ភ្នំពេញ៖អតីតតារាKH និងសាន់ដេ នាងសុខ ស្រីនាង បានបាត់មុខពីឆាកតន្រ្ដីស្ទើតែពេញមួយរដូវក្ដៅ២០២២ -២០២៣ ដោយនាងងាកទៅចំណាយពេលលំហែកាយ៉ានៅក្រៅស្រុកជាបន្ដបន្ទាប់ទាំងប្រទេសក្នុងតំបន់អាស៊ី និងប៉ែកអ៊ឺរ៉ុប ធ្វើឲ្យស្រីស្រស់គ្មានសកម្មភាពសិល្បៈថ្មីៗដូចមិត្តរួមអាជីពឡើយ។ប្រភពខ្លះថាស្រីនាង បានចាកចេញពីហង្សមាសទៅហើយ ក្រោយផុតកុងត្រាតំណាក់កាលទី១ រយៈពេល៥ឆ្នាំ ទើបធ្វើឲ្យពេលនេះនាងគ្មានបទថ្មីៗចេញ។ តែតារាមួយចំនួនស្និតអ្នកមេម៉ាយរូបស្រស់នេះថាអតីតភរិយាលោកស៊ីសុវត្ថិ រូបនេះអាចនឹងបន្ថែមចំនួនកុងត្រាថ្មីនៅផលិតកម្មធំនេះ ប្រសិនបើការចចាររវាងអ្នកគ្រប់គ្រងផលិតកម្មនិងនាងត្រូវរ៉ូវគ្នា។ដោយឡែកនៅលើផេករបស់ស្រីនាង វិញគ្មានការផុសពីរូបថ្មីឬបទចម្រៀងថ្មីៗរបស់នាងដូចមុនទៀតនោះទេ ទើបធ្វើឲ្យស្រីនាង បាត់សកម្មភាពសិល្បៈរបស់នាងស្ទើតែទាំងស្រុងតែម្ដងនាប៉ុន្មានខែចុងក្រោយនេះ។
អ្នកដឹកនាំសម្ដែងភាពយន្ដខារ៉ាអូខេម្នាក់នៅហង្សមាសដែលធ្លាប់ហៅស្រីនាងថតភាពយន្ដភាគល្បីឈ្មោះមួយនេះបានប្រាប់”នគរធំ”កាលពីរសៀលថ្ងៃទី១២ មិថុនា ក្នុងល័ក្ខខណ្ឌមិនបញ្ចេញឈ្មោះថាលោកពិតជាផ្ដាច់ទំនាក់ទំនងការងារទាំងស្រុងជាមួយសុខ ស្រីនាង តែម្ដងនៅប៉ុន្មានខែចុងក្រោយនេះ ហើយក៍មិនដែលបានជួបនាងផ្ទាល់ដែរ។ប៉ុន្ដែលោកថារឿងស្រីនាង ចេញពីហង្សមាសហើយ ឬនៅនោះលោកមិនទាន់ច្បាស់ទេ ព្រោះអត់ដែលបានជួបគ្នាឬសួរនាំរឿងនេះនៅឡើយទេ។យ៉ាងណាDirector រូបនោះធ្លាប់សរសើរស្រីនាង ថាជាតារារក្សារសម្រស់ពីធម្មជាតិបានដោយមិនទាន់វះកាត់ដូចតារាខ្លះ ហើយនាងថែមទាំងមានទេពកោសល្យសិល្បៈសម្ដែងមិនចាញ់តារាសម្ដែងអាជីពឡើយ។
គេកត់សម្គាល់ថាមុនសុខ ស្រីនាង ស្ងាត់ឡើងឆាកតន្រ្ដី និងចេញទៅដើរលេងនៅបរទេសជាញឹកញាប់ក្រោយនាង បានបាត់បង់តំណែងជាគណៈកម្មាការCambodian Idol Junior នារដូវកាលទី២ ដែលជំនួសដោយសុគន្ធ និសា ហើយថៅកែមិនបានប្រគល់តំណែងផ្សេងដែលមានតួនាទីប្រហាក់ប្រហែលគ្នានេះដល់នាងឡើយ។ប៉ុន្ដែស្រីនាង នៅសល់តំណែងតួឯកភាពយន្ដខ្នាតធំមួយទៀតមួយទៀតដែលនាងថតចប់ជាង៣ឆ្នាំមិនទាន់ដាក់បញ្ចាំងនោះគឺរឿង”ខ្ញុំមានញាណលើស”ដែលតារាស្រអែស្រសស់រូបនេះជំនួសតំណែងឱក