អតីតតារាចម្រៀងផលិតកម្មរស្មីហង្សមាស លោកអែន ឌី ដែលធ្លាប់តែបង្ហាញរូបភាពថត MV បែបស្នេហាក្តៅសាច់ជាមួយតារាស្រីស្អាតជាច្រើនដួងមកហើយ ពិសេស ឱបរឹតនាងពេជ្រ អាវីហ្សា នៅក្នុងអាងទឹក ឡើងក្តៅសាច់ប្រុសៗទាំងឡាយទាំងព្រឹកនោះ ស្រាប់តែពេលនេះងាកមកចាប់ដៃគូច្រៀងឆ្លងឆ្លើយជាមួយស្រីក្មេងសាច់សខ្ចីល្ហក់ម្នាក់ ជាអ្នកចម្រៀងរួមទ្រនំដូចគ្នា គឺនាងឈីងឈីង តាមរយៈការផ្តោះផ្តងគ្នាបទ “ផែនដីគ្មានបងរស់បានយ៉ាងណា?” ដែលទើបចេញជា Audio នឹងត្រៀមចេញជា MV ក្នុងពេលខាងមុខនេះហើយ។
តារាចម្រៀងប្រុសចូលចិត្តថតសិចស៊ី លោកអែន ឌី ថ្លែងថា ខ្លួនពេញចិត្តក្នុងការចាប់ដៃគូជាមួយតារាចម្រៀងទូទៅ មិនប្រកាន់ថា ជាសិស្សប្អូន ឬបងនោះទេ ឱ្យតែផលិតកម្មបាន ឬអ្នករៀបចំកម្មវិធីតម្រូវ គឺអាចធ្វើបានទាំងអស់ដូចជាពេលនេះ ច្រៀងជាមួយនាងឈីងឈីង ជាដើម។
អ្នកចម្រៀងដែលធ្លាប់ឱបរឹតតែស្រីស្អាត គ្មានចន្លោះតារាណាម្នាក់នោះ បានរៀបរាប់ថា “ខ្ញុំមានអារម្មណ៍ប្លែកដែរ ដែលបានច្រៀងជាមួយកញ្ញាឈីងឈីង ក្នុងបទមនោសញ្ចោតនាមួយបទនេះ គឺពួកយើងអាចច្រៀង និងធ្វើការច្រៀងជាមួយគ្នាបាន ហើយការដាក់អារម្មណ៍ជាមួយបទនេះ ក៏បានល្អ និងយល់ចិត្តគ្នាបានល្អដែរ ខ្ញុំពេញចិត្តធ្វើការជាមួយគាត់ ទោះជាគាត់ជាសិស្សប្អូនខ្ញុំមានបទពិសោធន៍ក្នុងវិស័យចម្រៀងតិចជាងខ្ញុំក៏ដោយ តែយើងច្រៀងស៊ីចង្វាក់ និងយល់ចិត្តគ្នាទៅតាមអត្ថន័យបទចម្រៀង ១បទនេះ”។
ទោះជាលោកអែន ឌី ប្រកាសថា ពេញចិត្តស្រីស្អាតឈីងឈីង ក៏ដោយ តែតារាស្បែកសខ្ចីនេះថា លោកមិនមានអារម្មណ៍ស្នេហាអីជាមួយនាងឈីងឈីង នោះទេ គឺ បានចាត់ទុកថាជាសិស្សប្អូន ហើយក៏គ្មានគម្រោងនាំនាងឈីងឈីង ទៅថតឈុតរោលរាលក្នុងអាងទឹកដូចនាងពេជ្រ អាវីហ្សា ដែរ ព្រោះខ្លាចស្រីក្មេងអ្នកចម្រៀងផលិតកម្ម ភី គិតថា លោកចង់កេងចំណេញលើនាងបានជាសរសើរៗ ហើយក៏យកទៅចូលអាងទឹកលេងល្បែងស្នេហ៍។ តែលោកអែន ឌី ថាសម្រាប់ MV បទ “ផែនដីគ្មានបងរស់បានឬយ៉ាងណា?” នឹងចេញជា MV ក្នុងពេលឆាប់ៗនេះហើយ ដែលលោកមានការសម្តែងជាមួយនាងឈីងឈីង ផងដែរ។
គួរបញ្ជាក់ថា ក្រោយដើរចេញពីផលិតកម្មរស្មីហង្សមាស លោកអែនឌី បានផលិតបទចច្រៀងជា Original Songs ដោយខ្លួនឯង និងបានចេញបទចម្រៀងតាម Youtube ហើយថ្មីៗនេះ លោកអែនឌី ក៏បានចូលទៅច្រៀងនៅផលិតកម្ម ភី ដែលប៉ះដៃគូថ្មីស្រីស្រស់ឈីងឈីង នេះតែម្តង ហើយតារាចូលចិត្តថតសិចស៊ីមានផលិតកម្មមួយទៀត បានទាក់ទងហៅឱ្យទៅច្រៀងដែរ តែមិនបង្ហើបថា ជាផលិតកម្មណាឡើយ៕
