ភ្នំពេញ ៖ បុរសម្នាក់ មួម៉ៅក្តៅចិត្តនឹងរឿង សុំលុយពីបងប្រុសរបស់ខ្លួនមិនបាន ក៏បែកគំនិតលួចរថយន្តទំនើប១គ្រឿង របស់បងប្រុស បើករត់គេច និងបង្កគ្រោះថ្នាក់បុករះអ្នកដំណើរតាមផ្លូវ រងរបួសជាបន្តបន្ទាប់ ទើបមានការភ្ញាក់ផ្អើលដល់ប្រជាពលរដ្ឋ រួមនិងសមត្ថកិច្ច ប្រដេញតាមពីក្រោយយ៉ាងប្រកិត ធ្វើឱ្យជន សង្ស័យភ័យស្លន់ស្លោជ្រុលចង្កូតទៅបុករ៉ឺមក ម៉ូតូដឹកប្រេង បណ្តាលឱ្យផ្ទុះឆាបឆេះរថយន្ត ខ្ទេចទាំងស្រុង។
ករណីប្អូនប្រុសលួចរថយន្តបង បង្កគ្រោះថ្នាក់ និងធ្វើឱ្យផ្ទុះឆេះរថយន្តទាំងស្រុងនេះ បានកើតមានការភ្ញាក់ផ្អើលឡើង កាលពីវេលាម៉ោង១០និង១០នាទីព្រឹក ថ្ងៃទី០៥ ខែតុលា ឆ្នាំ២០១៧ នៅតាមផ្លូវបេតុង ម្តុំបឹងតាម៉ាត ស្ថិតក្នុងភូមិសំបួរ សង្កាត់ដង្កោ ខណ្ខដង្កោ។
ជនសង្ស័យដែលលួចយករថយន្តបងប្រុស បើកបង្កបញ្ហា និងធ្វើឱ្យកើតមានការភ្ញាក់ផ្អើល មួយចំហៀងរាជធានីភ្នំពេញនេះ មានឈ្មោះគឹម រត្ន័នា អាយុ៣៨ឆ្នាំ មុខរបរមិនពិតប្រាកដ ស្នាក់នៅជាមួយបងប្រុស ក្នុងបុរីពិភពថ្មីចម្ការដូង ភូមិសំបួរ សង្កាត់ដង្កោ ខណ្ខដង្កោ។ ចំណែក បងប្រុសដែលត្រូវជាម្ចាស់រថយន្ត មានឈ្មោះ គឹម ហឹង អាយុ៥៦ឆ្នាំ ស្នាក់នៅក្នុងបុរីពិភពថ្មីចម្ការដូង។
តាមសម្តីបុរសជាម្ចាស់រថយន្ត ដែលត្រូវជនសង្ស័យជាប្អូនប្រុសលួចយករថយន្តទៅបើក រហូតបង្កឱ្យមានការឆាបឆេះ បានរៀបរាប់ប្រាប់ថា នៅមុនពេលកើតហេតុ កាលពីវេលាម៉ោង៧ និង៣៥នាទីព្រឹក ថ្ងៃទី០៥ ខែតុលា ឆ្នាំ២០១៧ គាត់បានចតរថយន្តម៉ាកឡិចស៊ីស RX-330 ពណ៌ស្ករ ពាក់ស្លាកលេខ ភ្នំពេញ 2AK-2331 នៅខាងមុខផ្ទះ ហើយភ្លេចយកកូនសោចេញពីក្នុងរថយន្ត។ បន្ទាប់មក ប្អូនប្រុស ដែលជាជនបង្កហេតុ និងជាមនុស្សញៀនថ្នាំផងនោះ បានមកសុំលុយគាត់ តែគាត់មិនបានឱ្យទេ ព្រោះមិនចង់ឱ្យគេយកទៅទិញថ្នាំញៀន ប្រើប្រាស់ទៀត។ បន្ទាប់មក គាត់ក៏បានដើរចូលទៅក្នុងផ្ទះបាត់ទៅ ស្រាប់តែមួយសន្ទុះ ក្រោយមក ចេញមកក្រៅវិញ ក៏បាត់រថយន្ត ពីមុខផ្ទះ ទើបដឹងថា ប្អូនប្រុសរបស់គាត់បើករថយន្តចេញទៅ។ ភ្លាមនោះ គាត់ក៏បានទូរស័ព្ទ ប្តឹងកម្លាំងកងរាជអាវុធហត្ថរាជធានីភ្នំពេញ ឱ្យជួយតាមរករថយន្តខាងលើ ដែលត្រូវប្អូនគាត់យកទៅបាត់នោះ។
