បាងកក (ប្រទេសថៃ) ៖ តារាសម្តែងខ្មែរ ដ៏លេចធ្លោលើឆាកអន្តរជាតិ កញ្ញាស៊ីន យូប៊ីន ទទួលបានពានរង្វាន់ កំពូលតារាអាស៊ី២០២៣ (ASIA TOP AWARD 2023) ជាតារាសម្តែងស្រីដែលមានប្រជាប្រិយភាព ប្រចាំឆ្នាំ (popular actress of the year) ។
ពិធីប្រគល់-ទទួលពានរង្វាន់នេះ ធ្វើឡើងនៅថ្ងៃទី០២ ខែកក្កដា ឆ្នាំ២០២៣ នៅទីក្រុងបាងកក ប្រទេសថៃ។កញ្ញាស៊ី យូប៊ីន បានបញ្ជាក់នៅថ្ងៃទី០៣ ខែកក្កដា ឆ្នាំ២០២៣ ថា ជោគជ័យថ្ងៃនេះ មិនមែនសម្រាប់ តែរូបនាង ម្នាក់ទេ គឺសម្រាប់ប្រជាជាតិកម្ពុជា ទាំងមូល ហើយនាងមានមោទនភាពក្នុងមានជាប្រជាជនខ្មែរ។
កញ្ញាស៊ីន យូប៊ីន បានសរសេរក្នុងទំព័របណ្តាញសង្គម ហ្វេប៊ុក របស់នាង នៅរសៀលថ្ងៃទី០៣ ខែកក្កដា ឆ្នាំ២០២៣ ថា «ពានរង្វាន់តារាសម្តែងស្រីដែលមានប្រជាប្រិយភាពប្រចាំឆ្នាំ (popular actress of the year) ផ្តល់ដោយកម្មវិធី ASIA TOP AWARD 2023 ប្រទេសថៃ ។ ជោគជ័យថ្ងៃនេះ មិនមែនសម្រាប់តែ Yubin ប៉ុន្តែសម្រាប់ប្រជាជាតិកម្ពុជា ទាំងមូល។ សូមចូលរួមសាទរជាមួយ Yubin ទាំងអស់គ្នា proud to be Khmer»។
សូមបញ្ជាក់ថា កញ្ញាស៊ីន យូប៊ីន ជាអតីតហ្វ្រេស៊ីហ្គឺល និងជាតារាសម្តែងខ្មែរ ដ៏ល្បីល្បាញដែលមាន ភាពលេច ធ្លោទាំងទេពកោសល្យសម្តែង និងរូបសម្រស់ ហើយនាងជាតារាស្រីតំណាងកម្ពុជា ដំបូងគេ ដែលបាន បង្ហាញ ខ្លួននៅលើព្រំក្រហម ក្នុងមហោស្រពភាពយន្ត លើកទី៧៦ នៅទីក្រុងកាន ប្រទេសបារាំង (76th annual cannes film festival 2023 in cannes France ) ដោយបាននាំយកអត្តសញ្ញាណជាតិខ្មែរ ទៅបង្ហាញពិភពលោក ដែល គួរឲ្យកោតសរសើរ និងជាមោទនភាពសម្រាប់ប្រជាជនកម្ពុជា ដោយក្នុងឱកាសនោះ នាងបានបង្ហាញនូវឈុត រ៉ូបដែលជាគំនិតច្នៃប្រឌិតរបស់នាង ដោយភ្ជាប់ជាមួយនូវទង់ជាតិ និងអត្តសញ្ញាណជាតិខ្មែរ ទៅកាន់ពិភពលោក លើវេទិកាអន្តរជាតិ ប្រចាំឆ្នាំ២០២៣ នេះ៕ ខៀវទុំ
