ភ្នំពេញ៖រ៉េត ស៊ូហ្សាណា បានបញ្ចេញសារគួរឲ្យភ្ញាក់ផ្អើលនៅថ្ងៃទី១២ ខែ២ នេះលើបណ្ដាញសង្គមដោយសួរFan ថាតើនាង«គួរបញ្ចប់ ឬនៅបន្ដ?» ដោយភ្ជាប់រូបភាពកៀកកើយជាមួយតារារ៉េប លោកយូហៃ របស់ផលិតកម្មបារមី ដូចគូសង្សារ។នេះជាសារទី២របស់ហ្សាណា បន្ទាប់ពីនាងបានសួរទៅតារាចម្រៀងរូបនេះថា«ហេតុអ្វីបានជាអ្នកបោកខ្ញុំ?(bro why you cheat on me?» ។
ចំណែកតារាចម្រៀងយូហៃ បានតបសារភ្លាមៗបន្ទាប់ពីបានឃើញសារទី១របស់រ៉េត ស៊ូហ្សាណា នោះថា«ឲ្យបង សុំទោសអូនសម្លាញ់រ៉េត ស៊ូហ្សាណា បើសិនបងធ្វើឲ្យភ្នែកអូនសើម »(I’m Sorry baby បើសិនបងធ្វើឲ្យភ្នែកអូនសើម)។
អ្នកលេងបណ្ដាញសង្គមភាគច្រើនជាប្រុសៗបានខមិនថាចង់ឲ្យស៊ូហ្សាណា បែកពីយូហៃ ហើយមកយកគេជាសង្សារវិញ ដោយមានអ្នកខ្លះថានឹងទទួលយកនាងដៃ១០ទៀតផង។ប៉ុន្ដែហ្សាណា ហាក់នៅចង់ដឹងនិងស្ទាបស្ទង់យោបល់របស់អ្នកគាំទ្រខ្លួនសិនទៅវិញ ពោលគឺមិនទាន់សម្រេចចិត្តតើគួរបន្ដទំនាក់ទំនងជាមួយលោកយូហៃ ទៀត ឬត្រូវបញ្ឈប់ជាបន្ទាន់នោះឡើយ ។
ថ្វីត្បិតតែសាររបស់រ៉េត ស៊ូហ្សាណា និងយូហៃ បង្កប់ទៅដោយការDrama ពោលគឺគេសង្ស័យថាពួកគេលេងល្បែងចង់ឲ្យFan តាមដានដែលអត្ថន័យខ្លះគេសង្ស័យថាទាក់ទងទៅបទចម្រៀងរបស់ពួកគេក្ដី ប៉ុន្ដែនេះជាសញ្ញាដំបូងបំផុតរបស់ហ្សាណា ដែលនាងចាប់ផ្ដើមបង្ហាញភ្លើងខៀវមានស្នេហា ឬខូចចិត្តដោយ សារតែគូស្នេហ៍ ខណៈដែលកន្លងមកស្រីស្រស់ធ្មេញចំពើសទម្រង់មុខដូចកូនកាត់ជប៉ុនរូបនេះ ត្រូវឪពុកម្ដាយតាមជាប់សឹងតែ២៤ម៉ោង តាំងពីនាងប្រឡូកសិល្បៈជិត១០ឆ្នាំ ដែលធ្វើឲ្យប្រុសៗទាំងឡាយបរាជ័យស្នេហានាងតាមបែបផ្លូវកាត់ ។ប៉ុន្ដែពេលនេះហ្សាណា មានស្នេហាហើយដែលបុរសនោះគេសង្ស័យថាជាលោកយូហៃ ។តែFan ខ្លះទៀតដាក់ការសង្ស័យថាហ្សាណា អាចនឹងចាប់ដៃគូជាមួយយូហៃ មុនវណ្ណដា បានជាពួកគេហ៊ានកៀកកើយគ្នាដោយបើកចំហ មិនត្រូវបានឪពុកម្ដាយរបស់ហ្សាណា រារាំងនោះ។
គួរបញ្ជាក់ថារ៉េត ស៊ូហ្សាណា បានបញ្ឈប់ស្និតស្នេហ៍ជាមួយកូនលោកឧកញ៉ាព្រាប សុវត្ថិ គឺសុវត្ថិ មុនីនាគ ក្រោយភរិយាលោកសុវត្ថិ លោកជំទាវឡុង ស្រីមុំ បានប្រកាសកាលពីឆ្នាំ២០២២ ថាកូនប្រុសទី២របស់លោកស្រីគ្មានទំនាក់ទំនងស្នេហាជាមួយហ្សាណា ដូចគេសង្ស័យនោះទេ ។តាំងពីពេលនោះមកពោលគឺជាង២ឆ្នាំមកនេះ ហ្សាណា លែងដើរជាមួយមុនីនាគ និងរាំដាក់តិកតុករួមគ្នាដូចមុនទៀត ហើយនាងបានចេញទៅដើរកម្សាន្ដនៅក្រៅស្រុកជាបន្ដបន្ទាប់ និងពេលនេះស្រាប់តែមកចោទថាយូហៃ បោកនាងទៅវិញ ។ការដែលហ្សាណា បង្ហាញអារម្មណ៍ខកចិត្តជាមួយតារារ៉េបយូហៃ នេះបន្ទាប់ពីនាងទើបតែបានធ្វើខួបកំណើតគម្រប់អាយុ២៥ឆ្នាំ កាលពីចុងខែ១ ប៉ុន្ដែមិនបានបង្ហាញថានាងបានទទួលការដូពីលោកយូហៃ អ្វីខ្លះឡើយ ។
ប្រភពបានឲ្យដឹងថារ៉េត ស៊ូហ្សាណា ទើបតែស្និតស្នាលជាមួយលោកយូហៃ អំឡុងពេលនាងចូលផលិតកម្ម បារមីជាង៦ខែមកនេះ ខណៈការដែលនាងបង្ហាញពីចេតនាចង់ឲ្យគេដឹងពីទំនាក់ទំនងនាងជាមួយលោកយូហៃ នេះគឺចំពេលដែលអាជីពចម្រៀងរបស់នាងនៅទ្រនុំថ្មីមិនសូវមានសកម្មភាពលេចធ្លោដូចនៅហង្សមាសឡើយ បើទោះជានាងបានផ្លាស់ប្ដូរការស្លៀកពាក់សឹងតែទាំងស្រុង ហើយថៅកែបានផ្ដល់សិទ្ធិឲ្យនាងធ្វើជាអ្នកនិពន្ធ និងដឹកនាំសម្ដែងMV ចម្រៀងនាងដោយផ្ទាល់ក្ដី ។ហ្សាណា ដែលពីមុនធ្លាប់តែចេញមុខតាមConcerts ធំៗ ឥឡូវយូៗបានគេឃើញនាងចេញមុខម្ដង ដែលបញ្ហានេះធ្វើឲ្យមានការលើកឡើងថាប្រាក់ចំណូលពីអាជីព ចម្រៀងរបស់នាងក៍មានការប្រែប្រួលផងដែរ ស្របពេលកន្លះឆ្នាំនេះនាងចេញចម្រៀងថ្មីបានត្រឹម៣បទគឺ«Lost »,«Better Off » និងបទ«ស្រ្ដីសេរី »។
គេចាំមើលថាស្រីស្អាតហ្សាណា ចាញ់បោកយូហៃ នៅក្រៅឆាកមែនទែន ឬគ្រាន់តែនាងចង់ឲ្យគេចាប់អារម្មណ៍ខ្លួនឡើងវិញ ?
