ខ្សែបម្រើប្រេស៊ីលFabinho របស់ក្លឹប Liverpool កាលពីថ្ងៃចន្ទបានចូលរួមជាមួយក្រុមជើងឯកអារ៉ាប៊ីសាអូឌីត Al-Ittihad ក្នុងកិច្ចសន្យារយៈពេល ៣ឆ្នាំ។នេះបើយោងតាមការចេញផ្សាយរបស់សារព័ត៌មានរ៉យទ័រកាលពីថ្ងៃអង្គារទី១ ខែសីហា ឆ្នាំ២០២៣។
Al-Ittihad បាននិយាយនៅលើ Twitter ថា Fabinho វ័យ ២៩ឆ្នាំបានចុះហត្ថលេខាលើកិច្ចសន្យារហូតដល់ឆ្នាំ ២០២៦ ជាមួយក្លឹប Jeddah ដើម្បីចូលរួមជាមួយតារាបាល់ទាត់បារាំង Karim Benzema កីឡាករ N’Golo Kante និងខ្សែបម្រើស្លាបព័រទុយហ្គាល់ Jota ។
បន្ទាប់ពីចុះហត្ថលេខាកីឡាកររូបនេះបាននិយាយថាថ្ងៃនេះខ្ញុំចាកចេញពីផ្ទះរបស់ខ្ញុំ។ វាមានរយៈពេល៥ ឆ្នាំហើយដែលពាក់អាវនេះជាមួយនឹងកិត្តិយស និងសុភមង្គលដ៏អស្ចារ្យបំផុត។ ចាប់តាំងពីថ្ងៃដំបូងនៅ Liverpool ខ្ញុំត្រូវបានទទួលយកដោយមនុស្សគ្រប់គ្នា។
Fabinho បានឈ្នះពានរង្វាន់ UEFA Champions League, English Premier League, FIFA Club World Cup និង English FA Cup ជាមួយ Liverpool ក្នុងឆ្នាំ ២០១៨-២៣។
មុនទៅLiverpool គាត់ធ្លាប់ឈ្នះជើងឯកបារាំងនៅឆ្នាំ២០១៧ ជាមួយក្លឹប Monaco ។កីឡាករសញ្ជាតិប្រេស៊ីលរូបនេះស៊ុតបញ្ចូលទីបាន១១ គ្រាប់ក្នុងការបង្ហាញខ្លួន ២១៩ លើកសម្រាប់ក្រុម Liverpool ៕