ភ្នំពេញ ៖ បុរសម្នាក់បើកម៉ូតូក្នុងស្ថានភាពស្រវឹងជោគជាំ ក្រោយពីផឹកសុីអបអថ្ងៃបុណ្យទិវាសិទ្ធិនារីអន្តរជាតិ៨មិនា ខួបទី១០៦ ឥតព្រួយ អត់ខ្វល់ អត់គិតពីហានិភ័យកើតឡើងសម្រាប់ខ្លួនស្រវឹង ព្យាយាមបើកបរមូ៉តូ ទិបំផុតគ្រប់គ្រងខ្លួនឯងលែងបាន អំណាចនៃជាតិទឹកប្តូរនិស្ស័យ អារម្មណ៍ ស្មារតីបាត់បង់អស់ រេចង្កូតធ្លាក់ចិញ្ចើម ដួលផីងសន្លប់ស្តូក កាលពីវេលាម៉ោង៤និង១៥នាទីរសៀលថ្ងៃទី០៨ ខែមិនា ឆ្នាំ២០១៧ ស្ថិតនៅលើកំណាត់ផ្លូវជាតិលេខ៣ ភូមិព្រៃកំបុត សង្កាត់ចោមចៅ ខណ្ឌពោធិសែនជ័យ ។
ជនរងគ្រោះបើតាមពិនិត្យមើលលើកាតការងារមានឈ្មោះ រឿង សម្បត្តិ និងឈ្មោះមួយទៀត វ៉ាន់ ណូ ភេទប្រុស អាយុ២២ឆ្នាំ មុខរបរកម្មកររោងចក្រ ម៉ាសប្រាឌើរ ស្នាក់នៅភូមិព្រៃស្ពឺ សង្កាត់ចោមចៅ ខណ្ឌពោធិសែនជ័យ មានស្រុកកំណើតភូមិព្រៃក្រសាំង ឃុំទួល ស្រុកឧត្តុង្គ ខេត្តកំពង់ស្ពឺ ជិះមូ៉តូមួយគ្រឿងម៉ាក ហុងដា សេ១២៥ សេរី២០១៣ ពណ៌ខ្មៅ ពាក់ស្លាកលេខ ភ្នំពេញ 1BK-2643 ។
តាមប្រភពនៅកន្លែងកើតហេតុបានឲ្យដឹងថា មុនកើតហេតុ ជនរងគ្រោះជិះមូ៉តូ ល្បឿនលឿនពីត្បូងទៅជើង រេពេញផ្លូវ ក្នុងស្ថានភាពស្រវឹងជោគជាំ លុះដល់ចំណុចកើតហេតុ អំណាចនៃជាតិស្រវឹង ធ្វើឲ្យបុរសខាងលើ គ្រប់គ្រងខ្លួនឯងលែងបាន រេចង្កូតធ្លាក់ទៅចិញ្ចើមផ្លូវ ក្រឡាច់ដួលផីង សន្លប់ស្តូក ។
ជនរងគ្រោះពិនិត្យជាក់ស្តែងក្រោយកើតហេតុ បើតាមដួលរងរបួសស្រាលទេ តែអ្វីធ្ងន់ធ្ងន់ ជនរងគ្រោះត្រូវទឹកប្តូរនិស្ស័យជ្រុលទើបសន្លប់ធ្ងន់ ។ ក្រោយកើតហេតុ ត្រូវបានរថយន្តសង្រ្គោះរបស់អង្គភាព៧១១ ដឹកបញ្ជូនទៅមន្ទីរពេទ្យបង្អែកពោធិចិនតុង ចំណែកមូ៉តូ ត្រូវបាននគរបាលយកទៅរក្សាទុកនៅបុ៉ស្តិ៍ចោមចៅ រងចាំប្រគល់ជូនជនរងគ្រោះវិញនៅពេលក្រោយ ៕