ភ្នំពេញ៖តារាសម្ដែងលោកសាយ សៀរ៉ា បានចេញមុខបញ្ជាក់ប្រាប់«នគរធំ» កាលពីពេលថ្មីៗនេះថាអ្នកធ្វើអត្តឃាតសម្លាប់ខ្លួន ដូចជាករណីចងក លោតទឹក ឬលេបថ្នាំពុល ជាដើមនោះដាច់ខាតលោកគ្មានចិត្តអាណិតបន្ដិចឡើយ ។ចំពោះមូលហេតុដែលលោកសៀរ៉ា ថាលោកគ្មានកូនចិត្តអាណិតលើអ្នកបញ្ចប់ជីវិតទាំងមិនទាន់ដល់អាយុត្រូវស្លាប់បែបនេះដោយលោកអះអាងថាលោកយល់ថាឪពុកម្ដាយខំចិញ្ចឹមបីបាច់កូនៗតាំងពីតូច ទម្រាំធំអស់លុយច្រើនណាស់ ហេតុនេះបើមិនបានសងគុណគាត់ទេ សូមកុំធ្វើឲ្យគាត់ទឹកភ្នែក ។តារាសម្ដែងមានស្រុកកំណើតនៅ ខេត្តកំពង់ចាម រូបនេះបន្ថែមថាក្រៅពីមិនអាណិតទៅលើជនធ្វើអត្តឃាតនោះលោកក៍មិនយល់នឹងមានតែខ្លោចផ្សារបំផុតចំពោះកូនៗខ្លះមិនដឹងជាមានបញ្ហាអីក្នុងគ្រួសារបានជាហ៊ានដឹកឪពុក ឬម្ដាយទៅចោលនៅរបងវត្តពេលដែលពួកគាត់ចាតស់ទៅ ធ្វើការងារ រកស៊ីមិនកើត ដែលទង្វើនោះលោកថាធ្លាប់ឃើញតាមព័តមានហើយពិតជាក្ដុកក្ដួលនិងខ្លោចផ្សាបំផុត ព្រោះព្រះរស់គឺឪពុកម្ដាយនេះហើយ។
សាយ សៀរ៉ា មិនមែនចេះតែនិយាយនោះទេ ប៉ុន្ដែលោកបានធ្វើសកម្មភាពជាក់ស្ដែងសងគុណទៅឪពុកម្ដាយតាមរយៈការសង់ផ្ទះវីឡារប្រណិតជូនលោកទាំងពីរអស់តម្លៃជាង១០ម៉ឺនដុល្លារ នៅស្រុកស្រីសន្ធរ ខេត្តកំពង់ ចាម ដោយលោកអះអាងថាបានប្រម៉ែប្រម៉ូលលុយអស់ពីខ្លួនដូចជាលក់ខ្សែក ខ្សែដៃ និងជញ្ជៀនជាដើម រួមទាំងប្រាក់លោកខំសន្សំជាច្រើនឆ្នាំពីសិល្បៈនោះទៅធ្វើផ្ទះជូនព្រះរស់របស់លោក។លោកសៀរ៉ា ក៍ធ្លាប់បង្ហាញនូវការធ្វើម្ហូបអាហារ ជូនម្ដាយជាប្រចាំផងដែរ ហេតុនេះហើយបានជាលោកនៅដក់ជាប់អារម្មណ៍ថាអ្នកធ្វើអត្តឃាត នាំឲ្យឪពុកម្ដាយទឹកភ្នែកមិនមែនជារឿងគួរឲ្យអាណិតឡើយ សម្រាប់ទស្សនៈផ្ទាល់ខ្លួនរបស់លោក ។
