ភ្នំពេញ៖តារាសម្ដែងវ័យក្មេងអាង សុជាតា ហៅឈូឈូ បានប្រាប់”នគរធំ “តាមទូរស័ព្ទកាលពីពេលថ្មីៗនេះថាគិតមកដល់ឆ្នាំ២០២៤ នេះនាងបានថតភាពយន្ដសរុបទាំងអស់ខ្ទង់ពី៤០ទៅ៥០ រឿងមកហើយ ។ឈូឈូ រៀបរាប់ថានាងបានចាប់ផ្ដើមថតរឿងតាំងពីអាយុ៦-៧ឆ្នាំ ម្លេះ ប៉ុន្ដែនៅអាយុ១៣ឆ្នាំ នាងផ្អាកមួយរយៈ ហើយក្រោយមកក៍បានថតសកម្មឡើងវិញរហូតមកដល់បច្ចុប្បន្ន ។នាងថាទេពកោសល្យ បូករួមទាំងការមានម្ដាយគាំទ្រ បណ្ដុះបណ្ដាលនៅក្រោយខ្នងទើបធ្វើឲ្យនាងឈានទៅសម្ដែងភាពយន្ដដោយរលូនជាច្រើនឆ្នាំមកនេះដោយគ្មានឧបស័គ្គ។សម្រាប់ឆ្នាំ២០២៤ នេះនាងបានថតរឿងឲ្យហង្សមាស៤រឿងជាតួឯក៣រឿងគឺ”បងធ័ម “,”កញ្ញាម្ទេសខ្មាំង”,”សិស្សកូន១ “និងរឿងដែលមានតួអង្គ៣គូ “ក្រាសតា សង្សារកូន “ដែលសុទ្ធជារឿងភាគទាំងអស់ ។ដោយឡែកសម្រាប់រឿងដុំវិញនាងថាបានថតបញ្ចប់រឿង”ព្រាយ កូនភ្លោះ “ឲ្យផលិតកម្មមួយ តែមិនទាន់ដាក់បញ្ចាំង។
ឆ្លើយតបសំណួរថាតើសុជាតា បានធ្វើតួឯកជាបន្ដបន្ទាប់ឲ្យផលិតកម្មហង្សមាសក្នុងភាពយន្ដភាគនោះដោយសារតែកញ្ញាមានខ្សែនៅហង្សមាស ឬយ៉ាងណានោះស្រីក្មេងរូបនេះថានាងអត់មានខ្សែទុយោអ្វីទាំងអស់ តែមកពីទេពកោសល្យផង ការគោរពពេលវេលាផងទើបនាំឲ្យខាងDirector ផ្ដល់ទំនុកចិត្តលើនាងបែបនេះ។នាងបន្ថែមថាមានការបែងចែកពេលវេលាច្បាស់លាស់ពីការថតភាពយន្ដ និងការសិក្សារនៅមហាវិទ្យាល័យមួយ ហេតុនេះហើយបានជានាងចាប់អាជីពសិល្បៈ និងការសិក្សារទន្ទឹមគ្នាបាន ព្រោះសម័យនេះអាចរៀនតាមOnline ក៍បានដែរ ។
ឈូឈូ ជាកូនស្រីសំណព្វចិត្តរបស់តារាសម្ដែងសឿនផាន ផាផួង ដែលកាលពីនាងមានអាយុ១៧ឆ្នាំ សុជាតា ទទួលបានកាដូពីម្ដាយជារថយន្ដទំនើបមួយគ្រឿងម៉ាកMG HS 2021តម្លៃជាង៤ម៉ឺនដុល្លារផងដែរជាការលើកទឹកចិត្តដល់នាងក្នុងការប្រឹងធ្វើការសិល្បៈដែលលោកស្រីផាផួង ពេញចិត្តស្នាដៃនាង ។ឈូឈូ ដែលឆ្នាំនេះមានវ័យ២០ឆ្នាំ នោះថានាងពេញចិត្តចំពោះការងារសិល្បៈរបស់នាងសព្វថ្ងៃនេះ ប៉ុន្ដែទាក់ទងការថតរឿងវិញនាងមិនចេះតែសម្ដែងគ្រប់រឿងនោះទេ ពោលគឺបើរឿងនោះមានឈុតស្នេហាឬស៊ិចស៊ីខ្លាំង នោះនាងក៍មិនទទួលថតដែរ ខណៈដែលម្ដាយនាងក៍មិនអនុញ្ញាតិ្ដឲ្យនាងសម្ដែងឈុតទាំងនោះដែរ ។
ឈូឈូ ថាក្រៅពីមមាញឹកការថតភាពយន្ដ នាងក៍ត្រូវធ្វើរឿងចាំបាច់មួយទៀតដែរនោះគឺព្យាយាមសម្រកទម្ងន់ពី៤៨ គ.ក្រ មកត្រឹម៤៥ គ.ក្រ ដែលជាគីឡូមួយនាងស្រលាញ់។ទាក់ទងរឿងស្នេហាវិញសុជាតា ដែលធ្លាប់តែស្និតស្នាលជាមួយម្ចាស់ពានThe Voice Kids Cambodia រដូវកាលទី២ លោកទេព ពិសិដ្ឋ រហូតមានគេសង្ស័យថាពួកគេជាគូសង្សារនិងគ្នានោះវាចាថាតាមពិតទំនាក់ទំនងនោះគឺគ្រាន់តែធម្មតាៗប៉ុណ្ណោះ អត់មានអ្វីលើសពីមិត្តរួមអាជីពឡើយ ។ឈូឈូ បន្ថែមថារយៈពេលចុងក្រោយនេះនាងនិងពិសិដ្ឋ ក៍មិនបានថតMV ជាមួយគ្នាដែរ ព្រោះនាងចេញថតរឿងច្រើនជាងខារ៉ាអូ នៅដើមឆ្នាំ២០២៤ នេះ។
ឈូឈូ ស្ថិតក្នុងចំណោមតារាវ័យក្មេងដែលកំពុងតែដើតាមគន្លងរបស់ម្ដាយខ្លួន ហើយនាងមានឱកាសច្រើនទៀតដើម្បីសាងកេរ្ដិ៍ឈ្មោះក្នុងសិល្បៈឲ្យកាន់តែល្បីថែមទៀត។យ៉ាងណាគេចាំមើលថាតើស្រីក្មេងរូបនេះនាង នឹងជ្រើសរើសគូស្នេហ៍ជាតារាដូចគ្នា ឬបុរសក្រៅរង្វង់សិល្បៈ ?
