ភ្នំពេញ៖យូរី និងថៅកែហាងផឹកស៊ីលោកជា នី បានផ្ដាច់ទំនាក់ទំនងគ្នាទាំងស្រុងជាង២ឆ្នាំមកនេះហើយនៅពេលដែលអតីតសង្សារនាងមានកម្មវិធីធំក្នុងហាងតែងតែមើលរំលងមកនាងពោលគឺមិនដែលហៅស្រីស្រស់ទៅច្រៀងទៀតទេ។ប៉ុន្ដែយូរី ហាក់មិនក្វល់ក្វាយច្រើនពីរឿងស្នេហាចាស់មួយនេះទេ ដោយនាងងាកទៅតុបតែងខ្លួនកាន់តែប្លែកៗ ស្បែកកាន់តែសខ្ចី និងប្ដូរព័ណម៉ូដសក់បែបស្ទាវគ្រប់ឆាកតន្រ្ដីតែម្ដង។យូរី ដែលត្រូវគេសរសើរនាងថាជាស្រីស្អាតម្នាក់ចេះបត់បែនបានគ្រប់វេលាពោលគឺសម័យនិងបុរណ ធ្វើខ្លួនទៅតាមកម្មវិធីនោះនិយាយបែបដាក់ខ្លួនថានាងមិនមែនជាស្រីស្អាតនោះទេ តែជានារីម្នាក់ចេះស្មោះស្នេហ៍ មួយដឹងមួយ… តែម្ដង។នាងថែមទាំងដាស់តឿនដល់មិត្តរួមអាជីព និងFan របស់នាងទៀតផងថាសម័យនេះទៅហើយ ឆ្នាំ២០២៣ ហើយ ឈប់ទៅអាស្ទីលស្រលាញ់គេតែម្នាក់ឯង តែគេអត់ដឹងខ្លួននោះ…។ការវាចារបស់យូរី បែបនេះច្បាស់ណាស់ថានាងចង់ឲ្យគ្រប់គ្នាហ៊ានសារភាពស្នេហ៍ ឬសាងស្នេហ៍ដោយបើកចំហ ជាជាងស្រលាញ់គេតែម្ខាង អត់ន័យ…។
ថ្វីត្បិតតែយូរី និយាយដាស់តឿនឲ្យអ្នកទាំងឡាយគូរឈប់ការស្រលាញ់គេតែម្នាក់ឯងក្ដី ប៉ុន្ដែជាច្រើនខែមកហើយ ពោលគឺតាំងពីនាងចែកផ្លូវគ្នាជាមួយលោកជា នី មករូបនាងផ្ទាល់បែជាមិនដែលបញ្ចេញមុខគូស្នេហ៍ថ្មីឲ្យគេបានស្គាល់ទៅវិញ ដោយមានពេលខ្លះនាងថែមទាំងចេញសារបែបតូចចិត្តថាគ្មានគូដូចមិត្តភក្ដិទៀតផង។តែយ៉ាងគេជឿរថាតារាសាច់សខ្ចីរូបនេះនឹងមិនទុកបេះដូងឲ្យនៅទំនេរឡើយ ព្រោះមានបុរសមិនតិចនាក់ទេ ដែលចង់ចូលខ្លួនមកស្អំរបួសបេះដូងនាង តាំងពីស្រីស្រស់ចែកផ្លូវគ្នាជាមួយលោកថៅកែហាងផឹកស៊ីម្លេះ។ប៉ុន្ដែការស្ទាក់ស្ទើការបង្ហាញភាពផ្អែមល្ហែមស្នេហ៍ដូចគេនាពេលនេះត្រូវបានគេជឿរថានោះមកពីយូរី មិនទាន់ច្បាស់លាស់ជាមួយម្ចាស់ចិត្ត ហើយនាងបារម្ភខ្លាចដើរជាន់ដានស្នេហ៍ចាស់ដោយប្រឈមការប្រេះឆាសារជាថ្មីនាំខ្មាសគេទើបយូរី នៅជ្រើសផ្លូវសាងស្នេហ៍ដោយមិនបើកចំហបែបនេះ។
