ពីង រ៉ូហ្សា ត្រូវគេចោទដណ្ដើមប្ដីគេផ្អើលហាងផឹកស៊ី

ថ្មីៗនេះមានការភ្ញាក់ផ្អើលនៅហាងផឹកស៊ីមួយកន្លែងនៅម្ដុំកោះពេជ្រដែលមានស្ត្រីបណ្ដើរកូនស្រីម្នាក់ ទៅតាមប្ដីដល់កន្លែងផឹកស៊ីខណៈដែលប្ដីកំពុងផ្អែមល្ហែមជាមួយនារីរូបស្រស់ម្នាក់ដែលគេស្គាល់ថា ជាតារាសម្ដែងរូបស្រស់កំពុងឡើងកូដកញ្ញាពីង រ៉ូហ្សា ហើយក៏បានបង្កជាជម្លោះផ្អើលភ្ញៀវ ចោមរោមមើលខណៈដែលត្រូវគេចោទថា រ៉ូហ្សា បានដណ្ដើមប្ដីគេ។

តារាភាពយន្តកញ្ញាពីង រ៉ូហ្សា បានទទួលស្គាល់ថា ថ្មីៗនេះនាងពិតជាត្រូវបានគេចោទថានាងដណ្ដើមប្ដីគេផ្អើល ពេញបណ្ដាញសង្គមហ្វេសប៊ុកមែនហើយនាងក៏ព្រួយបារម្ភពីបញ្ហានេះដែរ។រ៉ូហ្សា បញ្ជាក់ថា”ថ្មីៗនេះខ្ញុំត្រូវបាន គេជ្រើសឲ្យថតនៅក្នុងឈុតអប់រំមួយស្ដីអំពី”បុរសក្បត់ចិត្តប្រពន្ធកូនលួចមានស្រីខាងក្រៅនិងប្រើអំពើហិង្សាលើប្រពន្ធកូន” ហើយនៅក្នុងឈុតសម្ដែងនោះក្រុមអ្នកដឹកនាំសម្ដែងរបស់លោកTan Kimsour ពុំបានឲ្យភ្ញៀវនៅក្នុងហាងនោះ ដឹងថា ជាការសម្ដែងទេដោយបានបង្កប់ក្រុមអ្នកថតដូចរឿងរ៉ាវជីវិតជាក់ស្ដែងអីចឹង”។

រ៉ូហ្សា បន្ថែមថា អំឡុងពេលសម្ដែងនោះក្រសែភ្នែកភ្ញៀវនៅក្នុងហាងជាច្រើនបានត្របាញ់សំឡឹងមករកនាងក្នុង ន័យចោទនាងថាដណ្ដើមប្ដីគេទាំងបុរសនោះមានប្រពន្ធនិងកូនស្រីម្នាក់រួចទៅហើយ ។

តារាភាពយន្តកំពុងឡើងកូដសម្រុកថត៥រឿង ព្រមគ្នាជាតួអង្គសំខាន់រូបនេះបានឲ្យដឹងដែរថា ពេលនាងថតវីដេអូ អប់រំមួយនោះនិងមានការបង្ហោះនៅលើបណ្ដាញសង្គមហ្វេសប៊ុក មជ្ឈដ្ឋានជាច្រើនគិតថា នាងដណ្ដើមប្ដីគេមែន និងមានអ្នកខ្លះជេនាងទៀតផង។រ៉ូហ្សា បន្ថែមថា”ឈុតអប់រំនោះផ្ទុះខ្លាំងហើយក៏មានបងប្អូនខ្លះយល់ច្រឡំ និងបានជេរិះគន់ខ្ញុំថាដណ្ដើមគេមែនទែនដែលធ្វើឲ្យខ្ញុំក៏បារម្ភពីបញ្ហានេះខ្លះដែរ។ជាពិសេសខ្លាចគេគិត ថាខ្ញុំជាសង្សារបុរសម្នាក់ដែលសម្ដែងជាមួយខ្ញុំជាដើម។ប៉ុន្តែទន្ទឹមនឹងនោះខ្ញុំក៏បានបង្ហោះសារបញ្ជាក់ នៅលើទំព័រហ្វេសប៊ុករបស់ខ្ញុំផងដែរ ហើយខ្ញុំចង់បញ្ជាក់បន្ថែមថាវាគ្រាន់តែជាការសម្ដែងតែប៉ុណ្ណោះ សូមកុំមានការយល់ច្រឡំ”។

រ៉ូហ្សា បានលើកឡើងថា ឈុតអប់រំនោះពិតជាល្អក្នុងន័យអប់រំដល់បុរសខិលខូចមួយចំនួនដែលចូលចិត្ត លួចលាក់មានស្រីញីខាងក្រៅហើយនាងក៏ សំណូមពរឲ្យបុរសៗដែលមានប្រពន្ធកូនហើយគួរមានទំនួលខុសត្រូវខ្ពស់ដើម្បីផ្ដល់ សុភមង្គលនិងភាពកក់ក្ដៅដល់ក្រុមគ្រួសារ៕