ភ្នំពេញ៖ពិធីការិនីជីមមី បានបង្ហាញអារម្មណ៍ភ្ញាក់ផ្អើលជាខ្លាំងនូវពេលដែលឃើញវីដេអូរៀបការដែលនាងផុសព្រាលៗរយៈពេលខ្លីសោះត្រឹមតែមួយម៉ោងនាងថាមានអ្នកចូលទស្សនាលើហ្វេសបុកនាងដល់ទៅ៨០ម៉ឺននាក់(800k)។នាងថាមិននឹកស្មានថាមង្គលការដ៍សែនសាមញ្ញរបស់នាងមានអ្នកគាំទ្រច្រើនដល់ម្លឹងឡើយ ។
ការចេញមុខអរគុណដល់អ្នកគាំទ្រលាយឡំភាពភ្ញាក់ផ្អើលនេះរបស់អ្នកនាងម៉េង ឃុននី ហៅជីមមី ម៉េង នេះគឺជាការសារភាពលើកដំបូងថានាងពិតជាបានរៀបការជាមួយពិធីករលោកនូ ចំណាប់ ហៅជីមមី កាលពីថ្ងៃទី១៨ ខែកក្កដា ឆ្នាំ២០២៤ ពិតប្រាកដមែន បើទោះជាក្រោយមង្គលការរយៈពេល៥ថ្ងៃនេះនាងនិងគូស្នេហ៍បានលាក់ជិត ពោលគឺគ្មា្មនការបញ្ចេញរូបថតមង្គលការនោះជាសាធារណៈគ្រប់ប្រភេទពិធីដូចតារាផ្សេងៗទៀតក្ដី ប៉ុន្ដែអ្នកទាំងពីរពិតជាបានរៀបមង្គលការទៅតាមប្រពៃណីខ្មែរជាលក្ខណៈគ្រួសារមែន ។ដោយឡែកតារារួមអាជីពដែលស្និតតារាគូស្នេហ៍តារា១គូនេះ ក៍មិនត្រូវបាននាងជីមមី និងស្វាមីអញ្ជើញឲ្យចូលរួមដែរ ពោលគឺរៀបការជាលក្ខណៈគ្រួសារសុទ្ធសាធ។អ្វីដែលគួរឲ្យកត់សម្គាល់ក្រោយជីមមី រៀបការប្ដីបានតែ១ថ្ងៃប៉ុណ្ណោះ ពោលគឺនៅថ្ងៃទី១៩ ខែកក្កដា នាងបានបញ្ចេញសារទម្លាយរឿងបុគ្គលិកនាងខ្លះស៊ីបាយបោកឆ្នាំង ព្រោះស៊ីបាយ បើកលុយ ពីនាង តែបែជាប្រឹងនិយាយអាក្រក់ឲ្យគេស្អប់ពីនាងហើយ បែជាមកសុំទោសនាងទៅវិញ ។យ៉ាងណាជីមមី ដែលកំពុងក្តៅចិត្តព្រោះមានកូនចៅមិនស្មោះត្រង់នោះនាងមិនបង្ហាញឈ្មោះនិងមុខបុគ្គលិកដែលក្បត់នាងជាសាធារណៈឡើយ ។
គួររំលឹកថាជីមមី បានទម្លាយរឿងមានស្នេហាជាមួយពិធីករលោកជីមមី កាលពីខែកញ្ញា ឆ្នាំ២០២០ បន្ទាប់ពីនាងបានលួចស្រលាញ់ពិធីករជាអាណិកជនខ្មែរមកពីអាមេរិករូបនេះពេលថតMV ជាមួយគ្នានៅហង្សមាស និងក្រោយមកបានរួមការងារជាមួយគ្នានៅPnn ។មង្គលការរបស់តារាដែលមានឈ្មោះដូចគ្នាធ្វើដោយមិនបើកចំហ ដូចតារាផ្សេងៗទៀតនោះត្រូវបានគេសន្និដ្ឋានថានាងឃុននី ចង់ទុកផ្លូវក្រោយលេងសិល្បៈ ព្រោះបើកនាងចង់ធ្វើពិធីជប់លៀងធំ ហៅតារារាប់រយនាក់ឲ្យចូលរួមនោះប្រាកដជាអាចធ្វើទៅបានដោយងាយ ព្រោះតែទាំងរូបនាងនិងគូស្នេហ៍សុទ្ធតែមានជីវភាពធូធារដូចគ្នា ។ប៉ុន្ដែដោយសារតែតារាភាគច្រើនរៀបការប្ដីរួចពិបាកស្ដារកេរ្ដិ៍ឈ្មោះទើបធ្វើឲ្យជីមមី និងគូស្នេហ៍ជ្រើសផ្លូវរៀបការដោយស្ងាត់ៗបែបនេះ ។
សូមបញ្ជាក់ថាជីមមី ធ្លាប់ជាអតីតពិធីការិនីលេចធ្លោជាងគេនៅPnn តែក្រោយមកនាងនាងផ្លាស់មកចូលMytv លែងសូវត្រដែតដូចមុន។ជីមមី ដែលគេចំណាំនាងច្បាស់តាមរយៈការសម្ដែងបទMV របស់លោកឆាយ វីរៈយុទ្ធ “ជើងស្រឡូន “ដែលភរិយាតារាចម្រៀងរូបនេះនិពន្ធឡើងតម្រូវតាមរូបរាងនាងជាតួអង្គនោះ ពេលនេះនាងមិនសូវមានសកម្មភាពសិល្បៈច្រើនដូចមុនទៀតទេ ប៉ុន្ដែនាងចាយពេលទៅលើការរកស៊ីផ្នែកCosmetic ច្រើនជាងសិល្បៈ។ពិធីការិនីខ្ពស់ស្រឡះជើងស្រឡូនរូបនេះចេះនិយាយដល់ទៅ៤ភាសារគឺខ្មែរ,ថៃ ,ចិន និងអង់គ្លេស ខណៈដែលគូស្នេហ៍នាងនិយាយភាសារអង់គ្លេស ច្រើនជាងខ្មែរ ទើបពេលខ្លះគេឃើញ ខាងក្រុមហ៊ុនAgency ហៅគូស្នេហ៍តារា១គូនេះធ្វើជាMC ដៃគូឆ្លងឆ្លយគ្នាតែម្ដង ដូចគ្នាទៅនិងអ្នកនាងគង់ សុជាតិ និងលោកជា វិបុល ដែរ ។
ក្រៅពីជីមមី តារាដែលរៀបការនៅឆ្នាំ២០២៤ មានដូចជាអ្នកនាងលី ម៉ារីណា ,សុវត្ថិឌី ធារិកា និងគួម៉ា ជាដើម ។ប្រភពបានឲ្យដឹងថាជីមមី នឹងរៀបគម្រោងយកកូនឆាប់ៗ ហើយក្រោយក្លាយទៅជាភរិយាលោកជីមមី ស្របច្បាប់នេះនាងនឹងចុះឡើងទៅអាមេរិកដើម្បីទៅលេងក្រុមគ្រួសារខាងប្ដីច្រើនជាងមុន ៕
