នៅក្នុងដំណើរបំពេញទស្សនកិច្ចមកកាន់ប្រទេសឥណ្ឌូណេស៊ីរដ្ឋមន្ត្រីការបរទេសលោក Antony Blinken បានលើកឡើងពី យុទ្ធសាស្ត្ររបស់សហរដ្ឋអាមេរិកដើម្បីធ្វើឱ្យ សម្ព័ន្ធភាពសន្ធិសញ្ញាអាស៊ីរបស់ខ្លួនកាន់ តែស៊ីជម្រៅជាមួយនឹងការផ្តល់ជូន នូវការការពារជាតិ និងស៊ើបការណ៍ជាមួយដៃគូនៅក្នុងតំបន់ឥណ្ឌូប៉ាស៊ីហ្វិកដែលកំពុងព្រួយបារម្ភកាន់តែខ្លាំងឡើងចំពោះ សកម្មភាពឈ្លានពាន របស់ចិន។នេះបើយោងតាមការចេញផ្សាយរបស់សារព័ត៌មានរ៉យទ័រកាលពីថ្ងៃអង្គារទី ១៤ ធ្នូ ២០២១។នេះគឺជាដំណើរទស្សនកិច្ចលើកដំបូងទៅកាន់តំបន់អាស៊ីអាគ្នេយ៍ (អាស៊ាន) ចាប់តាំងពីលោកប្រធានាធិបតី ចូ បៃឌិន ចូល កាន់តំណែងក្នុងខែមករា។ការបំពេញទស្សនកិច្ចនេះ ក្នុងគោលបំណងពង្រឹងទំនាក់ទំនងបន្ទាប់ពីរយៈពេលនៃភាពមិនច្បាស់ លាស់អំពីការប្តេជ្ញាចិត្តរបស់សហរដ្ឋអាមេរិកចំពោះអាស៊ីក្រោមការគ្រប់គ្រងរបស់លោកដូណាល់ត្រាំ។
ក្នុងអំឡុងពេលនៃដំណើរទស្សនកិច្ចទៅកាន់ប្រទេសឥណ្ឌូណេស៊ីលោកBlinkenបានពណ៌នាឥណ្ឌូប៉ាស៊ីហ្វិក ថាជាតំបន់ដែល មានថាមពលខ្លាំងបំផុតរបស់ពិភពលោកហើយ គ្រប់គ្នាមានភាគហ៊ុនក្នុងការធានានូវស្ថានភាពដែលមិនមានការបង្ខិតបង្ខំ និងការបំភិតបំភ័យ ដែលលោកនិយាយសំដៅចំពោះប្រទេសចិន។រដ្ឋមន្ត្រីការបរទេសអាមេរិកនៅថ្ងៃនេះដែរក៏បានជំរុញឱ្យប្រទេសចិនបញ្ឈប់ សកម្មភាពឈ្លានពាន នៅក្នុងឥណ្ឌូប៉ាស៊ី ហ្វិក ដោយនិយាយក្នុងអំឡុងពេលដំណើរទស្សនកិច្ចទៅកាន់តំបន់នេះខណៈដែលទីក្រុងវ៉ាស៊ីនតោនព្យាយាមពង្រឹងសម្ព័ន្ធភាពប្រឆាំងនឹងទីក្រុងប៉េកាំង។
លោកបានបញ្ជាក់ថាសហរដ្ឋអាមេរិក សម្ព័ន្ធមិត្តរបស់ ខ្លួននិងអ្នកទាមទារសមុទ្រចិនខាងត្បូងមួយចំនួន នឹងរុញច្រានប្រឆាំង នឹងសកម្មភាពខុសច្បាប់ណាមួយរបស់ចិន។ក្នុងសុន្ទរកថានៅឯសាកលវិទ្យាល័យមួយលោកបានថ្លែងថាយើង នឹងធ្វើការជា មួយសម្ព័ន្ធមិត្ត និងដៃគូរបស់យើងដើម្បី ការពារសណ្តាប់ធ្នាប់ផ្អែកលើច្បាប់ ដែលយើងបានបង្កើតជាមួយគ្នាអស់ជាច្រើនទស វត្សរ៍ ដើម្បីធានាថាតំបន់នេះនៅតែ បើកចំហ និងអាចធ្វើដំណើរចូលបាន ។ខ្ញុំសូមបញ្ជាក់ឱ្យច្បាស់ថាគោលដៅនៃការការពារ សណ្តាប់ធ្នាប់ដែលផ្អែកលើច្បាប់គឺមិនមែនដើម្បីរក្សាប្រទេសណាមួយឱ្យធ្លាក់ចុះនោះទេ។ ផ្ទុយទៅវិញ គឺដើម្បីការពារសិទ្ធិ របស់ប្រទេសទាំងអស់ក្នុងការជ្រើសរើសផ្លូវរបស់ពួកគេ ដោយមិនមានការបង្ខិតបង្ខំ និងការគំរាមកំហែង។
គួររំឭកថាបន្ទាប់ពីបញ្ចប់ការបំពេញទស្សនកិច្ចនៅឥណ្ឌូណេស៊ីលោក Antony Blinken នឹងបន្តដំណើបំពេញទស្សនកិច្ច ប្រទេសម៉ាឡេស៊ី និងថៃនៅក្នុងសប្ដាហ៍នេះ ៕