ភ្នំពេញ ៖ បុរសម្នាក់ធ្វើដំណើរតាមម៉ូតូមួយគ្រឿង ដោយបានឌុបនារីម្នាក់ពីក្រោយផងដែរ ខណៈដែលធ្វើដំណើរបណ្តើរសារសងផ្តោះផ្តងវាចាបណ្តើរ ដោយភ្លេចខ្លួន ស្រាប់តែនារីដែលអង្គុយពីក្រោយ កើតមានអាការងងឹតវិលមុខដួលធ្លាក់ពីលើម៉ូតូសន្លប់ស្តូក បុរសជាអ្នកបើកម៉ូតូស្រវាចាប់ខុស ប្រថុយព្រលែងដៃចង្កូតចោល ដួលទាំងមនុស្សទាំងម៉ូតូ បង្កឲ្យមានភាពភ្ញាក់ផ្អើល កាលពីវេលាម៉ោង៨និង០៥នាទីព្រឹក ថ្ងៃទី០៩ ខែកក្កដា ឆ្នាំ២០១៧ ស្ថិតនៅលើកំណាត់ផ្លូវវេងស្រេង ភូមិចោមចៅ សង្កាត់ចោមចៅ ខណ្ឌពោធិ៍សែនជ័យ ។
តាមប្រភពប្រជាពលរដ្ឋឃើញហេតុការណ៍បានឲ្យដឹងថា មុនកើតហេតុ គេឃើញបុរសនារី ២នាក់ខាងលើ មិនដឹងថា ជាប្តីប្រពន្ធ ឬជាអ្វីនឹងគ្នាឡើយ ជិះម៉ូតូមួយគ្រឿង ម៉ាក Zoomer ពណ៌ខៀវ ពាក់ស្លាកលេខ ភ្នំពេញ 1FU-8931 ដោយបុរសជាអ្នកបើកបរ រីឯនារីជាអ្នកអង្គុយពីក្រោយ ធ្វើដំណើរលើកំណាត់ផ្លូវវេងស្រេង ពីកើតទៅលិច ជិះបណ្តើរផ្តោះផ្តង សាសងវាចាបណ្តើរ ភ្លេចខ្លួន ដល់ចំណុចកើតហេតុ ស្រាប់តែនារីជាអ្នករួមដំណើរអង្គុយនៅពីក្រោយ កើតមានអាការងងឹតវិលមុខ ប្រទាញធ្លាក់ពីលើម៉ូតូ សន្លប់បាត់ស្មារតី ភ្លាមៗត្រូវបានបុរសខាងលើព្យាយាមខំស្រវេស្រវាចាប់ខុស រហូតស្លន់ពេក ប្រលែងដៃពីចង្កូតម៉ូតូចាប់នារីខាងលើ ធ្វើឲ្យដួលទាំងម៉ូតូ។
ក្រោយកើតហេតុភ្លាមៗ បុរសខាងលើភ័យស្លន់ស្លោលើកបីត្រកងនារី រត់ឆ្លេឆ្លា មិនដឹងទៅណា ឲ្យគេឯងជួយ ទើបពលរដ្ឋប្រាប់ឲ្យដឹកតាមម៉ូតូកង់បី ដើម្បីនាំស្រ្តីទៅសង្រ្គោះជាមុនសិន ៕
