ភ្នំពេញ៖តារាកូន១នាងទេព បូព្រឹក្ស បានសម្ពោធបទចម្រៀងថ្មីរបស់ខ្លួន”ទេវរាជ” កាលពីថ្ងៃទី ២៦ឧសភា ដែលនេះជាការចង់ធ្វើឲ្យទីផ្សារចម្រៀងរបស់ខ្លួនស្ទុះឡើងវិញ ក្រោយសម្រាលកូនជាង១៥ខែ ។ពិតណាស់ស្វាមីបូព្រឹក្ស លោកងួន ចាន់ដេវីត ជាអ្នកឈរនៅពីក្រោយនៃការធ្វើបទថ្មីមួយនេះ ដើម្បីពង្រឹងទីផ្សារចម្រៀងភរិយារបស់លោកជាថ្មី បន្ទាប់ពីបូព្រឹក្ស ហៅស្រីនិច្ច វិលរកឆាកតន្រ្ដីបាន៩ខែ ដែលគេអាចនិយាយបានថាអតីតតារាហង្សមាសរូបនេះអាចនៅតែល្បីឬអត់គឺនៅលើកណ្ដាប់ដៃរបស់លោកដេវីត ។
លោកខាំ ភូរិ អតីតអ្នកនិពន្ធនិងដឹកនាំរឿងរបស់ហង្សមាស និងបច្ចុប្បន្នជាអ្នកគ្រប់គ្រងផលិតកម្មAKASA MUSIC ក្រោយបានឃើញMV របស់បូព្រឹក្ស បទ”ទេវរាជ “លោកបានថ្លែងថា”សូមសរសើរ យុវវនជំនាន់ក្រោយអស់ពីចិត្ត”។ដោយឡែកលោកម៉ៃ សុគន្ធ ដែលគេដឹងថាលោកជាFan របស់លោកវណ្ណដា នោះបន្ទាប់ពីបានទស្សនាវីដេអូបទ”ទេវរាជ “របស់បូព្រឹក្ស នោះលោកបញ្ចេញមតិថា”ពិតជាទេវរាជ មែននាគហើរពេញ ស្លាយអ្នកចូលរួម រកតែទឹកសុទ្ធ១ដបមិនបាន ហែងស្រេកទឹក តាមតែម៉ែហែងទៅ ទៅផឹកទឹកណាផឹកទៅ ព្រោះនាគកំពុងហោះ។Ach នៅតែជា Ach ណាទឹកសុទ្ធ អោយអ្នកចូលរួម “។
ការលើកឡើងរបស់លោកម៉ៃ សុគន្ធ បែបនេះត្រូវFan របស់លោកងួន ចាន់ដេវីត និងទេព បូព្រឹក្ស ប្រតិកម្ម ដែលខុសពីការបញ្ចេញមតិរបស់លោកខាំ ភូរិ ត្រូវអ្នកគាំទ្រប្ដីប្រពន្ធតារារ៉េប១គូនេះពេញចិត្ត។ទោះជាយ៉ាងណានេះជាលើកទី១ហើយដែលគេឃើញMV របស់តារាចម្រៀងមានការបើកសម្ពោធទ្រង់ទ្រាយធំបែបនេះ ខណៈដែលកន្លងមកគេធ្លាប់ដឹងថាមានតែភាពយន្ដដុំ និងរឿងភាគទេ ដែលគេធ្វើពិធីបើកការសម្ពោធ ។ប៉ុន្ដែអ្វីដែលមហាជនកំពុងតែតាមដានរងចាំមើលនោះថាតើទេព បូព្រឹក្ស ពិតជាអាចស្ទុះឡើងវិញឬយ៉ាងណាក្រោយមានប្ដីនិងកូន១ ?ការលើកឡើងបែបនេះដោយសារតែតារាស្រីស្ទើតែទាំងអស់ទៅហើយឲ្យតែមានប្ដីនិងកូនពួកគេមិនអាចរក្សារទីផ្សារសិល្បៈឲ្យនៅខ្លាំងក្លាដូចកាលនៅលីវទៀតបានទេ ហេតុនេះបើបូព្រឹក្ស ត្រូវប្ដីជួយឲ្យឡើងកូដបានមែននោះអាចជាប់កំណត់ត្រាថ្មីថាមានតែនាងម្នាក់ប៉ុណ្ណោះដែលទោះជាមានកូនមុនរៀបការមែន តែនាងនៅតែមានហាងឆេង។
