ក្លឹប Newcastle ត្រូវបានគេរាយការណ៍ថា ចាប់អារម្មណ៍ចង់បានខ្សែការពារ Marcos Alonso របស់ក្លឹប Chelsea។ ខណៈដែលអនាគតរបស់ Alonso កំពុងស្ថិតនៅក្នុងភាពមិនច្បាស់លាស់ជាមួយនឹងគ្រូបង្វឹកលោក Frank Lampard ដែលចាប់អារម្មណ៍ចង់បានខ្សែការពារ Ben Chiwell របស់ក្លឹប Leicester ។
នេះបើយោងតាមប្រភពព័ត៌មាន Daily Mail ចេញផ្សាយនៅថ្ងៃចន្ទ ទី១៥ ខែមិថុនា ឆ្នាំ២០២០។
ប្រភពព័ត៌មានខាងលើ បានឱ្យដឹងទៀត ថា ក្លឹប Chelsea បានដាក់តម្លៃខ្លួនកីឡាករ Marcos Alonso ជាង៣២លានដុល្លារ។
ក្លឹប Newcastle ដែលរំពឹងថា នឹងមានម្ចាស់ក្លឹបថ្មីដែលសម្បូរលុយ កំពុងសម្លឹងរកកីឡាករឆ្នើមៗ មួយចំនួនទៀត ដើម្បីយកមកពង្រឹងក្លឹបឡើងវិញ។ ម្ចាស់ក្លឹបថ្មីរបស់ Newcastle ចាប់អារម្មណ៍ចង់បានកីឡាករខ្សែការពារវ័យ២៩ឆ្នាំ។
កីឡាករសញ្ជាតិអេស្ប៉ាញ Marcos Alonso នៅសល់កុងត្រារយៈពេល៣ឆ្នាំទៀតជាមួយក្លឹប Chelsea ប៉ុន្តែក្លឹបនេះទំនងជាមិនបន្តកុងត្រាថ្មីបន្ថែមទៀតទេ។
Marcos Alonso បានចូលមកលេងឱ្យក្លឹប Chelsea តាំងពីឆ្នាំ២០១៥ ក្រោយផ្ទេរមកពីក្លឹប Fiorentina ។ នៅជាមួយក្លឹបនេះ ធ្លាប់លើកពាន Premier League, FA Cup និង Europa League។
ក្រៅពីចង់បានខ្សែការពារ Ben Chiwell ក្លឹប Chelsea ក៏កំពុងតែសម្លឹងកីឡាករ២រូបផ្សេងទៀត គឺ Alex Telles របស់ ក្លឹប Porto និង Nicolas Tagliafico របស់ក្លឹប Ajax៕
ប្រភពពី ៖ Daily Mail
ប្រែសម្រួលដោយ ៖ ដេត