ភ្នំពេញ៖ បុរសម្នាក់ជិះម៉ូតូមួយគ្រឿង ព្យាយាមវ៉ាជែងរថយន្ត ប៉ុន្តែវ៉ាមិនផុត ជ្រុលទៅបុកម៉ូតូ មួយគ្រឿងទៀត បណ្តាលឲ្យរងការខូចខាតយ៉ាងដំណំ ហេតុការណ៌នេះបានកើតឡើងកាលពីវេលាម៉ោង១០និង១៥នាទីយប់ ថ្ងៃទី៣០ ខែមិថុនា ឆ្នាំ2២០១៧ ត្រង់ចំណុចមុខភោជនីយដ្ឋាន កែវព្រិលដីថ្មី ស្ថិតតាមបណ្តោយផ្លូវដីថ្មី សង្កាត់ភ្នំពេញថ្មី ខណ្ឌសែនសុខ។
តាមប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុ គេឃើញម៉ូតូមួយគ្រឿងម៉ាក FZ ពណ៌ខ្មៅពាក់ស្លាកលេខភ្នំពេញ1CC-2193 បើកបរដោយបុរសពីរនាក់ បោះពួយយ៉ាងលឿន តាមបណ្តោយផ្លូវដីថ្មី ក្នុងទិសដៅពីកើតទៅលិច លុះមកដល់ត្រង់ចំណុចកើតហេតុបានព្យាយាមវ៉ាជែងរថយន្តមួយគ្រឿង មិនចាំម៉ាក មិនចាំស្លាកលេខ តែវ៉ាមិនផុត បណ្តាលឲ្យជ្រុលចង្កូតទៅបុកម៉ូតូមួយគ្រឿងទៀត ម៉ាក KAWASAKI ពណ៌ត្រួយចេក ពាក់ស្លាកលេខភ្នំពេញ1DC-4521 បើកបរដោយបុរសម្នាក់តាមបណ្តោយផ្លូវដីថ្មី ក្នុងទិសដៅច្រាសទិសគ្នាចំពីមុខពេញទំហឹង បណ្តាលឲ្យម៉ូតូម៉ាក KAWASAKI រងការខូចខាតរួញកខាងមុខ រីឯអ្នកបើកបរមិនមានរងរបួសអ្វីឡើយ ចំណែកម៉ូតូម៉ាក FZ រងការខូចខាតរួញកខាងមុខ រីឯអ្នកបើកបររងរបួសរយះកែងជើងខាងស្តាំ ចំណែកអ្នករួមដំណើរដែលអង្គុយពីក្រោយ មិនមានរងរបួសអ្វីឡើយ។
ក្រោយពេលកើតហេតុ សមត្ថកិច្ចជំនាញចរាចរណ៌ខណ្ឌសែនសុខ បានចុះមកធ្វើការវាស់វែង និងអូសយកម៉ូតូទាំងពីរទៅរក្សាទុកនៅអធិការដ្ឋាននគរបាលខណ្ឌសែនសុខ ដើម្បីរង់ចាំធ្វើការដោះស្រាយនៅពេលក្រោយ៕
