អាមេរិក៖ព្រាប សុវត្ថិ ត្រូវបានមិត្តភក្ដិរបស់លោកនៅអាមេរិក ដែលជាអតីតតារាសម្ដែងមានដូចជាលោកសុភា ដេវីត និងហង្ស ឈា ជាដើម បានធ្វើខួបកំណើតឲ្យលោកគម្រប់អាយុ៤៩ឆ្នាំ កាលពីពេលថ្មីៗនេះទើបធ្វើឲ្យលោករីករាយជាខ្លាំង ខណៈដែលភរិយាលោកអ្នកស្រីឡុង ស្រីមុំ និងកូនប្រុសលោកសុវត្ថិ មុនីនាគ ក៍បានជូនពរលោកនៅថ្ងៃពិសេសនេះដែរ។ថ្ងៃខួបឆ្នាំនេះក៍ដូចជាឆ្នាំមុនដែរដែលគេសង្កេតថាលោកព្រាប សុវត្ថិ មិនមាន ការប្រែប្រួលទៅតាមអាយុនោះទេ ពោលគឺនៅតែក្មេងជាងវ័យ បើទោះជាពេលនេះកូនប្រុសទាំង៣របស់លោកពេញកំលោះស្រាងអស់ទៅហើយក្ដី ។ប្រភពបានឲ្យដឹងថាអំឡុងពេលនៅស្រុកខ្មែរលោកសុវត្ថិ តែងតែត្រូវបានភរិយា និងកូនៗរបស់លោកធ្វើខួបឲ្យជារៀងរាល់ឆ្នាំ តែពិធីនោះមិនធំដុំទេ ពោលគឺគ្រាន់តែលើកនេះខេកទៅSurprise លោកនៅដីចំការក្រោមដើមត្នោត ឬនៅហាងបាយរបស់លោកជាដើម ។ដោយឡែកក្រុមហ៊ុនដែលលោកទទួលធ្វើជាBA ឲ្យនោះក៍តែងតែយកនេះខេកទៅជូនលោកដល់ផ្ទះដែរ ប៉ុន្ដែគ្មានការជប់លៀងទ្រង់ទ្រាយធំហៅតារារាប់រយនាក់ចូលរួមដូចតារាផ្សេងៗទៀតឡើយ ។
គួររំលឹកថាព្រាប សុវត្ថិ កើតនៅថ្ងៃទី២៥ ខែឧសភា ឆ្នាំ១៩៧៥ និងបានរៀបការជាមួយអ្នកស្រីឡុង ស្រីមុំ នៅឆ្នាំ១៩៩៧ មានកូនប្រុស៣នាក់គឺកូនទី២៖សុវត្ថិ មុនីនាថ ,ទី២៖សុវត្ថិ មុនីនាគ និងទី៣៖សុវត្ថិ សិរីវុឌ្ឍ ។កាលពីថ្ងៃទី១២ ឧសភា ព្រាប សុវត្ថិ បានដឹកដៃភរិយានិងកូនទី២ ទៅអាមេរិក ដែលលើកនេះក៍ដូចជាលើកមុនៗដែរពោលគឺទៅច្រៀងសម្ដែងផង និងឆ្លៀតដើរកម្សាន្ដនៅតំបន់ទេសចរណ៍ជាច្រើននៅអាមេរិក។ដោយឡែកទាក់ទងការច្រៀងសម្ដែងនៅក្រៅស្រុករបស់លោកសុវត្ថិ នេះដែរតាមព័តមានថាលោកនៅតែមានអ្នកគាំទ្រច្រើន ព្រោះលោកសុវត្ថិ ច្រៀងបទមរតកដើមបានយ៉ាងពិរោះ ហេតុនេះទោះជាតារាGalaxy រូបនេះធ្លាប់ត្រូវបានអ្នកគាំទ្រខ្លះព្រមានធ្វើពហិកា លែងស្ដាប់ចម្រៀងរបស់លោកចំនួន៣លើកមកហើយពោលគឺ តាំងពីក្រោយលោកទទួលបានដីចំនួន៣ហិកតា តាមអនុក្រឹត្យ ដែលចុះហត្ថលេខាដោយអតីតនាយករដ្ឋមន្រ្ដីហ៊ុន សែន កាលពីថ្ងៃទី១៣ មេសា ឆ្នាំ២០២២ ដោយលោកព្រាប