បុរសជាម្ចាស់រថយន្តបន្តថា បន្ទាប់ពីប្តឹង កងរាជអាវុធហត្ថរាជធានីភ្នំពេញ ហើយកម្លាំងអាវុធហត្ថបានតាមរកឃើញរថយន្តរបស់គាត់កំពុងបើកនៅព្រំប្រទល់ខេត្តកណ្តាល ហើយបានបត់ត្រឡប់ចូលរាជធានីភ្នំពេញវិញ តាមផ្លូវជាតិលេខ២ ទើបកម្លាំងអាវុធហត្ថ និងនគរបាលបានជិះដេញតាមរថយន្តរបស់គាត់ រហូតមក តែប្អូនប្រុសរបស់គាត់ ដែលជាអ្នកបើករថយន្តមិនព្រមឈប់ទេ និងចេះតែព្យាយាមបន្ថែមល្បឿនទៅមុខរហូតដល់ចំណុច ផ្លូវលេខ៣៩៨ កែងផ្លូវលេខ៦៣ ក្នុងសង្កាត់ បឹងកេងកេងទី១ ខណ្ឌចំការមន រថយន្តបង្កហេតុ បានបើកបុកម៉ូតូ១គ្រឿង ម៉ាកវីវ៉ា ពណ៌ខ្មៅ ពាក់ស្លាកលេខ ឃ-១៩៤៥ កច១ ដែលកំពុងជិះតាមផ្លូវលេខ៦៣ ក្នុងទិសដៅពីជើង ទៅត្បូង និងបើកបរដោយស្ត្រីម្នាក់ឈ្មោះតារា ភួងនិមល អាយុ២៩ឆ្នាំ មុខរបរបុគ្គលិកក្រុមហ៊ុនឯកជន ស្នាក់នៅផ្ទះលេខ 8AEo ផ្លូវ៤៣២ សង្កាត់ទួលទំពូងទី១ ខណ្ឌចំការមន បណ្តាលឱ្យដួលម៉ូតូ បាក់ជើងខាងឆ្វេងម្ខាង និងត្រូវរថយន្តសង្គ្រោះដឹកយកទៅព្យាបាលនៅគ្លីនិកហុងហាក់។ ចំណែករថយន្តបង្កហេតុបានព្យាយាមបើករត់ទៀត និងត្រូវបានកម្លាំងអាវុធហត្ថ និងសមត្ថកិច្ចបានដេញតាម ព្រមទាំងធ្វើឱ្យប្រជាពលរដ្ឋ ដែលឃើញរថយន្តបង្កហេតុបើកបុកស្ត្រីបើកម៉ូតូបាក់ជើងម្ខាង មិនព្រមឈប់ ហើយប្រឹងបើករត់គេចទៀត ទើបនាំគ្នាប្រដេញតាមឃាត់ បានរថយន្តបង្កហេតុបាននៅចំណុចស្តុបបូកគោ ប៉ុន្តែសមត្ថកិច្ចគោលដៅមិនទាន់បានសាកសួរផង គ្រាន់តែឃើញសមត្ថកិច្ចដែលដេញតាមពី ក្រោយមកដល់ជនសង្ស័យជាអ្នកបើករថយន្តបង្កហេតុ ដែលមិនទាន់ចុះពីលើរថយន្តនៅឡើយ បានជាន់ហ្គារបើករថយន្តរត់បន្តទៀត និងត្រូវបានគេដេញតាម រហូតដល់ចំណុចច្រមុះ ជ្រូកក្បាលថ្នល់ ខណៈដែលផ្លូវកំពុងតែស្ទះចរាចរណ៍ ក៏ត្រូវបានអ្នកដេញតាមពីក្រោយផ្ទុះកំហឹង ឈប់ម៉ូតូយកដុំថ្ម និងជើងឆត្រ ព្រម ទាំងមួកការពារសុវត្ថិភាពគប់ទៅលើរថយន្តបង្កហេតុ បណ្តាលឱ្យបែកកញ្ចក់ផ្ទាំងខាងក្រោយ និងបែកកញ្ចក់ចំហៀងខាងស្តាំ។ តែយ៉ាងណាក្តី មិនបណ្តាលឱ្យជនបង្កហេតុជាអ្នកបើកបរ រងរបួសទេ ហើយរថយន្តបង្កហេតុ នៅតែព្យាយាមបើករត់ទាំងមានបុករះម៉ូតូ បណ្តាលឱ្យ ខូចខាតម៉ូតូតិចតួចជាច្រើនគ្រឿងទៀត តែមិនមានរងរបួសធ្ងន់ឡើយ ហើយក៏មិនមានអ្នកប្តឹងដែរ។
ម្ចាស់រថយន្តបានបញ្ជាក់ឱ្យដឹងទៀតថា បន្ទាប់មក រថយន្តបង្កហេតុបើកតាមផ្លូវលេខ ២៧១ រួចបត់ឆ្វេងត្រង់ចំណុចស្តុបកែងផ្លូវលេខ៣៧១ និងធ្វើដំណើរត្រង់តាមផ្លូវលេខ៣៧១ រហូតដល់ចំណុចផ្លូវបត់ចូលបឹងតាម៉ាត សង្កាត់ ដង្កោ ខណ្ឌដង្កោ ក៏ព្យាយាមបើករត់គេចខ្លួន ទាំងភ័យស្លន់ស្លោ ទើបបណ្តាលឱ្យជ្រុលចង្កូត ទៅបុកពីក្រោយរ៉ឺម៉កម៉ូតូដឹកប្រេងម៉ាស៊ូតចំនួន ៣ប៊ីដុង ដែលបើកចេញពីកន្លែងស្តុកប្រេង បណ្តាលឱ្យធ្លាក់ប្រេងពីលើរ៉ឺម៉ក និងត្រូវរថយន្ត បើកកិនប៊ីដុងប្រេង ធ្វើឱ្យផ្ទុះប្រេងឆាបឆេះ រថយន្តសន្ធោសន្ធៅនៅកណ្តាលផ្លូវតែម្តង ចំណែក រ៉ឺម៉កម៉ូតូដឹកប្រេងបានរេចង្កូតចូលទៅក្នុងព្រៃ នៅតាមចិញ្ចើមផ្លូវ តែមិនមានរងរបួសអ្វីធ្ងន់ទេ។
ក្រោយកើតហេតុ សមត្ថកិច្ចបានចុះឃាត់ ខ្លួនជនបង្កហេតុ បញ្ជូនទៅកាន់អធិការដ្ឋាន នគរបាលខណ្ឌដង្កោ ដើម្បីសាកសួរ។ ចំណែក រថយន្ត ឡិចស៊ីស RX-330 ត្រូវភ្លើងឆាបឆេះ មួយកំណាត់ខាងមុខ និងត្រូវបានសមត្ថកិច្ច ទាក់ទងហៅរថយន្តពន្លត់អគ្គិភ័យសាលាខណ្ឌ ដង្កោ១គ្រឿង ទៅជួយបាញ់ទឹកពន្លត់ រហូត ដល់ភ្លើងបានរលត់ទៅវិញអស់។
ក្រោយកើតហេតុ ជនបង្កហេតុដែលត្រូវ បងប្រុស និងជាម្ចាស់រថយន្តអះអាងថា ជាមនុស្សញៀនថ្នាំ ត្រូវបានសមត្ថកិច្ចឃាត់ខ្លួន នៅអធិការដ្ឋានខណ្ខដង្កោ។ ចំណែករថយន្ត ដែលឆេះនោះ ត្រូវបានអូសយកមករក្សាទុក នៅអធិការដ្ឋានខណ្ខដង្កោ រង់ចាំធ្វើការដោះស្រាយតាមនីតិវិធី៕
ណន អ៊ាត-គួន ចំរើន