តាមប្រភពព័ត៌មានពីដេលី ម៉េលចេញផ្សាយកាលពីថ្ងៃពុធទី ១២ តុលា ២០១៦ បានឲ្យដឹងថា ក្លឹបយក្សអេស្ប៉ាញ Real Madrid បានបង្ហាញគម្រោងសាងសង់ ពហុកីឡដ្ឋានថ្មីដែលមានទឹកប្រាក់ជាង៤៤២លានដុល្លារអាមេរិក ។
បើតាមលោក Florentino Perez ប្រធានក្លឹប Real Madrid បានអះអាងថាពហុកីឡដ្ឋានថ្មីនេះអាចផ្ទុកអ្នកទស្សនាបានចំនួន៨១០០០ដូចពហុកីឡដ្ឋានចាស់ដែរ ប៉ុន្តែអ្វីដែលសំខាន់គឺការធ្វើទំនើបកម្មរាល់បរិក្ខារដែលបំពាក់នៅទីនោះ ការសាងសង់សារមន្ទីរធំជាងមុនដោយមានការិយាល័យបុគ្គលិកជាច្រើន ទីលានហ្វឹកហាត់ ធ្វើដំបូលដ៏ប្រណិត និងការផ្លាស់ប្ដូរកៅអីចាស់ៗចំនួន៣០០០។
គម្រោងពហុកីឡដ្ឋាននេះនឹងត្រូវកសាងឡើងដោយវិស្វកម្មអាល្លឺម៉ង់លោក Catalan ដែលនឹងចាប់ផ្ដើមនៅដើមឆ្នាំ២០១៧ ហើយគ្រោងនឹងបញ្ចប់នៅឆ្នាំ២០២០ខាងមុខនេះ។ គួររំឮកថា ពហុកីឡដ្ឋាន Real Madrid ជារៀងរាល់ឆ្នាំ មានអ្នកគាំទ្រជាង៤លាននាក់ ចូលមកទស្សនា។
ដោយ៖ ហេង ដេត