សុវត្ថិ ទទួលបានដីបឹងតាមោក ក្នុងខណ្ឌព្រែកព្នៅចំនួន៣ហិកតា នាំឲ្យក្រុមស្រលាញ់បរិស្ថាន ,ក្រុមពលករនៅកូរ៉េ និងអ្នករស់នៅអូស្រា្ដលី ប្រកាសធ្វើពហិកា លែងស្ដាប់បទចម្រៀងលោកក្ដី ប៉ុន្ដែគេឃើញថាចំនួនអ្នកមិនចូលចិត្តអតីតតារាហង្សមាសរូបនេះនៅតែមានតិចជាងអ្នកនិយមស្ដាប់បទលោកនៅឡើយ បើទោះជាតាំងពីលោកដើរចេញពីហង្សមាសកាលពីខែសីហា ឆ្នាំ២០២០ ទៅជ្រកនៅGalaxy ជាង៣ឆ្នាំមកនេះលោកមិនទាន់ធ្វើព្យុះភ្លៀងទីផ្សារចម្រៀងដូចមុនក៍ដោយ។អ្នកជំនាញសិល្បៈបានលើកឡើងថាព្រាប សុវត្ថិ ពេលនេះទោះជាវ័យជ្រេបន្ដិចមែន ប៉ុន្ដែលោកនៅតែមិនទាន់ដល់វ័យចូលនីវត្តន៍ទេ ព្រោះរូបសម្រស់និងសម្លេងមិនទាន់ប្រែប្រួលខ្លាំង។ តែការយកកូនទី១និងទី៣ ច្រៀងអមលោកនៅGalaxy នោះបង្ហាញសញ្ញាថាលោកសុវត្ថិ កំពុងតែចង់ឲ្យកូនប្រុសស្នងមរតករបស់ខ្លួននាពេលអនាគត ហើយបើទោះជាលោកត្រូវអស់កុងត្រាជាមួយផលិតកម្មនេះនៅខែសីហា ឆ្នាំ២០២៥ មែន ប៉ុន្ដែគេព្យាករណ៍ថាលោកនឹងមិនរត់ចោលផលិតកម្មនេះឡើយ ហើយអាចឈានទៅចុះកុងត្រាថ្មី ព្រោះបើចោលGalaxy ស្មើនិងចោលកូនៗរបស់លោកដែរ ។
ទោះជាយ៉ាងណាគិតមកដល់ពាក់កណ្ដាលឆ្នាំ២០២៤ នេះព្រាប សុវត្ថិ នៅតែផ្អឹបកូនទី២របស់លោកសុវត្ថិ មុនីនាគ ដដែល ក្រោយពីរូបគេដើរបានផុតកុងត្រានៅហង្សមាស បើទោះជាកូនលោកម្នាក់នេះត្រូវបានពេជ្រ សោ ភា ហ៊ានសន្និដ្ឋានថាអាចនឹងជំនួសតំណែងលោកបាននាពេលដែលលោកលែងច្រៀងក៍ដោយ។ប៉ុន្ដែជុំវិញការទាញយកកូនប្រុស២នាក់ទៅច្រៀងជាមួយខ្លួនតែទុកជើងកូន១នេះត្រូវបានលោកនូ ស៊ឹប អះអាងថាដោយ សារតែលោកសុវត្ថិ ចង់រក្សារតម្លៃខ្លួនរបស់កូនប្រុសលោក។អតីតតារាហង្សមាសរូបនេះថាព្រាប សុវត្ថិ អាយុប៉ុណ្ណឹងនៅតែច្រៀងបាន ព្រោះអាជីពចម្រៀងសំខាន់បំផុតគឺនៅលើសុខភាព ហើយតាមការសង្កេតរបស់លោកព្រាប សុវត្ថិ មានសម្លេងមិនទាន់ធ្លាក់ចុះទេ ។ប៉ុន្ដែលោកនូ ស៊ឹប សង្កត់ថា”រលកក្រោយ ច្រានរលកមុន “ហេតុនេះបើលោកសុវត្ថិ នៅតែគ្មានអ្វីថ្មីលេចធ្លោនៅផលិតកម្មថ្មីនេះទេ នោះខេមរៈ សិរីមន្ដ ដែលមានអាយុក្មេងជាងនឹងមានប្រៀបជាងហើយ ៕
