ភ្នំពេញ ៖ តារាចម្រៀង វ័យ២៥ឆ្នាំ លោកគី សាវីន បានបណ្ដើរស្រីស្រស់ លីន សោម៉ា ទៅរាំច្រៀងជាដៃគូ បទប្រពៃណីជាតិខ្មែរ សម្រាប់ពិធីបុណ្យចូលឆ្នាំថ្មី ដែលរៀបចំដោយសមាគមទូរទស្សន៍កម្ពុជា កាលពីពេលថ្មីៗនេះ ហើយដោយសារតែសាវីន និងសោម៉ា សុទ្ធតែផ្ដើមចេញពីអ្នកចម្រៀងចូលចិត្តច្រៀងបទប្រពៃណីដូចគ្នា ទើបពួកគេស៊ីចង្វាក់គ្នា ទាំងក្នុងនិងក្រៅឆាក ។ ប៉ុន្ដែយ៉ាងណា គេមិនទាន់ឃើញថៅកែហង្សមាស រុញលោកសាវីន ឲ្យច្រៀងឆ្លងឆ្លើយជាមួយនាងសោម៉ា ជាដៃគូគ្នាជាផ្លូវការនៅឡើយ ។
គី សាវីន ប្រាប់ «នគរធំ» ថា លោកបានត្រឹមតែសម្ដែងជាមួយសោម៉ា សម្រាប់កម្មវិធីថតសម្រាប់ពិធីបុណ្យចូលឆ្នាំថ្មី ប្រពៃណីជាតិ តែខាងផលិតកម្ម ពិតជាមិនទាន់ធ្វើបទឲ្យលោកច្រៀងឆ្លងឆ្លើយជាមួយសោម៉ា ទេ ។ ប៉ុន្ដែលោកថា សម្រាប់ការច្រៀង Concert វិញលោកធ្លាប់បានចាប់ដៃសោម៉ា ម្ដងម្កាលដែរ ហើយនៅពេលខាងមុខនេះ លោករំពឹងថា អាចធ្វើការជាមួយគ្នាញឹកញាប់ថែមទៀត។
គី សាវីន ម្ចាស់ពាន Cambodian Idol រដូវកាលទី៥ ទើបចេញបទថ្មី បាន ២បទ គឺ «Private ពីរនាក់ តែឈឺម្នាក់ឯង» និងបទ «ចូលឆ្នាំ ចាំទៅស្រុក» ។ ចំណែកកញ្ញា លីន សោម៉ា ម្ចាស់ពាន Beat The Best រដូវកាលទី២ ពេលនេះចេញបាន ៣បទហើយ គឺ «មិនចេះតាមដាន», «Single មិនទើសអ្នកណា» និងបទឆ្លងឆ្លើយជាមួយលោកសួ វិចិត្រ «ស្រលាញ់មួយម៉ឺនជាតិ» ។
ប្រភពបានឲ្យដឹងថា ការដែលលោក គី សាវីន មិនទាន់អាចក្លាយទៅជាដៃគូរបស់ស្រីស្រស់ លីន សោម៉ា បានដោយសាតែថៅកែហង្សមាស ចង់ឲ្យសោម៉ា ធ្វើជាដៃគូលោកសួ វិចិត្រ ជាមុនសិន ហេតុនេះហើយ ទោះជាគេមើលឃើញថា លោកនិងសោម៉ា សមគ្នាខ្លាំងព្រោះសុទ្ធតែជាអ្នកនិយមច្រៀងបទបុរាណ និងមរតកដើមដូចគ្នាក្ដី ប៉ុន្ដែសាវីន ដើរយឺតមួយជំហ៊ាន ក្រោយលោកវិចិត្រ ទៅហើយ ខណៈដែលនាងសោម៉ា មានមន្ដស្នេហ៍មិនធម្មតាទេ តាំងពីកែច្រមុះរួច មិនថាតែលោកវិចិត្រ ទេ ដែលទៅសួរសុខទុក្ខនាងដល់បន្ទប់ជួល ទាំងយប់ និងថែម ទាំងចង់ឆ្មក់ចូលពិនិត្យមើលបន្ទប់នាងគេងនោះ ប៉ុន្ដែនៅលើឆាកតន្រ្ដី លោកលីម តិចម៉េង ក៏ចង់ស្នេហ៍ស្និទ្ធសោម៉ា កាត់មុខលោកវិចិត្រ ផងដែរ ។
