ភ្នំពេញ៖លោកជីមមី ជំនួយការរបស់អ្នកនាងយុគ ចិន្ដា បានប្រាប់អ្នកយកព័តមានយើងនៅថ្ងៃមង្គលការ របស់ហ៊ិន ច័ន្ទនីរ័ត្ន កាលពីពេលថ្មីៗនេះថាមេរបស់លោក(យុគ ចិន្ដា )ជិតដល់ថ្ងៃរៀបការហើយ…។ប៉ុន្ដែលោកមិនប្រាប់កាលបរិច្ឆេតច្បាស់លាស់ទេ ព្រោះចង់ឲ្យគេភ្ញាក់ផ្អើល (Surprise) ។នៅពេលទូរស័ព្ទទៅជំនួយការអ្នកនាងយុគ ចិន្ដា រូបនេះដើម្បីឲ្យដឹងថាតើអ្នកនាងរៀបការនៅទីណាឲ្យប្រាកដ នោះលោកជីមមី បែជាថាលោករវល់ជាប់នៅលំហែកាយ៉ា ថ្ងៃសម្រាកចូលឆ្នាំសាកល មិនទាន់អាចនិយាយរឿង មួយនេះបានទៅវិញ ។ដោយឡែកអ្នកនាងយុគ ចិន្ដា វិញធ្លាប់ប្រាប់អ្នកយកព័តមានយើងថានាងនឹង រៀបការ នៅពេលដែលកូនស្រីសំណព្វចិត្តនាង ឈ្មោះយុគ ដាពេជ្រ ហៅស្រីអម មានអាយុគ្រប់១៨ឆ្នាំដែលពេលនោះ កូននឹងធ្វើជាអ្នកកំដរឲ្យនាងតែម្ដង ខណៈដែលកូនស្រីអ្នកនាង ពេញវ័យតាំងពីឆ្នាំ២០២២ ម្លេះ ។
សូមបញ្ជាក់ថាអ្នកនាងយុគ ចិន្ដា បានបរាជ័យស្នេហាជាច្រើនលើកច្រើនសារ ទើបធ្វើឲ្យអ្នកខ្លះចាត់ទុកនាង ថាជាតារាដែលជោគជ័យតែការងារសិល្បៈនិងជំនួញតែមិនកាក់កបរឿងស្នេហាឡើយ ។ប៉ុន្ដែប៉ុន្មានឆ្នាំចុងក្រោយនេះអ្នកនាងចិន្ដា បានរក្សារចំណងស្នេហាជាមួយបុរសវ័យចំណាស់ម្នាក់ជាង៥ឆ្នាំ មក ហើយដែលតាមគម្រោងជំនួយការនាងបង្ហើបថាអ្នកនាងត្រូវដឹកដៃគូស្នេហ៍រៀបការតាំងពីថ្ងៃទី២៣ ខែមីនា ឆ្នាំ២០២០ ម្លេះ តែពេលនោះផែនការណ៍គ្រោងគ្រងឈុតកូនក្រមុំរបស់អ្នកនាងចិន្ដា ត្រូវបានលុបចោលជា បន្ទាន់វិញដោយសារតែកូវីដ ។នៅឆ្នាំ២០២២ និង២០២៣ ដែលតារាជាច្រើនបានរៀបការជាបន្ដបន្ទាប់នោះអ្នកនាងចិន្ដា បានលុបចោលបំណងចូលរោងការជាថ្មីដោយសារតែជាប់កាន់ទុក្ខម្ដាយនាងលោកស្រីខឹម ផល្លី ដែលទទួលមរណភាពកាលពីថ្ងៃទី១០ ខែកក្កដា ឆ្នាំ២០២២ ។ប៉ុន្ដែសម្រាប់ឆ្នាំ២០២៤ នេះអ្នកនាងចិន្ដា ប្រហែលជាគ្មានលែស ឬហេតុផលណាមួយដែលនាងត្រូវពន្យាពេលរៀបការម្ដងទៀតឡើយ ព្រោះកូនស្រីក៍ពេញ វ័យក្រមុំ ហើយនាងក៍ទើបផុតពេលកាន់ទុក្ខម្ដាយផងដែរ ។
