គ្រោះថ្នាក់ចរាចរណ៍គួរឲ្យរន្ធត់មួយបានកើតឡើងរវាងរថយន្តកាមរីបាឡែនបើកបរដោយស្រ្តីរូបស្រស់ម្នាក់បុករះម៉ូតូហុងដាឌ្រីមហើយជ្រុលទៅបុករ៉ឺម៉កម៉ូតូក្រឡាប់ផ្ងារជើងបណ្ដាលឲ្យបុរសអ្នកបើកម៉ូតូម្នាក់ស្លាប់នៅកន្លែងកើតហេតុ ធ្វើឲ្យមិត្តភក្តិជនរងគ្រោះទប់កំហឹងមិនបានក៏យកដុំថ្មគប់កញ្ចក់រថយន្តបែកខ្ទេច កាលពីវេលាម៉ោង២និង៣០នាទីរំលងអាធ្រាត្រឈានចូលថ្ងៃទី២៣ ខែ មេសា ឆ្នាំ ២០១៧ នៅចំណុចរង្វង់មូលសម្ដេចសង្ឃជួនណាត តាមផ្លូវព្រះសីហនុកែងផ្លូវរដ្ឋសភាជាតិ សង្កាត់ទន្លេបាសាក់ ខណ្ឌចំការមន ។
សពជនរងគ្រោះមានឈ្មោះ នី រដ្ឋា ភេទប្រុស អាយុ២១ឆ្នាំ មុខរបរបុគ្គលិកចាក់សាំងមានស្រុកកំណើតផ្ទះលេខ៩ ភូមិពាមស្ពឺឃុំ ព្រែជ្រៃ ស្រុក ពោធិ៍រៀង ខេត្តព្រៃវែង ជាម្ចាស់ម៉ូតូ ហុងដាឌ្រីមស៊េរី២០១៦ ។
ប្រភពពត៍មានពីបុរសម្នាក់ជាអ្នកលក់គ្រឿងម្ជូរបានប្រាប់អ្នកយកពត៍មានយើងថា មុនកើតហេតុឃើញរថយន្តម៉ាកកាមរីបាឡែន ពណ៌ទឹកប្រាក់ ពាក់ស្លាកលេខភ្នំពេញ ២U ១២៩៥ បើកបរដោយស្រ្តីរូបស្រស់ម្នាក់បើកតាមផ្លូវរដ្ឋសភាជាតិក្នុងទិសដៅពីរដ្ឋសភាជាតិទៅសម្ដេចសង្ឃជួនណាត ដោយល្បឿនលឿនពេកជ្រុលទៅបុកម៉ូតូហុងដាឌ្រីម ពណ៌ខ្មៅ សេរីឆ្នាំ២០១៦ ពាក់ស្លាកលេខព្រៃវែង១J ២២៥០ ជិះគ្នា២នាក់ប្រុសមួយស្រីមួយម្នាក់ដែលកំពង់ជិះនៅរង្វង់មូលសម្ដេចសង្ឃជួនណាតដោយរថយន្តបុកចំហៀងខាងឆ្វេងខ្ចាតអ្នកបើកម៉ូតូបោកក្បាលស្លាប់ភ្លាមនៅកន្លែងកើតហេតុ ចំណែកស្រ្តីរួមដំណើរជាមួយរងរបួសស្រាល ហើយរថយន្តមិនទាន់អស់លឿនជ្រុលទៅបុករ៉ឺម៉កម៉ូតូមួយគ្រឿងពីក្រោយទៀតបណ្ដាលអោយក្រឡាប់ផ្ងារជើង សំណាងល្អអ្នកបើករ៉ឺម៉កមិនមានរងរបួសទេ ។ដោយឡែក ស្រ្តីជាអ្នកបើករថយន្តបង្កបានឡើងជិះរថយន្តរបស់បក្សពួកគេចេញទៅបាត់ ។
ក្រោយពេលកើតហេតុរថយន្តសង្គ្រោះមកដល់កន្លែងកើតហេតុតែស្រ្តីដែលរងរបួសស្រាលភ័យពេកបានដើរឡើងជិះម៉ូតូឌុបទៅបាត់ ក្រោយមកទើបឃើញសមត្ថកិចុចអាជ្ញាធរមូលដ្ឋានចុះមកដល់កន្លែងកើតហេតុដើម្បីធ្វើការវាស់វែង ។
បើតាមស្រ្តីមានឈ្មោះ វណ្ណី ស្រីល័ក្ខ អាយុ២៨ឆ្នាំ មុខរបរកម្មការីនីរោងចក្រកាត់ដេរ
សំលៀកបំពាក់នៅម្ដុំកំបូល ស្នាក់នៅបន្ទប់ជួលសង្កាត់កំបូល ខណ្ឌពោធិ៍សែនជ័យ ត្រូវជាបងស្រីបង្កើតបានប្រាប់សមត្ថកិច្ចរៀបរាប់ទាំងទឹកភ្នែកស្ដាយស្រណោះថា គាត់មិនបានដឹងថាប្អូនប្រុសដែលស្លាប់នេះស្នាក់នៅសង្កាត់ណាទេ ព្រោះប្អូនគាត់រៀនផងឆ្លៀតធ្វើការផងដោយមានមិត្តភ័ក្រ្តយកទូរស័ព្ទប្រាប់ទើបអោយបងប្អូនជូនមកដល់កន្លែងកើតហេតុសឹងតែមិនចង់ជឿ ពេលមកដល់ឃើញប្អូនប្រុសគាត់ដេកស្លាប់នៅនិងថ្នល់បែកក្បាលឈាមពេញមុខហើយ ក្រោយពីសមត្ថកិច្ចធ្វើការវាស់វែងរួចនិងយកសពដាក់រថយន្តដឹកសពទៅស្រុកកំណើតគាត់វិញដើម្បីធ្វើបុណ្យតាមប្រពៃណីខ្មែរ ។
ក្រោយពេលកើតហេតុសមត្ថកិច្ចចុះទៅពិនិត្យរួចប្រគល់សពឲ្យបងស្រីយកទៅធ្វើបុណ្យ តាមប្រពៃណី ចំណែករថយន្តបង្ក ម៉ូតូរងគ្រោះនិងរ៉ឺម៉កម៉ូតូដែលក្រឡាប់ត្រូវសមត្ថកិច្ចវាស់ វែងយកទៅដោះស្រាយនៅការិយាល័យនគរបាលចរាចរណ៍ផ្លូវគោករង់ចាំធ្វើការដោះស្រាយតាមច្បាប់ ៕