ទេព បូព្រឹក្ស បានបង្កាត់ភ្លើងស្នេហាជាមួយលោកងួន ចាន់ដេវីត ជិត១០ឆ្នាំមកហើយដែលពេលនេះពួកគេតែងតែបង្ហាញភាពហ៊ឺហាដូចជារស់នៅផ្ទះវីឡារប្រណិតនិងជិះរថយន្ដទំនើបម៉ាកLamborghini Aventador តម្លៃរាប់សិបម៉ឺនដុល្លារ និងជះលុយដុល្លារទាំងបាច់ផលិតMV ។យ៉ាងណាបូព្រឹក្ស -ដេវីត នៅមិនទាន់ប្រកាសថ្ងៃរៀបការនោះទេ ខណៈដែលក្នុងជំនួបជាមួយអ្នកកាសែតស្រីនិច្ច ធ្លាប់និយាយថារឿងខ្លះនាងប្រាប់បាន រឿងខ្លះទៀតមិនអាចនិយាយបានឡើយ ។ការវាចាបែបនេះនាំឲ្យគេសង្ស័យថាស្រីនិច្ច អាចធ្វើពិធីរៀបការជាមួយលោកដេវីត ឬចុះអេតាស៊ីវិលស្ងាត់ៗជាមួយគ្នាទៅហើយមុនយកកូន ខណៈដែលកាលពីឆ្នាំ២០១៩ ពួកគេបានបណ្ដើរគ្នាទៅថតPre-Wedding នៅកោះម៉ាល់ឌីវ នឹងគ្រោងរៀបការជាមួយគ្នា ប៉ុន្ដែជាង៥ឆ្នាំមកនេះបែជាដំណឹងនេះបានស្ងប់ស្ងាត់ទៅវិញ ។
តាមប្រភពថាទេ បូព្រឹក្ស និងត្រូវស្វាមីនាងលោកដេវីត រៀបចំឲ្យឡើងឆាកជាដៃគូជាមួយលោកឲ្យបានញឹកញាប់ជាងនេះ បន្ថែមពីលើMV ដើម្បីឲ្យនាងមានសកម្មភាពកាន់តែច្រើន ។ប៉ុន្ដែសម្រាប់ទីផ្សារតារាចម្រៀងរ៉េប នៅឆ្នាំ២០២៤ នេះអ្នកណានឹងនាំមុខគេនោះគេមិនទាន់អាចសន្និដ្ឋានបានឡើយ តែនៅខែ១២ ឆ្នាំ២០២៤ នោះទើបអាចមើលឃើញច្បាស់។
សូមបញ្ជាក់ថាទេព បូព្រឹក្ស ត្រូវបានគេសង្ស័យថានាងមានកូន២មិនមែន១នោះទេ ដោយសារតែក្មេងប្រុសម្នាក់ដែលមានអាយុជាង៥ឆ្នាំនិងដើរតាមនាងហៅនាងថា”ម៉ាក់ៗ”នោះជាកូនទី១របស់នាងដូចគេសង្ស័យមែនឬយ៉ាងណានោះនាងមិនដែលចេញមុខបកស្រាយឡើយ ។ដោយឡែកក្រៅពីទេព បូព្រឹក្ស -ងួន ចាន់ដេវីត តារាចម្រៀងដែលអាចច្រៀងចង្វាក់រ៉េបនៅឆ្នាំ២០២៤ នេះមានដូចជាលោកវណ្ណដា ,ព្រាប សុវត្ថិ ,ខេមរៈ សិរីមន្ដ ,សុវត្ថិ មុនីវណ្ណ,ទេព ពិសិដ្ឋ,ឡេង តារា(ខ្មែរមួយជីវិត ),ចាន់ សុបញ្ញា,MC Sey ,ពេជ្រ សោភា ,សួស វីសា ,កែវ ច័ន្ទដាលីន និងឈីន រតនៈ ជាដើម ៕