អ្នកនាងយុគ ចិន្ដា បានបង្ហាញស្នេហាថ្មីដោយបើកចំហ តែត្រូវបានតារាខ្លះសរសើរនាងថារកគូស្នេហ៍មាន ចឬកចាស់ទុំ ស្លូតបូតសាកសមគ្នាជាមួយនាង ។តែតារាមួយចំនួនទៀតបែជាបង្អាប់ថាអ្នកនាងមានលុយគូរតែ យកប្ដីក្មេងរូបសង្ហារដូចអ្នកនាងគង់ សុជាតិ ,ខាត់ សុឃីម និងទ្រី ដាណា ជាដើមទើបសាកសមគ្នា ប៉ុន្ដែអ្នក នាងចិន្ដា មិនក្វល់ឡើយ ហើយដើម្បីបញ្ចប់រឿងគេឌឺដងនាងថាជោគជ័យតែសិល្បៈ រឿងស្នេហាសូន្យនោះ នាងនឹងដឹកដៃគូស្នេហ៍ក្រាបផ្ទឹមនៅឆ្នាំ២០២៤ នេះតែម្ដង ប្រសិនបើគ្មានអ្វីប្រែប្រួល ។
ក្រៅពីអ្នកនាងយុគ ចិន្ដា តារាដែលយកស្វាមីមានវ័យចំណាស់ជាងខ្លួនច្រើនឆ្នាំមានដូចជាអ្នកនាងចាន់ សុធា រ័ត្ន ,គឹម លក្ខិណា ,កែវ ពេជ្រពិសី ,កែវ ពិសី ,វ៉េត រតនា និងចរិយ៉ា ពេជ្រ ជាដើម ។ប្រភពបានឲ្យដឹងថាអ្នក នាងចិន្ដា ដែលមិនធ្លាប់រៀបការសោះតែមានកូនពេញវ័យក្រមុំស្ដូកនេះនឹងរៀបចំពិធីអាពាហ៍ ពិពាហ៍ យ៉ាង ប្រណិតបំផុតមិនចាញ់តារាល្បីៗផ្សេងទៀតឡើយ ដែលលោកជីមមី ធ្លាប់បង្ហើបថាទាំងទីតាំង,សំអាងការ ,ចុងភៅ និងការតុបតែងផ្កាភ្ញីផ្សេងៗទៀតគឺលោកជាអ្នកទទួលភារកិច្ចរ៉ាប់រងទាំងអស់ថ្ងៃពិសេសរបស់មេលោក ក្នុងការជួលក្រុមការងារខាងលើ។
មជ្ឈដ្ឋានមហាជនមើលឃើញថាអ្នកនាងយុគ ចិន្ដា ជាពិធីការិនីដែលស្ថិតក្នុងចំណោមតារាមានទ្រព្យច្រើន នាពេលបច្ចុប្បន្នមានដូចជាលោកព្រាប សុវត្ថិ ,ចា រិទ្ធី ,គង់ សុជាតិ និងខាត់ សុឃីម ជាដើម នោះនាងមានអ្វីៗ គ្រប់យ៉ាងក្នុងដៃរួមមានមុខជំនួញ,ផ្ទះជួល និងដីធ្លីជាច្រើនទៀត ។ប៉ុន្ដែរឿងដែលនាងគ្មានគឺភាពកក់ក្ដៅក្នុងបេះដូង ហេតុនេះប្រសិនបើនាងហ៊ានដឹកដៃគូស្នេហ៍វ័យចំណាស់ចូល រោងការនៅឆ្នាំនេះមែន នោះនាងនឹងលែងមានអ្នកចាត់ទុកនាងថាអភ័ព្វស្នេហាទៀតហើយ ។តែដោយសារតែពេលនេះអ្ននាងចិន្ដា អាយុជិត៥០ឆ្នាំទៅហើយ ហេតុនេះការយកកូនបន្ដពូជថែម មិនសូវមាន សង្ឃឹមឡើយ ខណៈដែលកូនស្រីទី១របស់នាងអ្នកណាជាឪពុកនៅតែស្ថិតក្នុងភាពជាអាថ័កំបាំងបន្ដទៀត ៕
