ភ្នំពេញ៖ស្រីស្រស់មុន្នី ម៉ូនីតា បានផ្អាកការថតសម្ដែងភាពយន្ដពេញ១ឆ្នាំ២០២៣ តែម្ដងដើម្បីសិក្សារពីការធ្វើជំនួញឆ្លងប្រទេសនោះគឺការនាំចូលផលិតផលផ្នែកCosmetics ពីអូស្រា្ដលីមកលក់នៅខ្មែរ។តារាភាពយន្ដស្រស់សោភា រូបនេះបានចេញទៅអូស្រា្ដលីរយៈពេល១ខែកាលពីខែមេសា ឆ្នាំ២០២៣ ហើយនាងបានចុះទៅមើលដល់ទីតាំងរោងចក្រផលិតផលគ្រឿងសម្អាងមានគុណភាពដែលខ្លួនចង់នាំយកមកខ្មែរ ហើយនាងថាផលិតផលនោះមានតម្លៃខ្ពស់សឹងតែ២គុណ៣ បើប្រៀបធៀបតម្លៃផលិតផលផ្សេងៗទៀតនិងមុនចេញប្រេននីមួយៗត្រូវការតេស្ដពី៣ទៅ៦ខែឯណ្ណោះ ហេតុនេះហើយការលក់ចេញនៅខ្មែរនឹងពិបាក ព្រោះសេដ្ឋនិច្ចយើងឥឡូវមិនសូវល្អ ទើបនាងពន្យាពេលមួយអន្លើសិន តែមិនបោះបង់ទេ គឺគ្រាន់តែត្រូវការពេលវេលាសិក្សាឲ្យបានច្បាស់លាស់ថែមទៀត។ម៉ូនីតា ថាអំឡុងពេលដែលនាងមិនទាន់អាចនាំយកផលិតផលទាក់ទងការថែរក្សារសម្រស់ពីអូស្រា្ដលីមកលក់នៅខ្មែរបាននេះនាងក៍នៅតែបន្ដលក់សាប៊ូនាំចូលពីប្រទេសជប៉ុនជាធម្មតា ដែលនៅតាមOnline នាងធ្វើការងារមួយនេះដោយខ្លួនឯងផង និងមានក្រុមការងារជួយផង។
ទាក់ទងការមិនទទួលថតរឿងពេញ១ឆ្នាំ២០២៣ នោះមុន្នី ម៉ូនីតា ថានាងខាតបង់សម្ដែងភាពយន្ដដល់ទៅ៧រឿងឯណ្ណោះ ហេតុនេះមានការសោកស្ដាយដែរ ព្រោះអាជីពសិល្បៈគឺជាផ្នែកមួយដែលនាងស្រលាញ់បំផុត ហើយក៍មិនអាចបោះបង់ចោលទាំងស្រុងដែរបើទោះជានាងជាប់ដៃរកស៊ីនៅខាងក្រៅសិល្បៈយ៉ាងណាក៍ដោយ។
គួរបញ្ជាក់ថាក្រៅពីអាជីសម្ដែងមុន្នី ម៉ូនីតា ក៍ជាតារាម៉ូដែលម្នាក់ដ៍លេចធ្លោផងដែរ ព្រោះនាងក៍ធ្លាប់ជាបេក្ខភាព Miss Grand Cambodia 2017 ហើយប្រឡូកសិល្បៈរយៈពេលជាង៧ឆ្នាំនេះ ម៉ូនីតា ក៍ឆ្លៀតរកស៊ីផ្នែកអចលនទ្រព្យទៀតផង ដោយសារតែនាងមានឪពុកឈ្មោះលោកឡេង សុជន ជាអ្នកជំនាញលើវិស័យអចលនវត្ថុនេះជាច្រើនឆ្នាំមកហើយ ។
មុន្នី ម៉ូនីតា វាចាទោះជាវិស័យដីធ្លីនាពេលបច្ចុប្បន្នមានទីផ្សារមិនសូវល្អមែន តែសព្វថ្ងៃនាងនៅតែធ្វើការងារនេះជាធម្មតា និងចុះឡើងតាមខេត្តជាញឹកញាប់ដើម្បីដាំកូនឈើនៅតាមគម្រោងមួយចំនួន។នាងថាក្នុងនាមនាងជាអតីតMiss Grand Cambodia ម្នាក់ដែរនាងសប្បាយចិត្តដែលបច្ចុប្បន្នមើលឃើញវិស័យដើរម៉ូដ បវរកញ្ញា ភាពយន្ដ មានការរីកចម្រើនខ្លាំងរហូតនាងនឹកស្មានមិនដល់ ហេតុនេះនាងមានតែគាំទ្រនិងជម្រុញឲ្យប្អូនៗជំនាន់ក្រោយឲ្យប្រឹងប្រែងតទៅទៀតដើម្បីឲ្យយើងដើរទាន់ប្រទេសជិតខាង។
គេកត់សម្គាល់ថាមុន្នី ម៉ូនីតា មិនត្រឹមតែចង់ធ្វើជំនួញធំឆ្លងទ្វីពនោះទេ តែរឿងបេះដូងស្រីស្រស់រូបនេះក៍ជ្រើសស្នេហ៍ឆ្លងសមុទ្រដូចគ្នាដែរ ព្រោះគូស្នេហ៍របស់នាងជាបុរសម្នាក់មានឪពុកម្ដាយរស់នៅអូស្រា្ដលី បើទោះជាពេលនេះលោកកំពុងរស់នៅខ្មែរក្ដី។មុន្នី ម៉ូនីតា ដែលធ្លាប់ប្រាប់ថាមិនទាន់ចង់រៀបការឆាប់ៗ ព្រោះចង់ប្រើភាពនៅលីវច្រើនឆ្នាំទៀតបើទោះជាទំនាក់ទំនងរវាងនាងនិងបុរសនោះជាច្រើនឆ្នាំតំណើរការដោយរលូននិងចុះសម្រុងយ៉ាងល្អនោះ ថាអនាគតនាងចង់ចេញចូលពីខ្មែរទៅអូស្រា្ដលីឲ្យបានញឹកញាប់ ដើម្បីសុំសិទ្ធរស់នៅអូស្រា្ដលីជាមួយគូស្នេហ៍ជាអិនតេ្រយ៍ផងដែរ ។ប៉ុន្ដែម៉ូនីតា មិនដែលបណ្ដើរគូស្នេហ៍ជាចំហម្ដងណាឡើយ ហើយប្រសិនបើពេលខាងមុខនាងទៅរស់នៅអូស្រា្ដលីជាមួយគូស្នេហ៍ដូចបំណងមែន នោះនាងស្ថិតក្នុងចំណោមតារាខ្មែរដែលទៅរស់នៅអូស្រា្ដលីតាមម្ចាស់ស្នេហ៍មានដូចជាអ្នកនាងដាញ់ ម៉ូនីកា ,អឿន ដាលីស និងសុខ ចាន់ណានូ ជាដើម ។
សូមរំលឹកថា មុន្នី ម៉ូនីតា ចាប់អាជីពសម្ដែងភាពយន្ដតាំងពីឆ្នាំ២០១៧ ដោយធ្លាប់ថតភាពយន្ដជាច្រើនដូចជារឿង”និស្ស័យ ខ្លុយស្នេហ៍ “,”បេសកម្ម ៤មុខព្រួញ” ,”ជើងកប” ,”រសជាតិអ្នកមាន វគ្គ៣” និងរឿង”កោះធ្លាក់អន្ទាក់ស្នេហ៍ “ជាដើម ដែលភាគច្រើននាងលេងជាតួឯក៕
