ភ្នំពេញ៖អ្នកមេម៉ាយរូបស្រស់សុខ ស្រីនាង បានបាត់មុខពីលើឆាកតន្រ្ដីជាង៣ឆ្នាំមកហើយ ពោលគឺតាំងពីអំឡុងផ្ទុះកូវីដម្លេះ ខណៈដែលនៅលើបណ្ដាញសង្គមនាងផ្ដាច់ខ្លួន១ឆ្នាំគត់ពោលគឺតាំងពីចុងខែមេសា ឆ្នាំ២០២៣ ហើយចេញមុខម្ដងចុងខែមេសា ឆ្នាំ២០២៤ ក្នុងពិធីមង្គលការប្អូនប្រុសរបស់នាង ហើយក៍បាត់ខ្លួនទៅវិញឈឹងម្ដងទៀត។យ៉ាងណាដោយសារតែមានពាក្យចចាមអារ៉ាម ជុំវិញការសង្ស័យថាស្រីនាង លាក់ខ្លួនព្រោះមានប្ដី ឬខ្លះសង្ស័យថានាងមានកូន និងខ្លះខ្សឹបខ្សៀវគ្នាថានាងត្រូវគូស្នេហ៍ហួងហែងនោះទើបម្ដងនេះលាក់មុខបានតែ៣ខែគត់ ពោលគឺនៅចុងខែកក្កដា ឆ្នាំ២០២៤ នាងក៍បានបង្ហាញខ្លួនសារជាថ្មីតាមរយៈការប្រើជីវិតជានាទីម្នាក់សាមញ្ញដើរលេងនៅសួនបុរីប៉េង ហួត បឹងស្នោ ហើយតាមព័តមានថានាងក៍មានផ្ទះរស់នៅបុរីមួយនេះផងដែរ ។ស្រីនាង មានអ្នកបើករថយន្ដជូន ហើយការចេញមុខមកម្ដងទៀតនៅលើបណ្ដាញសង្គមរបស់ស្រីនាង លើកនេះសំខាន់ជាងរាល់ដង ព្រោះអាចជម្រះការសង្ស័យទាំងឡាយដែលថានាងលែងចេញមុខ ព្រោះមានគេបិទសិទ្ធិ ។ប៉ុន្ដែនៅលើបណ្ដាញសង្គមស្រីនាង អត់និយាយអ្វីទាំងអស់ ហើយក៍មិនបានសន្យាវិលមករកអាជីពចាស់តាមFan ចង់បានដែរ ។តែគេចាប់អារម្មណ៍ថានាងនៅតែមានសម្រស់ស្អាតបែបធម្មជាតិ និងមិនមានផ្ទៃពោះដូចគេសង្ស័យនោះទេ ។
សុខ ស្រីនាង លែងទទួលការឡើងច្រៀងសម្ដែងលើឆាកតន្ត្រីទាំងឡាយតាំងពីឆ្នាំ២០២១ ដោយគ្មានមូលហេតុទើបធ្វើឲ្យមានការលេចឭជាច្រើនថានាងលែងកាន់ក្បាលមីក្រូ ព្រោះតែគូស្នេហ៍នាងជាមន្រ្ដីធំហាមឡើងឆាក។តែភ្លាមៗនោះលោកអេកូ វ៉ាក់សង អ្នកដឹកនាំសម្ដែងនៅហង្សមាសចេញមុខការពារស្រីនាង ថាមូលហេតុដែលនាងឈប់ច្រៀងគ្មានរងសម្ពាធពីអ្នកណាទេ ប៉ុន្ដែមកពីនាងរវល់ជាប់រកស៊ី តែលោកមិនបង្ហើបថាស្រីនាង ចាប់ មុខរបរអ្វី ហើយហាងនាងនៅម្ដុំណាឡើយ ។យ៉ាងណាគេកត់សម្គាល់ថាមុនដើរចេញពីអាជីពចាស់ស្រីនាង បានដើរកម្សាន្ដនៅបរទេសជាញឹកញាប់ទាំងនៅប៉ែកអាស៊ី និងអ៊ឺរ៉ុប