សុគន្ធកញ្ញា ដែលពេលនោះនាងពពោះកូនដំបូង។អ្វីដែលគូរឲ្យកត់សម្គាល់ស្រីនាង ក្រោយថតបទចម្រៀងជាខ្សែរឿង”ស្នេហាខ្ញុំផ្លូវ២”ដែលនាងលេងស្រលាញ់ភេទដូចគ្នាជាមួយឱក សុគន្ធកញ្ញា នោះមកមានក្រុម ស្រីស្រ លាញ់ភេទដូចគ្នា(Lesbian)មិនតិចនាក់ទេតាមញ៉ែនាងរហូតធ្វើឲ្យនាងពិបាកគេចវែសទៀតផង។តែការចេញទៅដើរកម្សាន្ដនៅបរទេស្ទួនៗមិនធ្លាប់មានពីមុននោះគេសង្ស័យថាស្រីនាង កំពុងតែពិសោធន៍ដៃគូស្នេហ៍ថ្មី គ្រាន់តែនាងមិនទាន់បញ្ចេញមុខម្ចាស់ចិត្តឲ្យគេស្គាល់ប៉ុណ្ណោះ។
គូររំលឹកថាសុខ ស្រីនាង បន្ទាប់ពីដើរចេញពីសាន់ដេទៅចូលហង្សមាសនោះនាងមិនសូវលេចធ្លោនៅផលិតកម្មធំដែលប្រជុំទៅដោយតារាល្បីៗជាច្រើនដួងនេះឡើយ តែការវិវត្តន៍របស់នាងគឺឈានពីតារាចម្រៀងដែលច្រៀងតែបទស្លូវសុទ្ធមកជាបទញាក់និងមានក្បាច់រាំដូចតារាល្បីៗដ៍ទៃទៀត។ស្រីនាង ក៍ទទួលបានទំនុកចិត្តខ្ពស់ពីថៅកែដែរ ព្រោះហង្សមាសបានផ្ដល់តំណែងតួឯកឲ្យនាងជាបន្ដបន្ទាប់ដើម្បីឲ្យនាងកាន់តែលេចធ្លោថែមទៀតថែមទៀត។ប៉ុន្ដែក្ដីរំពឹងនោះមិនដូចការគ្រោងទុកនោះទេ ព្រោះទោះជាស្រីនាង នៅមានសម្រស់និងមិនធ្លាប់ប៉ៈរឿងអាស្រូវណា ក្រោយលែងប្ដីលោកស៊ី សុវត្ថិ តាំងពីឆ្នាំ២០១០ មែន តែនាងបែជាស្ទើតែគ្មានឱកាសក្នុងការឆក់បានស្ពតពាណិជ្ជកម្មធំៗដូចមិត្តរួមទ្រនុំទៅវិញ។
ចំណុចទាំងនេះហើយដែលត្រូវគេមើលឃើញថាស្រីនាង ពិបាកដណ្ដើមទីផ្សារឲ្យលេចធ្លោជាងនេះនៅហង្សមាសទើបអំឡុងពេលនាងបាត់មុខពីឆាកតន្រ្ដីជាច្រើនខែមកនេះមានព័តមានថានាងមិនចង់បន្ដរួមរស់ជាមួយទ្រនុំធំដែលមានតារាឡើងគជើងគ្នាបែបនេះទៀតឡើយ។មជ្ឈដ្ឋានមហាជនកត់សម្គាល់ថាសុខ ស្រីនាង មិនអាចទៅប្រជែងតារាស្រីលំដាប់ជូរមុខនៅហង្សមាសបានទេ ព្រោះនាងច្រៀងមិនសូវខ្លាំងបទប្រភេទខ្ពស់ៗ។តែរូបសម្រស់និងកាយវិការរបស់នាង ទាំងនៅក្នុងនិងក្រៅឆាកមានFan ជាច្រើនស្រលាញ់នាងហេតុនេះស្រីនាង នៅតែជាតារាដែលត្រូវប៉ាន់តួឯកភាពយន្ដជាងចម្រៀងប្រសិនបើនាងចង់នៅបន្ដហង្សមាស តែបើនាងចង់ទៅGalaxy នោះតារាវ័យ៣៦ឆ្នាំ រូបនេះនឹងពិបាកយកឈ្នះនាងតន់ ច័ន្ទសីម៉ា ជាមិនខាន៕