ភ្នំពេញ ៖ យុវជនម្នាក់យកម៉ូតូមកចាក់សាំងឆ្លងភ្លើងប៊ិុស្រ៊ី ឆេះម៉ូតូផ្អើលដល់អ្នកចាក់សាំង រត់រកបំពង់ពន្លត់អគ្គីភ័យយកមកជួយបាញ់ពន្លត់ ។
ហេតុការណ៌ភ្ញាក់ផ្អើលខាងលើ កើតហេតុនៅវេលាម៉ោង10និង00 នាទី ថ្ងៃទី10 ខែកក្កដា ឆ្នាំ2017 នៅត្រង់ចំណុចផ្លូវ182 ស្ថានីយប្រេងសូគីម៊ិច ស្តុបទេពផន សង្កាត់ទឹកល្អក់ទី3 ខណ្ឌទួលគោក ។
បើតាមសំដីអ្នកឃើញហេតុការណ៌បានប្រាប់ឲ្យដឹងថា មុនពេលកើតហេតុ គេឃើញយុវជនម្នាក់បានយកម៉ូតូមួយគ្រឿង ម៉ាកសង់កូរ៉េ ពណ៌ក្រហម ស្លាកលេខភ្នំពេញ 1FL-7602 បានយកមកចាក់សាំង ក្រោយពេលចាក់សាំងរួច យុវជនម្នាក់នោះបានបណ្ដើរម៉ូតូចេញពីកន្លែងចាក់ ក៏បានធាក់ម៉ូតូបញ្ឆេះ ស្រាប់តែធាក់ឆេះហើយ ក៏មានអណ្ដាតភ្លើងឆេះចេញពីម៉ូតូឆាបឆេះម៉ូតូ បានធ្វើឲ្យប្រជាពលរដ្ឋ និងបុគ្គលិកចាក់សាំងយកបំពង់ពន្លត់អគ្គីភ័យមកពន្លត់អស់មួយបំពង់ធំទើបរលត់ ។ ក្រោយពេលកើតហេតុ យុវជនបានយករុឺម៉ក់ដឹកអេតចាយមកដឹកម៉ូតូខ្លួន ដើម្បីយកទៅជួសជុលវិញ។
គួរបញ្ជាក់ឲ្យដឹងផងដែរថា ប្រជាពលរដ្ឋដែលរស់នៅទីនោះ មានអារម្មណ៌ភិតភ័យយ៉ាងខ្លាំង ព្រោះខ្លាចឆេះដល់កន្លែងចាក់សាំង៕