យោងតាមប្រភពស្និតទ្ធមួយបានឱ្យដឹងថា កីឡាករ Alexis Sanchez អាចនឹងពិចារណាផ្លាស់ទៅលេងឱ្យក្លឹប Inter Milan របស់អ៊ីតាលីស៊េរី A នាពេលឆាប់ៗខាងមុខ ។
សូមបញ្ជាក់ថា អនាគតខ្សែប្រយុទ្ធកាំភ្លើងធំ Arsenal រូបនេះបានស្ថិតក្នុងភាពស្រពេចស្រពិល ខណៈកុងត្រារបស់គេនឹងផុតកំណត់នាដំណាច់រដូវក្តៅក្រោយ ហើយព្រមពេលជាមួយគ្នានោះ ក៏មានការបញ្ជាក់ផងដែរថា Sanchez នឹងមិនទុកពេលទំនេរចោលយូរនោះទេ ពោលគឺរូបគេនឹងចុះកុងត្រាភ្លាមៗក្រោយចប់កុងត្រាជាមួយ Arsenal ។
បណ្តាក្លឹបធំៗមួយចំនួននៅអឺរ៉ុបសុទ្ធតែចាប់អារម្មណ៍និងសម្លឹងឃើញកីឡាករ Sanchez ប៉ុន្តែរឿងច្បាស់លាស់មួយដែលពួកគេបានដឹងនោះគឺថា កីឡាករសញ្ជាតិស៊ីលីរូបនេះនឹងមិនបន្តកុងត្រាថ្មីជាមួយ Arsenal ឡើយ ប្រសិនលោក Arsene Wenger ជាគ្រូបង្វឹកត្រូវបានបណ្តេញចេញ ។
Gary Medel ជាមិត្តរួមជាតិ Sanchez បច្ចុប្បន្នលេងឱ្យក្លឹប Inter Milan និយាយថា «Sanchez ជាកីឡាករដែលមនុស្សគ្រប់គ្នាស្គាល់ច្រើន ។ គេជាខ្សែប្រយុទ្ធមួយរូបដែលបណ្តាក្លឹបធំៗកំពុងសម្លឹងមើល ។ ខ្ញុំមិនដឹងថា អនាគតរបស់គេនឹងទៅជាយ៉ាងណាទេ ប៉ុន្តែ ប្រសិនគេសួរពីស្ថានភាពក្លឹប Inter Milan នោះខ្ញុំអាចប្រាប់បាន ។ ខ្ញុំអាចនិយាយថា Inter ជាក្លឹបល្អ ទាំងគ្រូបង្វឹកទាំងអ្នកដឹកនាំក្រុមសុទ្ធសឹងជាមនុស្សល្អដែលស្រេកឃ្លានជ័យជម្នះ» ៕
ដោយ៖ ឈិត គឹមឆុន