ភ្នំពេញ៖កែវ សុបញ្ញា មានស្វាមីជាង៦ខែមកហើយ តែពេលនេះនាងមិនទាន់ពពោះកូនដំបូងតាមបំណងប្រាថ្នានោះទេ ខណៈដែលក្រោយរៀបការភ្លាមៗនាងបានប្រាប់អ្នកយកព័តមានយើងថានឹងយកកូននៅឆ្នាំរោង នេះឲ្យខាងតែបាន ប៉ុន្ដែឥឡូវបែជាមិនទាន់ធំក្លិនកូនង៉ាទៅវិញ ។ទោះជាយ៉ាងណាតារាហង្សមាសរូបនេះថាបច្ចុប្បន្ននាងកំពុងតែចាំអ៊ុតលទ្ធផលលើកទី២ តែមិនធានា១០០ % ថាត្រូវតែបានទេ បន្ទាប់ពីខកចិត្តលទ្ធផលលើកទី១។
កែវ សុបញ្ញា ប្រាប់តាមទូរស័ព្ទកាលពីរសៀលថ្ងៃទី៨ កក្កដា ថាការំពឹងវគ្គទី១ ត្រូវបរាជ័យទៅហើយ ហេតុនេះទាំងរូបនាងនិងស្វាមីរងចាំអ៊ុតវគ្គទី២ ម្ដងទៀតក្រែងបានលទ្ធផលល្អ ។តារាចម្រៀងរូបស្រស់និងពូកែវោហាស័ព្ទចឬករួសរាយរូបនេះនិយាយទាំងសំណើចថា”ស្វាមីខ្ញុំគាត់រវល់ណាស់ ព្រឹកចេញបាត់ ព្រលប់មកផ្ទះ ក៍ទៅវិញបាត់ យប់ជ្រៅបានមកវិញ អីចឹងហើយបានជាមិនបានកូនលឿនដូចចិត្តហ្នឹង”។
កែវ សុបញ្ញា ថាជីវិតនាងក្រោយមានស្វាមីជាងកន្លះឆ្នាំនេះមានការប្រែប្រួលច្រើនដូចជាពីមុនចូលចិត្តទិញអ៊ឺវ៉ាន់ ម៉ាកប្រេន ប្រេន តែឥឡូវមុននឹងទិញអ្វីមួយគិតណាស់ ព្រោះចង់គ្រងគ្រងការចំណាយ ប្រយ័ត្នប្រយ៉ែងរឿងហិរញ្ញវត្ថុ ហើយនាងក៍ចាស់ទុំជាងមុនច្រើនដែរ ដើម្បីសាងអនាគតដ៍ល្អមួយតាមបំណង។ចំណុចមួយទៀតបញ្ញា ថាពីមុននាងទៅណាតែម្នាក់ៗឯងឥឡូវទៅណាបណ្ដើរប្ដី តែស្វាមីនាងជានុស្សរវល់ខ្លាំងណាស់ គឺជួបនាងតែនៅពេលយប់ ទំនេរពីការងាររាជការប៉ុណ្ណោះ ។
ឆ្លើយតបសំណួរថាតើកែវ សុបញ្ញា មានការបារម្ភចំពោះទីផ្សារចម្រៀងទេ ព្រោះតារាល្បីៗឲ្យតែមានស្វាមីនិងកូនរួច លែងខ្លាំងដូចកាលនៅលីវនោះនាងថាសម្រាប់រូបនាងនៅបន្ដការងារសិល្បៈផង និងរកស៊ីមុខរបរក្រៅសិល្បៈផងដូចជាពេលនេះនាងបើកហាងកាត់ដេរ ច្នៃម៉ូដសម្លៀកបំពាក់ឲ្យទាំងតារានិងអតិថិជនទូទៅ បន្ទាប់ពីនាងបានបិទហាងCS Beer នៅក្រុងតាខ្មៅ ព្រោះតែចុងក្រោយនេះតំណើរការអត់សូវរលូន ដោយសារតែវិបត្តិសេដ្ឋកិច្ច ។សុបបញ្ញា ថាក្រោយរៀបការរួចស្វាមីក៍ចង់ឲ្យនាងផ្អាកថតសម្ដែងភាពយន្ដដែរ តែដោយសារតែរូបនាងមានហេតុផលច្បាស់លាស់ ព្រោះតែស្រលាញ់សិល្បៈទើបប្ដីឲ្យបន្ដថតដូចដើម ហើយពេលនេះនាងកំពុងតែថតរឿងថ្មីមួយទៀតផងដែរ បន្ទាប់ពីបានថតភាពយន្ដភាគឲ្យហង្សមាសជាបន្ដបន្ទាប់។
កែវ សុបញ្ញា ក៍ដូចជាតារាល្បីៗមួយចំនួនទៀតដែរ ពោលគឺក្រោយមានស្វាមីរួចមិនពឹងលើអាជីពសិល្បៈទាំងស្រុងទេ គឺត្រូវតែមានមុខរបរខាងក្រៅបន្ថែមពីលើអាជីពចាស់ ហើយនាងក៍ដូចសុគន្ធ និសា ដែរដែលត្រូវស្វាមីយល់ព្រមឲ្យថតសម្ដែងរឿងតាមចិត្តចង់។
គួររំលឹកថាកែវ សុបញ្ញា ជាអតីតបេក្ខភាពThe Voice Cambodia រដូវកាលទី១ ហើយនាងបានដឹកដៃលោកប៉ាល់ ប៉ោស៊ាង ជាមន្រ្ដីកងរាជអាវុធហត្ថ រៀបការកាលពីថ្ងៃទី១៣ ខែមករា ឆ្នាំ២០២៤ ក្រោយលោកប៉ោស៊ាង តាមស្រលាញ់នាងអស់រយពេល១៥ឆ្នាំ ។ក្រៅពីអាចច្រៀងបទមរតកដើមក៍បាន សម័យក៍បាននោះសុបញ្ញា មានទេពកោសល្យសម្ដែងភាពយន្ដមិនចាញ់តារារួមអាជីពឡើយ ទើបធ្វើឲ្យហង្សមាសផ្ដល់ឱកាសកាសឲ្យនាងថតសម្ដែងជាច្រើនរឿងមកហើយ។សុបញ្ញា ជាតារាដែលមានស្វាមីជាមន្រ្ដីយោធាមានដូចជានាងគង់ ច័ន្ទរដ្ឋា ,កុល ដាវី,ស៊ឹម សូលិកា ,និងកែវ ពិសី ជាដើម ។
Fan ចាំមើលថាតើនៅឆ្នាំ២០២៤ កែវ សុបញ្ញា នឹងជោគជ័យរឿងយកកូននៅលើកទី២ នេះដែរ ឬអត់ ?