គី សាវីន ប្រាប់ថា នៅថ្ងៃបុណ្យចូលឆ្នាំប្រពៃណីជាតិខ្មែរ នាពេលខាងមុខនេះ លោកជាប់ច្រៀងសម្ដែង ទាំង៣ថ្ងៃ នៅខេត្តពោធិ៍សាត់, ក្រុងប៉ោយប៉ែត (ខេត្តបន្ទាយមានជ័យ) និងខេត្តឧត្តមានជ័យ ហេតុនេះគ្មានគម្រោងដើរលេងផ្ទាល់ខ្លួនទេ ។ ចំណែកលីន សោម៉ា ប្រាប់ថា ចូលឆ្នាំថ្មី នាងជាប់ច្រៀងដល់ទៅ ៤កម្មវិធីផ្សេងគ្នា គឺនៅខេត្តកំពង់ស្ពឺ, ពោធិ៍សាត់, ក្រុងប៉ោយប៉ែត និងរាជធានីភ្នំពេញ។ សោម៉ា ឲ្យដឹងថា នាងក៏ដូចជាលោកសាវីន ដែរ គឺគ្មានគម្រោងដើរលេងជាលក្ខណៈឯកជននិងក្រុមគ្រួសារទេ នៅថ្ងៃបុណ្យប្រពៃណីជាតិ ឆ្នាំនេះព្រោះតែជាប់ធ្វើការរកលុយ ។
គួរបញ្ជាក់ថា កន្លងមកមានតារាជាច្រើននាក់ហើយដែលក្លាយទៅជាប្ដីប្រពន្ធគ្នា ដោយចំណុចផ្ដើមពីភាពស្និទ្ធស្នាល ឬដៃគូច្រៀង សម្តែង ក្នុងនោះមានដូចជា គង់ ច័ន្ទស្រីមុំ-គឹម សីហា, ទេព បូព្រឹក្ស-ងួន ចាន់ដាវិត (ជី ដេវីត) , ពេជ្រ សោភា -ឆឹម សក្កដា, ប៉ាច គីមមួយ- សយ រតនៈ, នាយព្រែក-ឈិន មុនីនាថ, កុល ដាវី-សុខ រក្សា និងយក់ ថិតរដ្ឋា-ឃុំ ប៉ុណ្ណាដែតជាដើម ។ សម្រាប់លោកសាវីន គ្រាន់តែចំណុចផ្ដើមស៊ីសង្វាក់គ្នាល្អជាមួយ លីន សោម៉ា ប៉ុន្ដែប្រុសដែលស្នេហ៍ស្និទ្ធនាងហើយដៃដល់ជាងលោកសាវីន នោះគឺមានតែលោកសួរ វិចិត្រ និងលីម តិចម៉េង ។
គី សាវីន ផ្ដើមចេញពីអ្នកស្មូត មានស្រុកកំណើតនៅភូមិអូរតាគី ឃុំអូរដា ស្រុកកំរៀង ខេត្តបាត់ដំបង មុនក្លាយជាម្ចាស់ពាន Cambodian Idol រដូវកាលទី៥ ធ្លាប់ច្រៀងជាប្រចាំនៅក្រុមតន្រ្ដីផ្នែកបុរាណរបស់អ្នកនាងខាត់ សួស្ដី ហើយរូបគេត្រូវបានអ្នករួមអាជីពស្រលាញ់ចូលចិត្ត ព្រោះមានចរិតរួសរាយ ចេះគោរពចាស់ទុំ រៀមច្បងក្នុងសិល្បៈ ។ ទស្សនិកជនរង់ចាំមើលថា សាវីន ដែលវិវត្តន៍ខ្លួនពីតារាចម្រៀងប្រពៃណី ទៅជាជាអ្នក ចម្រៀងសម័យនោះ អាចដណ្ដើមភាពលេចធ្លោនៅហង្សមាស បានដែរឬទេ ស្របពេលដែលម្ចាស់ពាន Cambodian Idol ៤រូបផ្សេងទៀត គឺ នី រតនា, ឈិន ម៉ានិច្ច, គ្រី ថៃពៅ និងលីម តិចចម៉េង មានខ្លះនៅលេចធ្លោ ខ្លះទៀតស្ងប់ស្ងាត់ ៕