ហើយអាជីពសិល្បៈរបស់នាងនាពេលនោះក៍កំពុងតែហក់ឡើងគូសមផងដែរ ព្រោះត្រូវថៅកែហង្សមាសផ្ដល់តំណែងជាគណៈកម្មការCambodian Idol Junior រដូវកាលទី១ ហើយនាងច្រៀងConcerts ធំៗតម្លៃខ្លួនឡើងជាង១ពាន់ដុល្លារ។គេប្រមាណថារយៈពេលជាង៣ឆ្នាំដែលនាងលែងឡើងលើឆាកតន្រ្ដីក៍ខាតលុយពីសិល្បៈច្រើនម៉ឺនដុល្លារដែរ ប៉ុន្ដែនាងហាក់មិនក្វល់ពីការប្រកួតប្រជែងទីផ្សារចម្រៀង ឬនឹងប្រឈមធ្លាក់កូដហៅលែងឭនោះឡើយ ។
គួរបញ្ជាក់ថានៅក្នុងពិភពសិល្បៈតារាស្រីស្អាតៗដែលកំពុងតែល្បីភាគច្រើនគឺដោយសារតែនាងរងសម្ពាធពីគូស្នេហ៍ដែលជាអ្នកមានឥទ្ធិពល ក៍បង្ខំចិត្តដើរចេញពីសិល្បៈតែម្ដង ហើយក្រោយលែងលេងសិល្បៈតារាទាំង នោះមួយចំនួនរស់នៅស្ដុកស្ដមលើគំនរទ្រព្យមហាសាលដែលពេលបង្ហាញខ្លួនមកវិញស្រាប់តែពួកគេខ្លះមានកូនធំៗដោយមិនទាំងដែលឆ្លងកាត់ជីវិតអាពាហ៍ ពិពាហ៍ ទៀតផង។ចំពោះស្រីនាង វិញនាងបានធ្លាក់ខ្លួនមេ ម៉ាយជិត១៤ឆ្នាំមកនេះ ក្រោយចែកផ្លូវលោកស៊ី សុវត្ថិ កាលពីឆ្នាំ២០១០ ទាំងចម្រូងចម្រាស ប៉ុន្ដែមានតែនាងគត់ដែលជាតារាពូកែលាក់គូស្នេហ៍ថ្មីបានយូជាងគេពោលគឺអត់ដែលបណ្ដើរប្រុសស្នេហ៍ជាសាធារណៈម្ដងណា ឡើយ ក្នុងរយៈពេលជិត១ទសវត្សន៍កន្លះមកនេះ។គេជឿរថាស្រីនាង ដែលមានសម្រស់ផូផង់ម្នាក់នេះមិនទុកបេះដូងឲ្យនៅទំនេរទេ គ្រាន់តែនាងមិនចង់បង្អួតភាពផ្អែមល្ហែមស្នេហ៍ជាចំហ ប៉ុណ្ណោះ ។ ក្រៅពីសុខ ស្រីនាង តារាដែលកំពុងតែល្បីហើយដើរចេញពីអាជីពចាស់មានដូចជានាងនឿន ចាន់ធឿន ,វ៉ាង ស្រីណូ ,VJ អាណូ ,បេប៊ី (ទៅហើយមកវិញ),វ៉ាន់ សម្ផស្ស និងស្រីស្អាតគីម ហួរ ជាដើម។ប្រភពបានឲ្យដឹងថាស្រីនាង នៅតែអាល័យអាជីពចាស់ ហើយផលិតកម្មហង្សមាសក៍មិនបិទទ្វា ដែរបើនាងព្រមវិលវិញ បើទោះជានាងផុតកុងត្រាច្រៀងនៅផលិតកម្មនេះទៅហើយក្ដី ។ប៉ុន្ដែគេជឿរថាស្រីនាង វិលវិញឬបន្ដបាត់ខ្លួនពីឆាកតន្រ្ដីទៀត ឬ យ៉ាងណានោះគឺនៅលើការកំណត់របស់គូស្នេហ៍នាងដែលជាប្រុសលាក់មុខម្នាក់ ៕
