បាត់ដំបង៖ ក្រោយផ្ទេរកាសិក្សាពីភ្នំពេញ ទៅបាត់ដំបង ដើម្បីថែទាំលោកយាយដែលកំពុងមានជំងឺធ្ងន់ បានតែប៉ុន្មានខែសោះ ពេលនេះ ពេជ្រ ថៃ បានស្រក់ទឹកភ្នែកជោកផែនថ្ពាល់ ដោយសារជីដូនបានទទួលមរណភាពហើយ កាលពីល្ងាចថ្ងៃទី០៦ ខែសីហា ឆ្នាំ២០១៨។
ការបាត់បង់ជីដូន “ម៉ែចាស់” បានធ្វើឲ្យពេជ្រ ថៃ មានក្ដីរន្ធត់ចិត្តជាខ្លាំង ព្រោះតែមិននឹកស្មានថា ខ្លួនត្រូវបាត់បង់អ្នកមានគុណយ៉ាងឆាប់រហ័សបែបនេះឡើយ។
ពេជ្រ ថៃ បានសរសេរសារលើហ្វេសប៊ុករៀបរាប់ទាំងក្ដុកក្ដួលក្នុងចិត្តកាលពីម្សិលមិញនេះថា “ម៉ែចាស់ថៃ បានទទួលមរណៈភាពហើយ”។
គួបញ្ជាក់ថា ពេជ្រ ថៃ ត្រូវបានដូនចាស់មើលថែទាំតាំងពីកើតបាន៥ខែមកម្ល៉េះ ដោយសារតែម្តាយឪពុកត្រូវចាកចេញទៅធ្វើការងារធ្វើនៅស្រុកថៃ ហើយកុមារពេជ្រ ថៃ ធំធាត់រហូតមកដល់ពេលនេះ ក៏ដោយសារបៅដោះស្វិតដូនចាស់ផងដែរ។
នៅមុននេះបន្តិច ពេជ្រ ថៃ ក៏បានបង្ហោះសារបន្ថែមថា “នឹកសំលេងនឹកពាក្យទូន្មានធ្លាប់ស្ដាប់រាល់ថ្ងៃ នឹកណាស់”៕
