ភ្នំពេញ៖តារាចម្រៀងGalaxy លោកគួម៉ា បានដឹកដៃនាងម៉ៅ គឹមធីតា រៀបការនៅថ្ងៃទី៣ ខែឧសភា ឆ្នាំ២០២៤ ដែលពិធីនោះធ្វើផ្គួបការឡើងផ្ទះវីឡារដែលពួកគេទិញរួមគ្នានៅវីឡា អូ អ៊ិនស៊ី គំរោង១+ ២ ផ្ទះលេខ១០៥ ផ្លូវលេខ០៧ នៅសង្កាត់ស្នោរ ខណ្ឌកំបូល រាជធានីភ្នំពេញ។ប្រភពបានឲ្យដឹងថាលោកគួម៉ា និងនាងធីតា បានចូលលុយគ្នាទិញផ្ទះវីឡារនេះ ហើយក៍សម្រេចចិត្តដឹកដៃគ្នាក្រាបផ្ទឹមនៅថ្ងៃឡើងផ្ទះថ្មីនេះតែម្ដង។គួម៉ា និងនាងធីតា បានហៅតារាសិល្បកររួមអាជីពជាច្រើនចូលរួមថ្ងៃពិសេសរបស់ពួកគេ ហើយចាប់ពីថ្ងៃនេះតទៅអ្នកទាំងពីរក្លាយទៅជាប្ដីប្រពន្ធស្របច្បាប់គ្នាហើយ ។
តារាសម្ដែងនិងបង្ហាញម៉ូដស្រីស្រស់ម៉ៅ គឹមធីតា ធ្លាប់ប្រាប់អ្នកយកព័តមានយើងថាមូលហេតុដែលនាងជ្រើសរើសលោកគួម៉ា ជាសង្សារ ព្រោះតារាចម្រៀងម្នាក់នេះមានសំនៀងផ្អែម ស្ដាប់ទៅធ្វើឲ្យនាងជាប់ចិត្តតែម្ដង ។
សូមបញ្ជាក់ថាតារាចម្រៀងគួម៉ា បានចាប់អាជីពចម្រៀងក្រោយពីរូបគេបានប្រលងជាប់ពីកម្មវិធីមួយនៅទូរទស្សន៍CTN ហើយក៍ឈានចូលផលិតកម្មM ,ថោន និងចុងក្រោយមកទើរនៅផលិតកម្មGalaxy ដែលប្រជុំទៅដោយតារាចម្រៀងប្រុសល្បីៗទើបធ្វើឲ្យគួម៉ា ពិបាកដណ្ដើមភាពលេចធ្លោ។យ៉ាងណា ពេលដែលមនុស្សភាគច្រើនរួមទាំងតារាខ្លះកំពុងជួបវិបត្តិសេដ្ឋកិច្ចនេះគួម៉ា បែជាលោកមានជីវភាពហក់ឡើងរហូតមានលុយដឹកដៃសង្សារទិញផ្ទះវីឡាទ្រនុំស្នេហ៍ និងរៀបការក្នុងពេលតែមួយ។ប្រភពបានឲ្យដឹងថាផ្ទះដែលគួម៉ា និងសង្សារទិញចូលគ្នានោះមានតម្លៃជាង១០ម៉ឺនដុល្លារ ហើយក្នុងនោះទឹកលុយលោកមានចំនួនច្រើនជាងនាងធីតា ។
ក្រៅពីគួម៉ា តារាដែលរៀបការនៅឆ្នាំ២០២៤ នេះមានដូចជាអ្នកនាងលី ម៉ារីណា ,សុវត្ថិឌី ធារិកា និងដួង ម៉ានិច្ច ជាដើមដែលតារាខ្លះស្ងប់ស្ងាត់ពីអាជីពក្រោយមានគូស្នេហ៍ ។សម្រាប់គួម៉ា វិញធ្លាប់លេចធ្លោគូសមពេលជ្រកនៅទ្រនុំM និងត្រូវបានគេស្គាល់ច្បាស់អំឡុងជាតារាថោន តែពេលមកដល់Galaxy នេះលោកមិនអាចប្រជែងជាមួយលោកព្រាប សុវត្ថិ ,ខេម និងខេមរៈ សិរីមន្ដ បានទេ ហេតុនេះអាចនឹងបានត្រឹមជាតួរងដូចគ្នាទៅនិងលោកខាន់ ជេមស៍ ដែរ ប្រសិនបើគ្មានអ្នកនិពន្ធនៅក្រោយខ្នងនោះ។ប៉ុន្ដែតាមព័តមានថាគួម៉ា នៅតែត្រូវបានផលិតកម្មចាស់បើកទ្វាទទួលយកប្រសិនបើលោកមិនជោគជ័យជាមួយGalaxy ដូចការរំពឹងទុកនោះទេ។ចំណែកនាងច័ន្ទធីតា វិញនាងធ្លាប់ប្រាប់ថានៅតែបន្ដអាជីពសម្ដែងជាធម្មតា ព្រោះគួម៉ា មិនចេះប្រចណ្ឌឬហួងហែងនាងទាក់ទងសិល្បៈឡើយ ៕
