ភ្នំពេញ៖ហ៊ិន ច័ន្ទនីរ័ត្ន ត្រូវបានតារារួមអាជីពមួយចំនួនក្នុងនោះមានទាំងរៀមច្បងក្នុងអាជីពសិល្បៈផងបានហៅនាងថា”ជំទាវៗ” នៅពេលដែលនាងបានលេចមុខចូលរួមពិធីបំពាក់គ្រឿងឥស្សរិយយស និងពិសារអាហារសាមគ្គីជាមួយលោកគ្រូ អ្នកគ្រូ សិល្បករ សិល្បការិនី ក្រោមអធិបតីភាពសម្ដេចបវរធិបតីហ៊ុន ម៉ាណែត និងលោកជំទាវកាលពីពេលថ្មីៗនេះ។ប្រភពបានឲ្យដឹងថាច័ន្ទនីរ័ត្ន ពេលនេះគឺពិតជាខុសពីនីរ័ត្ន កាលពីមុនៗមែន ព្រោះនាងមានឥទ្ធិពលខ្លាំងដូចជាតារារួមអាជីពចាប់ផ្ដើមគោរពនាងជាងមុន តាមរយៈកាយវិការ និយាយស្ដីនិងខ្លះបានហៅនាងថាជំទាវ ទៀតផង បើទោះជាគេមិនទាន់ដឹងច្បាស់ពីតួនាទីរបស់ស្វាមីនាងលោកឌី ពេជ្រ ថាមានតួនាទីជាអ្វីក្នុងរដ្ឋាភិបាលក្ដី ។
លោកលី សុខជុន ឪពុករបស់តារាសម្ដែងលី ច័ន្ទសីហា បានផុសរូបជាមួយអតីត Freshie រូបនេះដោយភ្ជាប់សំណេរនិងហៅហ៊ិន ច័ន្ទនីរ័ត្ន ថាជា”ជំទាវ” ជាចំហ និងបានសរសើរពីនាងថាអត់ឆ្មើងឆ្មៃ ឡើយបើទោះជាពេលនេះក្លាយទៅជាក្មួយប្រសារសម្ដេចតេជោហ៊ុន សែន ក្ដី ។លោកសុខជុន ក៍បានប្រាប់អ្នកយកព័តមានយើងតាមទូរស័ព្ទបន្ថែមពីលើខ្លឹមសារដែលលោកបានបង្ហោះនោះថាហ៊ិន ច័ន្ទនីរ័ត្ន ពិតជាសាកសមខ្លាំងក្នុងតំណែងជំទាវនេះ ព្រោះនាងមានប្រជាប្រិយ នៅតែរួសរាយរាក់ទាក់ ជាមួយមិត្តរួមអាជីព ទោះជាពេលនេះមានស្វាមីជាក្មួយសម្ដេចក៍ដោយ ។លោកថានីរ័ត្ន នៅតែមានការរាប់អានក្រុមគ្រួសារលោកដូចដើម តែដោយសារពេលនេះនាងមានឋានៈខ្ពង់ខ្ពស់ ហេតុនេះលោកនិយាយជាមួយនីរ័ត្ន ស្ទើតែមិនចង់ហ៊ានសម្លឹងមើលមុខនាងផង។
មិនមានប្រភពច្បាស់លាស់ថាស្វាមីហ៊ិន ច័ន្ទនីរ័ត្ន មានមុខតំណែងឬតួនាទីអ្វីខ្លះក្នុងជូររាជការនោះទេ ប៉ុន្ដែតាមព័តមានថាលោកឌី ពេជ្រ ដែលត្រូវជាក្មួយសម្ដេចតេជោនោះលោកគឺជាកូនរបស់លោកឌី ចូច ដែលជាប្អូនជីដូនមួយរបស់សម្ដេចតេជោ។លោកឌី ពេជ្រ មានស្រុកកំណើតនៅខេត្តកំពង់ចាម ដែលបានបញ្ចប់ការសិក្សាកម្រិតវិទ្យាល័យ នៅសហរដ្ឋអាមេរិក វិទ្យាល័យWoodrow Wilson ទីក្រុងឡងប៊ិច រដ្ឋកាលីហ្វ័រញ៉ា។ប្រភពបានឲ្យដឹងថានៅឆ្នាំ២០១៣ លោកឌី ពេជ្រ បានទទួលសញ្ញាបត្រផ្នែកវិទ្យាសាស្រ្ដនយោបាយនៅសាកលវិទ្យាល័យរដ្ឋកាលីហ្វ័រញ៉ា សហរដ្ឋអាមេរិក។លោកឌី