ភ្នំពេញ៖អតីតតារាសម្ដែងអំឡុងឆ្នាំ២០០៥ អ្នកនាងមាស សុម៉ាវត្តី បានមកលេងស្រុកខ្មែរជាថ្មីក្រោយពីអាកខានមកស្រុកជិត៣ឆ្នាំដោយសារតែកូវីដ។អ្នកនាងសុម៉ាវត្តី បានឲ្យដឹងថាការមកជើងនេះមានរយៈពេល១ខែកន្លះ ហើយកូនប្រុសស្រីរបស់នាងក៍បានមកជាមួយដែរ ព្រោះខែនេះនៅអាមេរិកពួកគេសម្រាកពីការសិក្សារ។អ្នកនាងវត្តី ដែលបានទៅរស់នៅតាមស្វាមីលើទឹកដីអាមេរិកជាង១០ឆ្នាំទៅហើយ នោះថានាងនិងប្ដីបានដើរកម្សាន្ដនៅបរទេសជាច្រើនប្រទេសមកហើយ ប៉ុន្ដែទាំងរូបនាងនិងប្ដីជាប់ចិត្តទឹកដីខ្មែរខ្លាំង ហេតុនេះគិតថានៅរយៈពេល៣ឆ្នាំកន្លះទៀតនាពេលខាងមុខនេះពោលគឺនៅឆ្នាំ២០២៦ នាងនឹងវិលមករស់នៅខ្មែរវិញហើយ ព្រោះគ្មានទីណាល្អជាងស្រុកកំណើតខ្លួនឯងនោះទេ។
ឆ្លើយតបសំណួរថាតើអ្នកនាងមាស សុម៉ាវត្តី ទទួលថតភាពយន្ដឡើងវិញទេ ប្រសិនបើមានផលិតករហៅនាងសម្ដែងជាថ្មីនោះ អតីតតារាសម្ដែងរូបនេះថានាងចង់ទុកពេលវេលាឲ្យក្មេងៗ បន្ដវេន ម្យាងនាងថារូបនាងហួសដឺឡេ ហើយ។ប៉ុន្ដែលោកសាវិន ហ្វីលីពដែលឈនៅជិតសោម៉ាវត្តី នោះនិយាយលើកទឹកចិត្តនាងថាអាយុ៤១ឆ្នាំ តែមើលទៅស្អាតស្មានតែទើប២៥ឆ្នាំ អីចឹងអត់ហួសដឺឡេអីទេ ដែលការនិយាយបែបនេះធ្វើឲ្យអ្នកនាងវត្ដី អៀនប្រៀនបន្ដិចនិងនាងបញ្ចេញយោបល់ថាតារាសម្ដែងសម័យថ្មីនេះពួកគេសុទ្ធតែពូកែនិយាយប៉ារ៉ូលបានល្អខ្លាំងណាស់ដែលខុសពីសម័យនាងមិនជឿនលឿនដូចបច្ចុប្បន្ននោះទេ។
អ្នកនាងមាស សោម៉ាវត្តី បានឲ្យដឹងដែរថាក្រោយនាងចេញទៅរស់នៅតាមប្ដីនៅអាមេរិកជាង១ទសវត្សន៍មកនេះនាងមានកូនពីរនាក់គឺកូនទី១ប្រុសអាយុ១០ឆ្នាំ និងកូនទី២ស្រីអាយុ៨ឆ្នាំ។នាងថាទៅដល់អាមេរិកដំបូងបានរកស៊ីបើកភោជនីយដ្ឋាន តែដោយសារមុខរបរនេះមមាញឹកខ្លាំងពេក ពិបាកគ្មានពេលមើលថែកូនទើបនាងនិងស្វាមីងាកមករកស៊ីផ្នែកអចលនទ្រព្យរហូតមកដល់សព្វថ្ងៃ។
