ស្ត្រីម្នាក់បានយកគ្រឿងអលង្ការលក់យកលុយចាយអស់ ដោយខ្លាចប្តីដឹង ស្តីបន្ទោស ក៏បានប្រឌិតរឿងចោរប្លន់ ហើយបានរត់ទៅប្តឹងប៉ូលិស ធ្វើឲ្យប៉ូលិសចុះមកអន្តរាគមន៍ ធ្វើកំណត់ហេតុ ស្វែងរកមុខមុខសញ្ញាមកផ្តន្ទាទោសតាមច្បាប់។ ក្រោយសមត្ថកិច្ចស៊ើបអង្កេត ស្ត្រីរូបនេះក៏បានសារភាពថា គាត់ប្រឌិតរឿងនេះចោរប្លន់នេះឡើងតែប៉ុណ្ណោះ។
ហេតុការណ៍នេះ បានកើតឡើង កាលពីព្រឹកថ្ងៃទី៤ ខែមីនា ឆ្នាំ២០២១ នៅភូមិស្វាយស ឃុំតាប៉ុន ស្រុកសង្កែ ខេត្តបាត់ដំបង។
ស្ត្រីដែលយកគ្រឿងអលង្ការទៅលក់យកលុយចាយ ប្រឌិតរឿងចោរប្លន់នេះ មានឈ្មោះម៉ៅ ចំរើន អាយុ៣៦ឆ្នាំរស់នៅក្រុមទី០៣ភូមិស្វាយស ឃុំតាប៉ុន ស្រុកសង្កែ ខេត្តបាត់ដំបង។
ប្រភពពីសមត្ថកិច្ចបានឲ្យដឹងថា កាលពីព្រឹកថ្ងៃទី ៤ ខែ មីនា ឆ្នាំ២០២១ មានករណីឆោឡោមួយកើតឡើង ដោយសារស្រ្តីឈ្មោះ ម៉ៅ ចំរេីន អាយុ៣៦ឆ្នាំ រស់នៅក្រុមទី០៣ ភូមិស្វាយស ឃុំតាប៉ុន ស្រុកសង្កែ ខេត្តបាត់ដំបង បានប្រាប់ថា រូបគាត់ត្រូវបានជនល្មើសចំនួន០៣នាក់ ប្រដាប់ដោយអាវុធខ្លីនិងកាំបិតភ្ជង់ប្លន់យកទ្រព្យសម្បត្តិ មានប្រាក់និងគ្រឿងអលង្កការ ហើយគេចខ្លួនបាត់។
ក្រោយទទួលបានព័ត៌មាននេះភ្លាម លោកឧត្តមសេនីយ៍ទោ សាត គឹមសាន ស្នងការនៃស្នងការដ្ឋាននគរបាលខេត្តបាត់ដំបង បានដាក់បទបញ្ជាឱ្យលោកវរសេនីយ៍ឯក លឹម ពុទ្ធីឡា ស្នងការរងផែនការងារនគរបាលព្រហ្មទណ្ឌ និងលោកវរ សេនីយ៍ឯក ស៊ុន សុវណ្ណ អធិការនគរបាលស្រុកសង្កែ ធ្វើការស្រាវជ្រាវស៊ើបអង្កេតជាបន្ទាន់។
ឆ្លងតាមរយៈការស្រាបជ្រាវដោយយកចិត្តទុកដាក់នោះ ទីបំផុតស្រ្តីឈ្មោះ ម៉ៅ ចំរើន ដែលអះអាងថា គាត់ជាជនរងគ្រោះនោះបានសារភាពថា អ្វីដែលរូបបគាត់បានលើកឡើងថា មានក្រុមចោរប្រដាប់អាវុធចូលប្លន់ក្នុងលំនៅដ្ឋាននោះ គឺជារឿងដែលគាត់បានប្រឌិតឡើងតែប៉ុណ្ណោះ ដែលការពិត គឺមិនមានទេ។
ស្ត្រីរូបនេះបានសារភាពនៅចំពើមុខសមត្ថកិច្ចថា មួយរយៈចុងក្រោយនេះ រូបគាត់យកប្រាក់និងគ្រឿងអលង្កការទៅលក់យកលុយ ចាយវាយអស់ហើយ ដោយសារខ្លាចប្តីដឹង ស្តីបន្ទោស គាត់ក៏បានប្រឌិតរឿងចោរប្លន់នេះឡើង។
ស្ត្រីរូបនេះ ក៏បានទទួលស្គាល់កំហុសដែលគាត់បានប្រឌិតឡើង បង្កឱ្យមានការភ្ញាក់ផ្អើលនិងចលាចលក្នុងសង្គម ។ ហើយគាត់សន្យាថា នឹងមិនប្រព្រឹត្តសកម្មភាពបែបនេះបន្តទៀតនោះទេ។
បច្ចុប្បន្ន ស្ត្រីរូបនេះ ត្រូវបានសមត្ថកិច្ចអនុញ្ញាតឲ្យត្រឡប់ទៅផ្ទះវិញហើយ៕