យូរី បានប្រេះឆាស្នេហ៍ជាបន្ដបន្ទាប់ពោលគឺត្រូវអតីតសង្សារចាស់លោករ៉េត រៀបការប្រពន្ធថ្មីចោលនាងកាលពីឆ្នាំ២០១៨ ខណៈដែលដៃគូដ៍យល់ចិត្តរបស់នាងលោកប៊ីម៉ូ ក៍លែងចាប់ដៃនាងតទៅទៀត តាំងពីយូរី ងាកមកស្និតស្នេហ៍ជាមួយលោកជា នី ។តែយូរី មិនដែលបង្ហាញទុកសោកក្នុងបេះដូងឲ្យគេដឹងឡើយ ហើយនាងនៅតែរក្សារភាពរឹងមាំក្នុងអាជីពចម្រៀងផ្នែកយុវវ័យម្នាក់ដែលចេញមុខតាមបណ្ដារឆាកតន្រ្ដីជាច្រើននារដូវក្ដៅកន្លងមក។យ៉ាងណាអ្នកជំនាញសិល្បៈបានលើកឡើងថាយូរី មានភាពមានភាពទាក់ទាញក្នុងអាជីពដោយសារតែនាងពូកែតុបតែងខ្លួន និងក្បាច់រាំយ៉ាងរស់រវើក តែនាងពិបាកប្រជែងយកតំណែងជាតារាស្រីលំដាប់មុខនៅហង្សមាស ព្រោះត្រូវការពេលវលាថែមទៀត ខណៈដែលពេលនេះនាងស្ថិតក្នុងចំណោមតារាផ្នែកយុវវ័យមានដូចជានាងរ៉េត ស៊ូហ្សាណា និងតន់ ច័ន្ទសីម៉ា ជាដើម ហើយក្រោយពីស្រីស្រស់ចាកចេញពីសាន់ដេនិងផ្ដាច់ស្នេហ៍ថៅកែពេលនេះតម្លៃខ្លួននាងច្រៀង១កម្មវិធីស៊ីថ្លៃជិត២ពាន់ដុល្លារឯណ្ណោះ។
ប្រភពបានឲ្យដឹងថាយូរី កំពុងត្រៀមខ្លួនថតសម្ដែងភាពយន្ដឲ្យហង្សមាសដូចតារាចម្រៀងស្រីដ៍ទៃទៀតរបស់ផលិតកម្មមួយនេះ ដើម្បីឲ្យសន្ទុះរបស់នាងហក់លោតទៅមុខថែមទៀត ប៉ុន្ដែការដណ្ដើមបានតំណែងជាតួឯក ឬអត់ នោះស្ថិតក្នុងភាពស្រពិចស្រពិលនៅឡើយ ខណៈដែលFan មិនចង់ឲ្យនាងលេងជាតួរងនោះទេ។តាមព័តមានថាយូរី ពិតជាពិបាកក្រោយអត់ពីថៅកែ ព្រោះពីមុននាងត្រូវបានលោកជូនទៅច្រៀងសម្ដែងសឹងគ្រប់ឆាកតន្រ្ដី តែពេលនេះនាងភាគច្រើនកាន់ចង្កូតឡានខ្លួនឯង ហេតុនេះរត់ពីឆាក១ទៅឆាក១ទៀតមិនងាយស្រួលនោះទេ ទើបអ្នកគាំទ្រនាងចង់ឲ្យយូរី គូរតែបង្ហាញម្ចាស់ចិត្តថ្មីឲ្យបានឆាប់ដើម្បីបានជួយការងារដល់នាងផង និងជាសញ្ញាឆ្លើយតបទៅថៅកែឲ្យបានដឹងខ្លួនផងថាអត់ពីលោកទៅអត់ខ្វះបុរសចាំត្រងស្នេហ៍នាងឡើយ។
ក្រៅពីយូរី ស្រីស្អាតដែលធ្លាប់ជួបរឿងស្នេហាមិនសូវសមប្រកបដូចនាងដែរមានដូចជានាងកែវ និសា ,ហ៊ិនច័ន្ទនីរ័ត្ន ,ពេជ្រ អាវីហ្សា និងសុខ សោម៉ាវត្តី ជាដើម។គេជឿរថាយូរី នឹងជៀសផុតពីការខកចិត្តជាលើកទី៤ជាមិនខាន ព្រោះចំណងស្នេហាថ្មីនេះនាងមានការពិនិត្យឲ្យបានច្បាស់លាស់ខ្លាំងណាស់ ទើបពន្យាពេលបញ្ចេញមុខគូស្នេហ៍អស់ជាច្រើនខែបែបនេះ ហើយក្នុងនោះនាងនៅតែជាស្រីស្អាតម្នាក់ដែលមានជម្រើសស្នេហ៍ដ៍ច្រើនដដែល៕