ចិន-ខ្មែរ ៧នាក់ ជាប់គុកម្នាក់២០ ឆ្នាំជួញថ្នាំញៀន ជិត១តោន

ខេត្តព្រះសីហនុ ៖ ឧក្រិដ្ឋជនជាជនជាតិចិន ចំនួន៧នាក់ ដែលធ្វើសកម្មភាពដឹកជញ្ជូនដោយខុសច្បាប់នូវសារធាតុញៀន ទម្ងន់ជិត១តោន ត្រូវបានចៅក្រមសាលាដំបូងខេត្តព្រះសីហនុ សម្រេចផ្តន្ទាទោសដាក់ពន្ធនាគារ ក្នុងម្នាក់ៗ កំណត់រយៈពេល២០ឆ្នាំ។

យោងតាមសេចក្តីប្រកាសព័ត៌មានរបស់អ្នកនាំពាក្យសាលាដំបូងខេត្តព្រះសីហនុ ចុះថ្ងៃទី៣១ ខែមករា ឆ្នាំ២០២៤ បានបញ្ជាក់ថា កាលពីថ្ងៃទី០៩ ខែមករា ឆ្នាំ២០២៤ ក្រុមប្រឹក្សាជំនុំជម្រះ នៃសាលាដំបូងខេត្តព្រះសីហនុ បានបើកសវនាការជាសាធារណៈ ដើម្បីជំនុំជម្រះលើសំណុំរឿងព្រហ្មទណ្ឌលេខ ៨១៦ ចុះថ្ងៃទី២០ ខែសីហា ឆ្នាំ២០២២ ពាក់ព័ន្ធនឹងបទល្មើសរក្សាទុក និងដឹកជញ្ជូនដោយខុសច្បាប់នូវសារធាតុញៀន (ទម្ងន់ ៨៧១គីឡូ ២០០ក្រាម ប្រភេទកេតាមីន) និងបទល្មើសសម្អាតប្រាក់ ទៅតាមនីតិវិធីច្បាប់ និងបានកំណត់ពេលប្រកាសសាលក្រមនៅ ថ្ងៃទី៣១ ខែមករា ឆ្នាំ២០២៤។

ក្រុមប្រឹក្សាជំនុំជម្រះសាលាដំបូងខេត្តព្រះសីហនុ បានប្រកាសសាលក្រមលេខ ២៧/០២ ក្រ១ “ក” ចុះថ្ងៃទី៣១ ខែមករា ឆ្នាំ២០២៤ ដោយសម្រេចផ្តន្ទាទោសដូចខាងក្រោម ៖

១-ឈ្មោះភូ ណា (PHOU NA) ហៅ XIAO FU ឬ ម៉ាប់ ភេទប្រុស អាយុ៣៣ឆ្នាំ ជនជាតិខ្មែរ

២-ឈ្មោះ តុង ពូជីន (DONG BU JUN) ហៅ DONG XIAO CHUN ហៅ JUN GE ឬហៅ LAO DONG ភេទប្រុស អាយុ៤៧ឆ្នាំ ជនជាតិចិន

៣-ឈ្មោះ យ៉ាង ស៊ីថុន (YAN XI TONG) ហៅ ឡាវ យៀន (LAO YAN) ភេទប្រុស អាយុ៥១ឆ្នាំ ជនជាតិចិន

៤-ឈ្មោះ តុង ជាំងស៊ីន (DONG JIAN XIN) ហៅ AH SHU ភេទប្រុស អាយុ៧០ឆ្នាំ ជនជាតិចិន

៥-ឈ្មោះ កូវ ជីពឹង (GAO ZHI BIN) ភេទប្រុស អាយុ៤៩ឆ្នាំ ជនជាតិចិន

៦-ឈ្មោះ លី យ៉ុងស៊ីន (LI YONG XIN) ភេទប្រុស អាយុ  ៤៨ឆ្នាំ ជនជាតិចិន

៧-ឈ្មោះ ចុង ជៀនលីន (ZHONG JIAN LIN) ភេទប្រុស អាយុ៣៧ឆ្នាំ ជនជាតិចិន។

ក្រុមប្រឹក្សាជំនុំជម្រះ នៃសាលាខេត្តព្រះសីហនុ ផ្តន្ទាទោសជនជាប់ចោទទាំង៧នាក់ ដាក់ពន្ធនាគារ ក្នុងម្នាក់ៗ កំណត់រយៈពេល២០ឆ្នាំ និងពិន័យជាប្រាក់ ក្នុងម្នាក់ៗចំនួន ៤០លានរៀល ពីបទរក្សាទុកនិងដឹកជញ្ជូនដោយខុសច្បាប់នូវសារធាតុញៀន និងបទសម្អាតប្រាក់ ប្រព្រឹត្តនៅភូមិ៣ សង្កាត់លេខ១ ក្រុងព្រះសីហនុ ខេត្តព្រះសីហនុ កាលពីអំឡុងឆ្នាំ២០២១ រហូតដល់ថ្ងៃទី១៦ ខែសីហា ឆ្នាំ២០២២ បទល្មើសព្រហ្មទណ្ឌ ដែលមានចែងឱ្យផ្តន្ទាទោសតាមមាត្រា៤៨ កថាខណ្ឌទី៦ ចំណុចទី១ នៃច្បាប់ស្តីពីការត្រួតពិនិត្យគ្រឿងញៀន និងមាត្រា៣៨ នៃច្បាប់ស្តីពីការប្រឆាំងការសម្អាតប្រាក់ និងហិរញ្ញប្បទានភេរវកម្ម។

និងសម្រេចរឹបអូសវត្ថុចាប់យកមាន ៖ កប៉ាល់ ១គ្រឿង អូប័រ ៥គ្រឿង ទូកឈើ ១គ្រឿង រថយន្ត ១គ្រឿង ម៉ូតូ ៣គ្រឿង ប្រាក់ ៩៥៦៤៤,៨៦ដុល្លារ និងគ្រឿងញៀនទាំងអស់ សម្រេចរឹបអូសបំផ្លាញចោល។

ចំពោះជនជាប់ចោទជាជនជាតិចិន ទាំង៦នាក់ខាងលើ នឹងត្រូវបណ្តេញចេញពីព្រះរាជាណាចក្រកម្ពុជា បន្ទាប់ពីអនុវត្តទោសចប់៕