អ៊ីស្រាអែល ៖ អ៊ីស្រាអែល អះអាងថា ទាហានរបស់ពួកគេ បានប៉ះទង្គិចជាមួយក្រមភេរវករហាម៉ាស់ ដែលបានចាក់សោខ្លួនពួកគេនៅក្នុងគ្លីនិករបស់អង្គការសហប្រជាជាតិ នៅហ្គាហ្សា ហើយបានរឹបអូសអាវុធជាច្រើន ពីកន្លែងនោះ។
ទីភ្នាក់ងារព័ត៌មានបរទេស បានរាយការណ៍នៅថ្ងៃទី១៦ ខែតុលា ឆ្នាំ២០២៤ ថា កងកម្លាំងការពារអ៊ីស្រាអែល (IDF) អះអាងថា អង្គភាពមួយរបស់ពួកគេ បានកម្ចាត់ភេរវករហាម៉ាស់ រាប់សិបនាក់ និងដកហូតអាវុធមួយ ចំនួនធំ។ ពួកភេរវករហាម៉ាស់ បានលាក់ខ្លួននៅក្នុងគ្លីនិកដែលដំណើរការដោយទីភ្នាក់ងារអង្គការសហ ប្រជា ជាតិ សម្រាប់ជនភៀសខ្លួនប៉ាឡេស្ទីន (UNRWA) ។ IDF បាននិយាយនៅក្នុងការបង្ហោះនៅលើ X ថា គ្លីនិកដែលមានទីតាំងនៅទីក្រុង ចាបាលីយ៉ា (Jabalia) ភាគខាងជើងនៃហ្គាហ្សា ត្រូវបានប្រែក្លាយទៅជាឃ្លាំងអាវុធ និងកន្លែងលាក់ខ្លួនភេរវករ ដែលបានចាក់សោខ្លួននៅខាងក្នុង និងបានបាញ់អាវុធទៅលើទាហានអ៊ីស្រាអែល។ក្រោយការកម្ចាត់ក្រុមភេរវករនេះរួច មានការផ្ទុះមួយ បានកើតឡើង ដែលបង្ហាញថា មានអាវុធលាក់នៅក្នុងគ្លីនិកអង្គការសហប្រជាជាតិនៅហ្គាហ្សា។
ចាប់តាំងពីការវាយប្រហាររបស់ពួកហាម៉ាស់ លើអ៊ីស្រាអែល ដែលបានបង្កឱ្យមានសង្គ្រាមនៅតំបន់ហ្គាហ្សា នៅថ្ងៃទី០៧ ខែតុលា ឆ្នាំ២០២៣ អ៊ីស្រាអែល បានចោទប្រកាន់មន្ត្រី UNRWA ជាង ៤៥០នាក់ ថាជាសមាជិកនៃក្រុមភេរវករ ខណៈពេលដែលអង្គការសហប្រជាជាតិ ដែលមានបុគ្គលិកច្រើនជាង ១៣ ០០០នាក់ នៅហ្គាហ្សា បានបញ្ជាឱ្យបណ្តេញបុគ្គលិក UNRWA ចំនួន ៩នាក់ បន្ទាប់ពីការស៊ើបអង្កេត បានរកឃើញថា ពួកគេប្រហែលជាជាប់ពាក់ព័ន្ធនឹងការវាយប្រហាររបស់ក្រុមហាម៉ាស់៕