ពេជ្រ ក៍បានបញ្ចប់វគ្គវិក្រិត្យការមន្រ្ដីជាន់ខ្ពស់ ឯកទេសរដ្ឋបាលទូទៅ នៅសាលាភូមិន្ទដ្ឋបាលរាជធានីភ្នំពេញ ទៀតផង។ប្រភពបានឲ្យដឹងថាបច្ចុប្បន្នស្វាមីរបស់ហ៊ិន ច័ន្ទនីរ័ត្ន គឺជាអ្នកជំនួញម្នាក់ដែលក្ដាប់អាជីវកម្មជាច្រើនក្នុងដៃមានដូចជាផ្សារបឹងបៃតង ,ក្រុមហ៊ុនDDI Concrete និងក្រុមហ៊ុនDDI Company ជាដើម ។ប៉ុន្ដែមិនមានប្រភពច្បាស់ការថាលោកឌី ពេជ្រ មានឋានៈអ្វីក្នុងជូររដ្ឋាភិបាលទេ ។
សម្រាប់ហ៊ិន ច័ន្ទនីរ័ត្ន វិញតាំងពីបានប្ដីជាក្មួយសម្ដេចតេជោ មកពេលនេះខ្សែជីវិតលោកមានការប្រែប្រួលច្រើនក្នុងនោះមានដូចជានាងផ្អាកការសម្ដែងទាំងភាពយន្ដនិងMV ហើយនៅបង្ហាញមុខជាធម្មតាតែអាជីពMC ប៉ុណ្ណោះ ។ច័ន្ទនីរ័ត្ន បានជិះរថយន្ដទំនើបម៉ាក Bentley ទៅធ្វើការ ហើយជាញឹកញាប់នាងនាំស្វាមីចេញទៅដើរកម្សាន្ដនៅក្រៅស្រុកជាបន្ដបន្ទាប់ ខណៈដែលមិត្តភក្ដិដ៍ជិតដិតរបស់នាងគឺស្រីស្រស់មាន សូនីតា បានប្រាប់អ្នកយកព័តមានយើងថានីរ័ត្ន ចង់បានកូននៅឆ្នាំរោង នេះតែម្ដង ហើយរយៈពេលចុងក្រោយនេះគេឃើញនាងស្លៀករ៉ូបរលុងៗទៅចូលរួមមង្គលការមិត្តភក្ដិទើបនាំឲ្យមានការសង្ស័យថានាងអាចកំពុងតែចាញ់កូនទី១ហើយ ។
អ្នកជំនាញសិល្បៈបានលើកឡើងថាហ៊ិន ច័ន្ទនីរ័ត្ន បានក្លាយទៅជាជំទាវមិនមែនជារឿងដែលចម្លែកនោះទេ ព្រោះនាងមានប្ដីជាក្មួយសម្ដេច តែរឿងដែលគួរឲ្យបារម្ភគឺនាងអាចនឹងបោះបង់អាជីពសម្ដែងទាំងស្រុងដូចតារាសម្ដែងនាងគឹម ច័ន្ទបរមី ដែលភ្ជាប់ស្នេហាជាមួយលោកហ៊ុន បញ្ញាបុត្រ ដែលជាចៅរបស់បងប្រុសអតីតនាយករដ្ឋមន្រ្ដី។ប៉ុន្ដែស្វាមីនីរ័ត្ន មិនធ្លាប់បង្ហាញសញ្ញាហួងហែងពិធីការិនីបាយ័នរូបនេះទេ ព្រោះថាពួកគេធ្លាប់ជាសង្សារហើយបែកគ្នាអស់៨ឆ្នាំ ទើបជួបគ្នាម្ដងទៀតដឹកដៃគ្នាចូលរោងការតែម្ដង ហេតុនេះលោកពេជ្រ បានដឹងច្បាស់ពីអាជីពសិល្បៈរបស់ភរិយាលោកដែលបានតស៊ូអស់រយៈពេល១៧ឆ្នាំមកនេះ។
សូមរំលឹកថាលោកហ៊ិន ច័ន្ទនីរ័ត្ន បានដឹកដៃលោកឌី ពេជ្រ រៀបការកាលពីថ្ងៃទី២២ ខែ១២ ឆ្នាំ២០២៣ ហើយពួកគេបានទៅចុះអេតាស៊ីវិល ថ្ងៃទី២២ ខែមីនា ឆ្នាំ២០២៤។តាមប្រភពថានីរត័្ន និងប្ដីចង់បានកូន៣នាក់តាមរយៈការធ្វើតេស្ដឧបករណ៍អេឡិចត្រូនិកដ៍ទំនើបនោះ ៕