គេកត់សម្គាល់ថាលោកសាយ សៀរ៉ា បានធ្លាក់ចុះការងារសិល្បៈប៉ុន្មានឆ្នាំចុងក្រោយនេះដោយលោកអះអាងថាមានពេលខ្លះរហូតសឹងតែដាច់បាយទៀតផង ដែលបញ្ហានេះគេជឿថាព្រោះតែ«រលកក្រោយ ច្រានរលកមុន »។សៀរ៉ា រឹតតែខកចិត្តបន្ថែមទៀត ព្រោះបានរៀបចំឯកសារ និងអ៊ឺវ៉ាន់មួយចំនួនសម្រាប់ត្រៀមទៅច្រៀងសម្ដែងនៅប្រទេសអូស្រា្ដលី ទៅហើយសម្រាប់ពិធីបុណ្យចូលឆ្នាំខ្មែរ កន្លងទៅថ្មីៗនេះ តែបែជាខកខានទៅវិញដោយសារតែឯកសារមិនគ្រប់គ្រាន់ ។យ៉ាងណាលោកថានឹងរៀបចំឯកសារនេះជាថ្មីម្ដងទៀតក្រោយចូលឆ្នាំខ្មែរហើយនេះ សង្ឃឹមថានឹងមិនបរាជ័យជាលើកទី២នោះទេ ខណៈដែលក្រៅពីអូស្រា្ដលី នៅឆ្នាំ២០២៥ នេះលោកក៍មានបំណងចង់ចេញទៅច្រៀងសម្ដែងនៅអាមេរិកផងដែរ ។
ទោះជាលោកសាយ សៀរ៉ា ថាមិនបានស្រក់ទឹកភ្នែករឿងអ្នកធ្វើអត្តឃាតមែន ប៉ុន្ដែកន្លងមកក៍មានតារាខ្លះសម្រេចចិត្តបញ្ចប់ជីវិតដោយវិធីខាងលើនេះដែរក្នុងនោះមានដូចជាអ្នកនាងឈិន សុរ៉ាវី បានចង ក កាលពីឆ្នាំ២០១៣ , តារាម៉ូដែលឈ្មោះអុល សម្ផស្ស ចងក សម្លាប់ខ្លួនឆ្នាំ២០១៤ ,តារាស៊ិចស៊ីកែវ សុរិយា ចងកសម្លាប់ខ្លួនឆ្នាំ២០១៧ និងកូនស្រីតារាកំប្លែងនាយត្រដក់ ឈ្មោះវ៉ាន់ ដាវីត ចងក សម្លាប់ខ្លួនឆ្នាំ២០២០ ជាដើម ។ប៉ុន្ដែតាម រយៈសាររបស់លោកសាយ សៀរ៉ា ប្រឆាំងការធ្វើអត្តឃាតខាងលើនេះគេជឿថាទាំងតារានិងអ្នកក្រៅរង្វង់សិ ល្បៈ នឹងកាត់បន្ថយចំនួនធ្វើអត្តឃាតជាមិនខាន ព្រោះមុននឹងធ្វើទង្វើបែបនោះត្រូវនឹកដល់ឪពុកម្ដាយមុនគេ ហើយបើលោតទឹក ឬចងកសម្លាប់ខ្លួន ដោយសាតែរឿងស្នេហាទៀតនោះគឺពិតជាធ្វើឲ្យឪពុកម្ដាយហូទឹកភ្នែកដោយគ្មានន័យដោយសារតែពួកគេជាមិនខាន ។
លោកសាយ សៀរ៉ា និងអ្នកនាងផូ មុន្នីពៅ
សូមបញ្ជាក់ថាលោកសាយ សៀរ៉ា ឈានចូលវ័យជ្រេបន្ដិចទៅហើយ តែលោកមិនទាន់កំណត់ពីពេលវេលាចូលរោងការនោះទេ ដោយពេលខ្លះថាលោកមានការខ្មាសអៀន និងក្មួយៗលោកដែលពួកគេខ្លះកូន២-៣ទៅហើយ តែលោកនៅតែឯកោ។ការពន្យាពេលយកប្រពន្ធរបស់លោកសៀរ៉ា នេះដែរគឺដូចគ្នាទៅនិងលោកទេព រិនដារ៉ូ ,យូ ឌីស្កូ ,ឆន សុវណ្ណារាជ ,ណុប បាយ៉ារិទ្ធ,នីកូ ,បញ្ញា សិទ្ធ ជាដើមដែលឆ្នាំ២០២៥ នៅតែមិនប្រញ៉ាប់រឿងការប្រពន្ធឡើយ ៕
លោកសាយ សៀរ៉ា និងអ្នកនាងចន ច័ន្ទលក្ខិណា
