដែយ៉ាងណាមិនមែនតែរូបនាងម្នាក់ទេពោលគឺតារាល្បីៗសឹងតែគ្រប់គ្នារបស់Galaxy ដែលចេញការពារថៅកែដូចនាងដែរក្នុងនោះលោកព្រាប សុវត្ថិ និងខេមរៈ សិរីមន្ដ ក៍រងការរិគន់ខ្លាំងនិងគេវាយប្រហារមកលើនាងធ្ងន់ជាងនាងសីម៉ា ទៅទៀត ខណៈដែលនាងក៍បានដឹងខ្លួននិងត្រៀមខ្លួនរួចជាស្រេចក្នុងការប្រឈមជាមួយអ្នកដែលមិនពេញចិត្តនាងដោយកន្លងមកនាងក៍ធ្លាប់ចេញសារថាគ្មានអ្វីទៀងទាត់ទេ ព្រោះ១០ឆ្នាំក្រោយមិនដឹងមានអ្វីកើតឡើង។តែសំណួរដែលមហាជនចង់ដឹងថាបើនាងតន់ ច័ន្ទសីម៉ា បានដឹងខ្លួនច្បាស់ទៅហើយថានឹងមានការរិះគន់មកលើរូបនាងដូចទឹកបាក់ទំនប់ក្រោយនាងយកខ្លួនទៅពាំងការពារថៅកែនោះហេតុអ្វីបានជារូបនាងនៅតែធ្វើហើយមិនស្ដាប់Fan របស់ខ្លួន?
នៅមិនទាន់មានចម្លើយរបស់នាងតន់ ច័ន្ទសីម៉ា ចំពោះរឿងរ៉ាវមួយនេះទេ ព្រោះតាំងពីឡើងកូដមកនាងមិនដែលផ្ដល់បទសម្ភាសន៍តាមទូរស័ព្ទឡើយ ហើយតេចូលមិនដែលលើក។យ៉ាងណាគេអាចម៉ៃថាសីម៉ា ធ្វើបែបនេះគ្មានអ្វីក្រៅពីនាងចង់បង្ហាញភក្ដីភាពចំពោះថៅកែនិងការដឹងគុណ ព្រោះកេរ្ដិ៍ឈ្មោះនិងទ្រព្យធនដែលនាងមាននាពេលបច្ចុប្បន្ននេះគឺកើតក្រោយពេលដែលនាងចូលGalaxy ហេតុនេះហើយមិនត្រឹមតែចេញសារការពារមេរបស់ខ្លួនខ្លួនយ៉ាងសកម្មនោះទេ តែនាងថែមទាំងច្រៀងដោយកម្សត់ដើម្បីឲ្យគ្រប់គ្នាដឹងថាថៅកែនាងជាមនុស្សល្អតាមរយៈបទ”ទឹកចិត្តមេ”។
គូរបញ្ជាក់ថាតន់ ច័ន្ទសីម៉ា ត្រូវបានគេចាត់ទុកនិងផ្ដល់រហ័ស្សនាមឲ្យនាងថាជាអ្នកចម្រៀងដ៍មានសក្ដានុពលនាយុគសម័យថ្មីនេះដោយសារតែនាងល្បីឈ្មោះយ៉ាងលឿន ហើយតម្លៃខ្លួននាងខ្ពស់ជាងរៀមច្បងមួយចំនួនទៀតផង ពិសេសគឺនៅឆ្នាំ២០២៣ នេះនាងមានដៃគូចម្រៀងល្អជាងគេបំផុតដែលគ្មានតារាស្រីណាអាចធ្វើបានដូចរូបនាងឡើយ។អតីតអ្នកស្មូតលេខ១ ប្រចាំខេត្តតាកែវ និងThe Voice Cambodia រដូវកាលទី២ រូបនេះត្រូវបានអ្នកជំនាញសិល្បៈលើកឡើងថានាងច្រៀងស្ទីលរបស់អ្នកនាងខាត់ សុឃីម ពោលគឺស្អកៗ និងច្រៀងសម្លេងកន្រ្ទឹមបានល្អ ទើបធ្វើឲ្យទាំងលោកសុវត្ថិ,ខេម និងប៊ុនថៃ គ្មានការរារែកចិត្តក្នុងការចាប់ដៃគូជាមួយរូបនាងឡើយ បើទោះជាបទពិសោធន៍ក្នុងសិល្បៈរបស់នាងនៅខ្ចីជាងពួកគេក្ដី។ចំពោះGalaxy វិញនៅឆ្នាំ២០២៣ នេះក៍ស្ងាត់ដំណឹងទិញតារាចម្រៀងស្រីល្បីៗចូលដែរពិសេសគឺមាស សុខសោភា និងពេជ្រ សោភា ដែលលេចឭថាជាគោលដៅរបស់ផលិតកម្មជើងថ្មី តែហ៊ានចាយលុយធំនេះក៍ចាប់ផ្ដើមរំសាយទៅវិញដែរ គឺមានន័យថានាងច័ន្ទសីម៉ា នៅតែជាតួឯករបស់ផលិតកម្មមួយនេះតទៅទៀត ព្រោះតារាប្រុសល្បីៗដែលជ្រកនៅទ្រនុំនេះគ្មានជម្រើសណាទៅចាប់ដៃគូជាមួយតារាស្រីផ្សេងនោះទេ។ដោយឡែករឿងបេះដូងវិញនាងសីម៉ា អាយុ២៥ឆ្នាំ មិនដែលហ៊ានបង្ហាញស្និតស្នេហ៍ជាមួយបុរសណាម្នាក់ទេ ក្រោយរឿងគេសង្ស័យថាលោកឧកញ៉ាពោះម៉ាយម្នាក់ដែលតាមនាងស្អិតនោះ ចាប់ផ្ដើមរយាលៗពីនាងនិងបង្ហាញដៃគូថ្មី។ប៉ុន្ដែសម្រស់គូរឲ្យក្នក់ក្នាញ់របស់នាងច័ន្ទសីម៉ា និងភាពល្បីល្បាញរបស់នាងនោះគេជឿរថាមិនខ្វះបុរសចង់ក្លាយទៅជាម្ចាស់ចិត្តរបស់នាងឡើយ បើទោះជាមុននេះនាងថ្ងូរដូចព្រាបថារកតែក្ដឹបសង្សារមួយបណ្ដើរដូចគេមិនបានក្ដី។
ក្រៅពីនាងតន់ ច័ន្ទសីម៉ា តារាដែលមានភាពចម្រូងចម្រាសជាមួយFan ព្រោះតែចេញមុខការពារថៅកែនោះមានដូចជាលោកព្រាប សុវត្ថិ ,ខែម ប៊ុនថៃ,ខេម និងជេមស៍ ជាដើម។អ្នកជំនាញសិល្បៈបានលើកឡើងថានាងច័ន្ទសីម៉ា នឹងចុះខ្សោយវិញ ប្រសិនបើនាងមិនក្វល់ពីFan ដែលមានគំនិតផ្ទុយពីនាង ព្រោះតារាល្បីនៅលើទស្សនិកជនជាអ្នកកំណត់ មិនមែនតារាធ្វើឲ្យFan ចេះតែធ្វើតាមនិងជឿរជាក់លើពួកគេគ្រប់តែរឿងនោះឡើយ៕
