ភ្នំពេញ ៖ កម្លាំងនគបាលប៉ុស្តិ៍ចតុមុខ បង្ក្រាបចាប់ជនសង្ស័យពីរនាក់ប្តីប្រពន្ធ បានរួមគ្នាធ្វើសកម្មភាពឆក់កាបូបពីពីស្រ្តីម្នាក់កំពុងធ្វើដំណើរតាមផ្លូវព្រះសុីសុវត្តិ ទល់មុខសណ្ឋាគារកាំបូឌីយ៉ាណា សង្កាត់ចតុមុខ ខណ្ឌដូនពេញ កាលពីវេលាម៉ោង៤និង១០នាទីរសៀល ថ្ងៃទី០៩ ខែកក្កដា ឆ្នាំ២០១៧ ។
ជនសង្ស័យឈ្មោះ លី នី ភេទប្រុស អាយុ១៧ឆ្នាំ មុខរបរកម្មកររោងចក្រ ត្រូវជាប្តី ចំណែកជនសង្ស័យជាប្រពន្ធមានឈ្មោះ នី ស្រីនាង អាយុ១៨ឆ្នាំ មុខរបរ កម្មការិនីរោងចក្រ ស្នាក់នៅសង្កាត់ដង្កោ ខណ្ឌដង្កោ មានស្រុកកំណើតនៅខាងខេត្តស្វាយរៀង ។ ចំណែកស្ត្រីរងគ្រោះមានឈ្មោះម៉ឺ ម៉ារីយ៉ា អាយុ៥០ឆ្នាំ ស្នាក់នៅសង្កាត់ទំនប់ទឹក ខណ្ឌចំការមន ។
តាមនគរបាលបានឲ្យដឹងថា មុនកើតហេតុ ស្រ្តីរងគ្រោះមានជិះម៉ូតូម៉ាកហុងដាគុប កាត់ផ្លូវព្រះសុីសុវត្ថិ ពីត្បូងទៅជើង លុះដល់ចំណុចកើតហេតុ ស្រាប់តែជនសង្ស័យទាំង២នាក់ ប្រីប្រពន្ធជិះម៉ូតូម៉ាកស្មាស់ ពណ៌ខ្មៅ ពាក់ស្លាកលេខ ភ្នំពេញ 1BL-9618 តាមពីក្រោយ ហើយធ្វើសកម្មភាពឆក់យកកាបូបស្ពាយ បានសម្រេច ហើយព្យាយាមរត់គេច ត្រូវបានជនរងគ្រោះស្រែកចោរៗ ស្របពេលដែលកម្លាំងល្បាតរបស់ប៉ុស្តិ៍ ប្រទះជួបដេញតាមចាប់បានភ្លាមៗ យកទៅសាកសួរនៅប៉ុស្តិ៍ចតុមុខ ដើម្បីកសាងសំណុំរឿងបញ្ជូនទៅផ្នែកជំនាញអធិការដ្ឋានចាត់ការបន្តទៅតាមនីតិវិធី ៕
