អ្នកនាំពាក្យគណៈកម្មាធិការរៀបចំការបោះឆ្នោតបានអោយដឹងកាលពីថ្ងៃអង្គារទី១៤ ធ្នូ ឆ្នាំ ២០២១ ថា ប្រធានាធិបតីហ្វីលីពីនលោកឌូតើតេបានដកបេក្ខភាពរបស់គាត់សម្រាប់អាសនៈព្រឹទ្ធសភា។នេះបើយោងតាមការចុះផ្សាយរបស់សាព័ត៌មានសិង្ហបុរី CNA។អាណត្តិប្រធានាធិបតីរយៈពេលប្រាំមួយឆ្នាំរបស់លោក នឹងបញ្ចប់នៅខែមិថុនាឆ្នាំ2022ហើយលោកត្រូវបានហាមឃាត់ដោយរដ្ឋធម្មនុញ្ញពីការស្វែងរកតំណែងប្រធានាធិបតីមួយអណត្តិទៀត។
កាលពីព្រឹកថ្ងៃអង្គារនេះដែរ ជំនួយការរបស់លោក គឺព្រឹទ្ធសមាជិក Christopher Bong Go បានធ្វើការសម្រេចចិត្តជាផ្លូវការក្នុងការលាឈប់ពីការប្រកួតប្រជែងតំណែងប្រធានាធិបតី បន្ទាប់ពីបានប្រកាសកាលពីខែមុនថា លោកនឹងមិនប្រកួតប្រជែងតំណែងកំពូលរបស់ប្រទេសនេះទៀតទេ។ភ្លាមៗនោះ គេមិនទាន់ដឹងច្បាស់ថា ហេតុអ្វីបានជាលោកឌូតើតេដក ខ្លនចេញពីការបោះឆ្នោតជ្រើសរើសសមាជិកព្រឹទ្ធសភានោះទេ ប៉ុន្តែលោកបាននិយាយកាលពីខែតុលាថា លោកនឹងចូលនិវត្តន៍ពីនយោបាយ។ មិនមានការអត្ថាធិប្បាយភ្លាមៗពីគណបក្សនយោបាយរបស់លោកទេ។
ការដកខ្លួនរបស់លោកមិនមានន័យថាលោកគ្រោងនឹងចូលនិវត្តន៍ពីឆាកនយោបាយបន្ទាប់ពីការបោះឆ្នោតនៅក្នុងខែឧសភានោះទេ។ នៅក្រោមច្បាប់បោះឆ្នោត គាត់អាចជំនួសបេក្ខជនម្នាក់ទៀតដែលមាននាមត្រកូលរបស់គាត់សម្រាប់មុខតំណែងនេះ។កូនស្រីរបស់លោកឌូតើតេ គឺលោកស្រី Sara កំពុងឈរឈ្មោះជាអនុប្រធានាធិបតី ខណៈដែលកូនប្រុសរបស់គាត់ Sebastian កំពុងប្រកួតប្រជែងសម្រាប់តំណែងអភិបាលក្រុងនៅក្នុងបន្ទាយដ៏រឹងមាំភាគខាងត្បូងនៃទីក្រុង Davao របស់គ្រួសារលោក។
នៅក្នុងសុន្ទរកថាកាលពីយប់ថ្ងៃចន្ទ លោក ឌូតើតេ បាននិយាយថា រដ្ឋបាលរបស់លោកនឹង ធានាឱ្យមានការបោះឆ្នោតដោយស្មោះត្រង់ សន្តិភាព គួរឱ្យទុកចិត្ត និងដោយសេរី នៅឆ្នាំ 2022។ការឈរឈ្មោះរបស់គាត់សម្រាប់តំណែងសមាជិកព្រឹទ្ធសភាត្រូវបានគេមើលឃើញថាជាការប៉ុនប៉ងដើម្បីបន្តអាជីពនយោបាយខណៈដែលលោកកំពុងប្រឈមមុខនឹងការស៊ើបអង្កេតអន្តរជាតិនៅក្នុងសង្គ្រាមគ្រឿងញៀនដ៏សាហាវរបស់លោកពេលឡើងកាន់អំណាចកាលពីឆ្នំា២០១៦ដែលបានសម្លាប់មនុស្សច្រើនពាន់នាក់៕