បើតាមលោកសាវិន ហ្វីលីព ដែលជាអ្នករាប់អានគ្នាយ៉ាងជិតដិតជាមួយអ្នកនាងមាស សោម៉ាវត្តី នោះបានឲ្យដឹងថាអតីតតារាសម្ដែងរូបនេះចូលចិត្តធ្វើសប្បុរសធ័មដល់អ្នកមានជីវភាពក្រខ្សត់ជាញឹកញាប់មកហើយតាមរយៈរូបលោកផ្ទាល់។ជាក់ស្ដែងដូចជាថ្មីៗនេះនៅពេលដែលដឹងថាតារាសម្ដែងអេង វ៉ាណង កើតជំងឺមហារីកសុដន់តំណាក់កាលទី៣ នោះអ្នកនាងសោម៉ាវត្តី ក៍បានផ្ញើរលុយតាមលោកជួយដល់វ៉ាណង ដែរ ដែលទឹកចិត្តបែបនេះធ្វើឲ្យលោកមិនអាចមើលរំលងបានទេ។
គូររំលឹកថាមាស សោម៉ាវត្តី បានថតសម្ដែងភាពយន្ដនិងខារ៉ាអូខេជាច្រើនមុននាងបញ្ចប់អាជីព ក្នុងនោះមានដូចជាផលិតកម្មអង្គរវត្ត និងផលិតកម្មមួយចំនួនទៀត។អតីតតារាសម្ដែងរូបនេះបានជ្រើសផ្លូវ”ជួញឆ្ងាយ ប្រសើរជាងជួញជិត” តាមរយៈការយកស្វាមីជាបុរសអាណិជនខ្មែរអាមេរិកដូចគ្នាទៅនិងអ្នកនាងគឹម លក្ខិណា ,អម្ពរ ទេវី,វ៉េត រតនា ,សុគន្ធ និសា និងសារ៉ាយ សក្ខណា ជាដើម។ដោយឡែកទាក់ទងការនាំស្វាមីនិងកូនៗមករស់នៅស្រុកខ្មែរវិញនៅពាក់កណ្ដាលឆ្នាំ២០២៦ ខាងមុខនេះអ្នកនាងវត្តី មិនទាន់ប្រាប់ថានឹងបន្ដអាជីពជាអ្នករកស៊ីផ្នែកអចលនវត្ថុតទៅទៀត ឬយ៉ាងណាឡើយ ស្របពេលដែលផលិតករមួយចំនួនដែលបានឃើញអ្នកនាងចូលរួមសម្ពោធរឿងKTV កាលពីថ្ងៃទី២៩ មិថុនា នោះថាក្រុមការងារលោកនៅតែពេញចិត្តទៅលើសម្ថភាពអតីតតារាសម្ដែងរូបនេះនាពេលកន្លងមក តែពួកគេពិបាកហៅនាងថតនាពេលនេះដោយសារតែនាងចុះមករយៈពេលខ្លីៗ បើមកនៅខ្មែរជាអចិនត្រេយ៍វិញមែននោះច្បាស់ជាហៅនាងថតវិញជាមិខាន។ ប៉ុន្ដែក្រុមDirector ទាំងនោះថាអ្នកនាងវត្តី អាចលេងបានត្រឹមជាតួម្ដាយមិនអាចធ្វើតួឯកទៀតបានទេ ទោះជានាងនៅតែមានសម្រស់គូរឲ្យទាក់ទាញក្ដី។ការបង្ហើបតម្រុយមកខ្មែរវិញដែលអាចវិលទៅរកអាជីពចាស់របស់អ្នកនាងសោម៉ាវត្តី នាពេលនេះគឺដូចគ្នាទៅនិងអតីតតារាសម្ដែងអ្នកនាងសារ៉ាយ សក្ខណា ដែលពេលនេះនាងបានវិលមកនៅខ្មែរវិញច្រើនជាងរស់នៅអាមេរិក ព្រមទាំងបន្ដអាជីពសិល្បៈជាថ្មីឡើងវិញដូចដើមទៀតផង៕
