ភ្នំពេញ៖សឹម ស្រីនិច្ច ទុកចិត្តបុរសរូបសង្ហារលោកសុខ សាន់នី ជាងគេដូចជាបណ្ដើរគ្នាតែពីរនាក់ទៅសាសងស្នេហ៍នៅថៃ និងញាំអាហារយ៉ាងរ៉ូមែនទិកទាំងគូជាមួយគ្នាជាញឹកញាប់ដែលប្រុសផ្សេង ឬតារាមួយចំនួនទៀតមិនអាចនៅនែបនិត្យកាយ៉ាស្រីនិច្ច ដូចរូបលោកពិធីកររូបនេះបានទេ ។ទំនាក់ទំនងស្រីស្រស់ប្រុសសង្ហារនេះត្រូវបានគេនិយាយថាស្រីនិច្ច និងលោកសាន់នី ជាគូស្នេហ៍និងគ្នា ប៉ុន្ដែនៅពេលសួររឿងនេះស្រីស្រស់តែងតែនិយាយថាមិនអាចប្រាប់បាន ឬមិនទាន់ដល់ពេលត្រូវនិយាយទៅវិញ ទើបធ្វើឲ្យគេពិបាកសន្និដ្ឋានថាតើពួកគេជាសង្សារគ្នាមែន ឬគ្រាន់តែលេងបិតពួន ?ប៉ុន្ដែអ្វីដែលគួរឲ្យភ្ញាក់ផ្អើលនៅពេលដែលអ្នកកាសែតសួរលោកសាន់ នី កាលពីពេលថ្មីៗនេះថាមានគម្រោងការប្រពន្ធនៅពេលណា ក្នុងន័យចង់ដឹងថាលោកលើកយកឈ្មោះស្រីនិច្ច មកឬអត់នោះស្រាប់តែពិធីកររូបនេះថាគូព្រេងលោកមិនទាន់ដល់ទៅវិញ ដែលការថ្លែងបែបហាក់អត់ខ្លាចស្រីនិច្ច ខឹងបន្ដិចទាល់តែសោះ ។លោកសាន់នី ថែមទាំងនិយាយបែបរវើរវាយថាដូចជាចង់ប្រមូលចំណងដៃមកវិញ ព្រោះដើរចងការគេយូឆ្នាំហើយ តែលោកបែជាមិនហ៊ាននិយាយថានារីដែលខ្លួនគ្រោងក្រាបផ្ទឹមកើបចំណងដៃមកនោះជាអ្នកណាទេ ។
តាមរយៈការលើកឡើងរបស់សឹម ស្រីនិច្ច ថាមិនគួរឆ្លើយពីទំនាក់ទំនងរវាងនាងនិងលោកសុខ សាន់នី ថាត្រូវជាអ្វីនិងគ្នាឲ្យប្រាកដ ហើយលោកសាន់នី ចេញមកអះអាងថាគូព្រេងលោកមិនទាន់កើតបែបនេះ គេអាចសន្និដ្ឋានបានថាតាមពិតទំនាក់ទំនងអ្នកទាំងពីរអត់ទាន់ច្បាស់លាស់គ្នា១០០%ទេ ពោលគឺស្ថិតក្នុងតំណាក់កាលនៅមើលចិត្តថ្លើមគ្នានៅឡើយ បើទោះជាស្អិតល្មូតគ្នាយ៉ាងណាក៍ដោយ ។
គួរបញ្ជាក់ថាសឹម ស្រីនិច្ច ក្រោយចែកផ្លូវសង្សារជាអ្នកជំនួញធំម្នាក់ជិត២ឆ្នាំនេះនាងទុកចិត្តតែលើលោកសុខ សាន់នី ម្នាក់គត់ ប្រុសផ្សេងដែលចង់ចូលខ្លួនមកប៉ះសាច់ដ៍គូឲ្យក្នក់ក្នាញ់នាងចូលមិនចុះឡើយ ទើបមានFan ជម្រុញឲ្យនាងនិងលោកពិធីករនោះឆាប់សារភាពស្នេហ៍ជាចំហតែម្ដងទៅ ។ប៉ុន្ដែឥឡូវបែជាតារា១គូនេះអត់ ទាន់ចិត្ត១ថ្លើម១គ្នាទៅវិញ ។អ្វីដែលស្រីនិច្ច ស្រឡាំងកាំងនោះកាលពីចុងខែ១១ ក្នុងពិធីខួបកំណើតគម្រប់៤០ឆ្នាំ តារាកូន២ពេជ្រ សេរីរ័ត្ន លោកសាន់នី ទៅចូលរួមដែរនោះត្រូវតារាស្រីស្អាតៗដូចជានាងជីជី និងគៀត សុវណ្ណាឡាង ជាដើមចាប់ថើបលោកពិធីកររូបនេះដោយគ្មានក្រែងចិត្តស្រីនិច្ច ប៉ុនក្រចកដៃឡើយ ។ ស្រីនិច្ច មិនត្រឹម តែគ្មានប្រតិកម្មអ្វីទាំងអស់ទេ តែនាងបែជាបណ្ដើរលោកសាន់នី ទៅសាសង និងថតរូបលេងនៅមាត់សមុទ្រ ហាក់ដូចជាគ្មានដឹងរឿងដៃគូខ្លួនទៅវិញ ។
គេកត់សម្គាល់ថាសឹម ស្រីនិច្ច ស្ថិតក្នុងចំណោមតារាស្រីដែលលេចធ្លោម្នាក់នារយៈពេលប៉ុន្មានឆ្នាំចុងក្រោយនេះ បន្ទាប់ពីសារ៉ាយ សក្ខណា ,ឌុច លីដា និងសុខ សោម៉ាវត្តី ជាដើមមានប្ដីនិងកូនរៀងៗខ្លួន ។ស្រីនិច្ច អាចនឹងឡើងកូដមួយក្រឺតទៀតជាមិនខាននាពេលខាងមុខ ក្រោយពីភាពយន្ដរឿង«អប្សរា មហាអង្គរ » ដែលដឹកនាំដោយលោកហ្វៃ សំអាង ហើយនាងលេងជាតួអង្គដល់ទៅ៣ផ្សេងគ្នានោះត្រូវបានដាក់បញ្ចាំងនាពេលដ៍ខ្លីនេះ ហេតុនេះបើលោកសាន់នី នៅតែរារែកចិត្តអត់ព្រមប្រកាសស្នេហ៍នាងជាសាធារណៈ ហើយថែមទាំងថាគួរព្រេងលោកមិនដឹងជានៅឯណានោនោះទៀត ច្បាស់ជាអាចប្រឈមពិបាកប្រជែងជាមួយប្រុសផ្សេងដែលចង់ធ្វើជាអង្គរក្សការពារស្រីស្អាតដែរនោះជាមិនខាន ។
ក្រៅពីសឹម ស្រីនិច្ច តារាដែលភ្ជាប់ស្នេហ៍ជាមួយអ្នកអ្នកសិល្បៈដូចគ្នាតែមិនទាន់ហ៊ានរៀបការមានដូចជាអ្នកនាងពេជ្រ សោភា ,ទេព បូព្រឹក្ស ,ប៉ាច គីមមួយ ,ម៉ានីកា និងឈិន មុនីនាថ ជាដើម ៕
