មិនខុសពីតារាចម្រៀងផ្សេងៗទៀត របស់ផលិតកម្មថោន និងសមាគមសិល្បករខ្មែរនោះឡើយ សម្រាប់យុទ្ធនាការឃោសនារកសំឡេងឆ្នោតអាណត្តិទី៦ កាលពីថ្ងៃអាទិត្យ នាងផាន វីរ៉ាទី ហៅរ៉ាប៊ី ម្ចាស់បទ “មាន់ស្រែ” តារាចម្រៀងផលិតកម្មថោន បានដឹកដៃតារាកំប្លែង CTN នាយពាក់មី ចេញឃោសនាឱ្យគណបក្សប្រជាជន យ៉ាងសកម្មនៅលើរថយន្តធំមួយ ដែលមានឆាកតន្ត្រីលើឡានស្រាប់ ហើយអតីតពិធីការិនីទូរទស្សន៍ហង្សមាសនេះ បានច្រៀងរាំយ៉ាងសប្បាយក្អាកក្អាយជាមួយពាក់មី មួយអស់ដៃ។
ក្នុងឈុតខោខូវប៊យ រហែកជង្គង់ ពាក់អាវយឺតសដៃខ្លី សញ្ញារូបទេវតាបាចផ្កា នាងរ៉ាប៊ី លេងស្ទីលចងអាវលើពោះបញ្ចោញរន្ធផ្ចិតយ៉ាងសិចស៊ី ហើយនាងច្រៀងបទ “ស្នេហ៍អើយស្នេហ៍” ជាមួយនាយពាក់មី ឃោសនារកសំឡេងឆ្នោតឱ្យគណបក្សប្រជាជន ដែលធ្វើឱ្យមហាជនមួយចំនួនបានចាប់អារម្មណ៍ផងដែរថា ពេលនេះសូម្បីតែ “មាន់ស្រែ” ក៏មកដង្ហែបក្សនឹងគេដែរ អ៊ីចឹងចាំមើលថា កំពូលតារាចម្រៀងល្បីៗ ដូចជា នាងមាស សុខសោភា, ឱក សុគន្ធកញ្ញា, សុគន្ធ និសា និងព្រាប សុវត្ថិ, ខេមរៈ សិរីមន្ត ជាដើម នឹងចេញមុខឃោសនាបក្សប្រជាជន នៅថ្ងៃណាដែរ ស្របពេលដែលប្រធានសមាគមសិល្បករខ្មែរ អ្នកនាងចន ច័ន្ទលក្ខិណា និងប្តី លោកហេង ឡុង ប្រធានសមាគមអ្នកសិល្បៈស្មគ្រ័ចិត្តជួយសង្គម ដែលរងការរិះគន់កាលពីពេលថ្មីៗនេះ រឿង យកឡានសមាគមទៅដង្ហែបក្សនោះ កំពុងតែសស្រាក់សស្រាំក្នុងការកៀងគរតារាៗក្រោមឱវាទខ្លួនឱ្យទៅដង្ហែគណបក្សប្រជាជន ផងដែរ។
ដោយឡែក នាងរ៉ាប៊ី ដែលសប្បាយខ្លាំងពេក ក្នុងថ្ងៃដង្ហែបក្ស រាំរហូតលេចរន្ធផ្ចិតនោះ មានព័ត៌មានថា សម្រស់របស់នាងធ្វើឱ្យមន្ត្រីធំៗ កាន់តែគ្រឺតក្នាញ់ស្រីស្អាតនេះថែមទៀត តែនាងរ៉ាប៊ី ធ្លាប់ព្រមានមន្ត្រីធំៗថា នាងមិនមែនចេះតែងាយៗ ញ៉ែបានៗនោះឡើយ ព្រោះលុយកាក់មិនអាចធ្វើឱ្យនាងងប់ងល់លោតឆត្រទៅជាប់អន្ទាក់ទេ តែនាងត្រូវការបុរសម្នាក់ដែលចេះថ្នាក់ថ្នមបំពេចិត្តនាងទាំងយប់ថ្ងៃ៕
