ភ្នំពេញ ៖ ជនសង្ស័យក្នុងសកម្មភាពឆក់យ៉ាងសកម្មក្នុងរាជធានីភ្នំពេញ ចំនួន២នាក់ ត្រូវបានកម្លាំងនគរបាលខណ្ឌពោធិ៍សែនជ័យ កម្លាំងនគរបាលកម្លាំងអាវុធហត្ថខណ្ឌ ការពារក្បួនប្រតិភូតាមគោលដៅ និងកម្លាំងនគរបាលខណ្ឌសែនសុខ រួមសហការគ្នាស្ទាក់ដេញចាប់ខ្លួន បានភ្លាមៗ ក្រោយពីជនសង្ស័យ ធ្វើសកម្មភាពឆក់កាបូបពីពីស្រ្តី២នាក់ កំពុងជិះម៉ូតូតាមផ្លូវមុខសាលារៀនសុភមង្គល ភូមិប៉ប្រកជើង សង្កាត់កាកាប ខណ្ឌពោធិ៍សែនជ័យ បានសម្រេចហើយជនសង្ស័យព្យាយាមបើកម៉ូតូរត់គេចតាមផ្លូវសហព័ន្ធរុស្សី រហូតដល់មុខសាលារៀនពោធិ៍ចិនតុង ទើបកម្លាំងប្រដេញ ជិះបំបុកផ្តួល ព័ទ្ធចាប់បានភ្លាមៗ កាលពីវេលាម៉ោង១១និង១៥នាទីព្រឹក ថ្ងៃទី១២ ខែកក្កដា ឆ្នាំ២០១៧នេះ ។
ជនសង្ស័យម្នាក់ដែលនគរបាលចាប់ខ្លួនបាន ឈ្មោះ អៀ មករា ហៅយ៉ា ភេទប្រុស អាយុ១៨ឆ្នាំ មានទីលំនៅសង្កាត់បឹងសាឡាង ខណ្ឌទួលគោក ជាអ្នកបើកបរម៉ូតូម៉ាកសង់ប៊ិច សេ១១០ ស៊េរីឆ្នាំ២០១២ ពណ៌ខ្មៅ ពាក់ស្លាកលេខភ្នំពេញ 1BM-8761 ដើរធ្វើសកម្មភាពឆក់តាមដងផ្លូវ សាធារណៈ ។ ចំណែកបក្ខពួកម្នាក់ទៀត ខាងកម្លាំងអាវុធហត្ថខណ្ឌពោធិ៍សែនជ័យ ចាប់ខ្លួនបាន មានឈ្មោះ ប៉ាក់ ម៉ាហាន ភេទប្រុស អាយុ១៨ឆ្នាំ មុខរបរមិនពិតប្រាកដ ស្នាក់នៅភូមិមានជ័យ១ សង្កាត់ស្ទឹងមានជ័យ ខណ្ឌមានជ័យ ។
ចំណែកជនរងគ្រោះ មានឈ្មោះ សុន យ៉ា ភេទស្រី អាយុ៣២ឆ្នាំ មុខរបរកាត់ដេរនៅផ្ទះ រួមដំណើរជាមួយប្អូនស្រីម្នាក់ទៀត ឈ្មោះ ស្រី វី អាយុ២៩ឆ្នាំ មុខរបរនៅផ្ទះ ។ ជនរងគ្រោះទាំង២នាក់មានទីលំនៅភូមិច្រេស សង្កាត់គោកឃ្លៀង ខណ្ឌសែនសុខ ជិះម៉ូតូមួយគ្រឿង ម៉ាកធូដេ ពណ៌ត្រួយចេក ពាក់ស្លាកលេខភ្នំពេញ 1DE-2390 ។
តាមសម្តីស្ត្រីរងគ្រោះបានឲ្យដឹងថា មុនកើតហេតុ គាត់ទាំង២នាក់ជិះម៉ូតូឌុបគ្នាចេញពីផ្ទះ ឆ្ពោះ ទៅផ្សារពោធិ៍ចិនតុង ជិះតាមផ្លូវខាងលើ ដល់ចំណុចកើតហេតុ ស្រាប់តែជនសង្ស័យទាំង២នាក់ ជិះម៉ូតូសង់ប៊ិច សេ១១០ ស៊េរី២០១២ មកដល់ទន្ទឹម ហើយធ្វើសកម្មភាពឆក់យកកាបូបស្ពាយពីស្មាបានសម្រេចហើយ ព្យាយាមបើកម៉ូតូរត់គេចតាមផ្លូវសហព័ន្ធរុស្សី ឆ្ពោះទៅកើត ស្រែកចោរៗផ្អើលកម្លាំងប៉ូលីស អាវុធហត្ថ ជាច្រើននាក់កំពុងការពារក្បួនប្រតិភូតាមដងផ្លូវស្រាប់ ដេញចាប់បានភ្លាមៗ ។
ក្រោយឃាត់ខ្លួនបានជនសង្ស័យម្នាក់នាំខ្លួនទៅសាកសួរនៅប៉ុស្តិ៍កាកាប រីឯជនសង្ស័យម្នាក់ទៀត ក្រោយពីអាវុធហត្ថឃាត់ខ្លួនបាននាំទៅសាកសួរនៅទីបញ្ជាការអាវុធហត្ថខណ្ឌពោធិ៍សែនជ័យ រួចបានប្រគល់ជូន ប៉ុស្តិ៍កាកាប ទាំង២នាក់ ដើម្បីកសាងសំណុំរឿងបញ្ជូនទៅផ្នែកជំនាញអធិការដ្ឋានខណ្ឌចាត់ការបន្ត ។ ដោយឡែក សម្ភារៈក្នុងកាបូប មិនមានបាត់បង់ ដកហូតបានមកវិញ នគរបាលប្រគល់ជូនជនរងគ្រោះវិញ ៕
