យោងតាមប្រភពព័ត៌មានរដ្ឋ រុស្ស៊ីInterfax ដកស្រង់សម្តីមន្ត្រីយោធាជាន់ខ្ពស់ម្នាក់ចេញផ្សាយកាលពីថ្ងៃ ចន្ទ ទី ២៧ធ្នូ ២០២១ បានអោយដឺងថា កងកម្លាំងយោធារុស្ស៊ីកំពុងធ្វើសមយុទ្ធយោធាទ្រង់ទ្រាយធំមួយដើម្បីទប់ស្កាត់ការវាយលុកតាមអាកាសដ៏ធំពីសត្រូវ លោកខាងលិចដែលសំដៅទៅសហរដ្ឋអាមេរិកនិងអង្គការណាតូ។ការធ្វើសមយុទ្ធនេះមិនមែនជារឿងចៃដន្យទេតែវាកើតឡើងចំពេលមានការប្រឈមមុខដាក់គ្នាកាន់តែខ្លាំងឡើងរវាងទីក្រុងមូស្គូ និងលោកខាងលិចព្រមទាំងអង្គការណាតូផងដែរ ។
Interfax បានរាយការណ៍ថា ទាហានរុស្ស៊ីប្រហែល 1000 នាក់បានចូលរួមក្នុងប្រតិបត្តិការនេះ។រុស្ស៊ីត្រូវបានគេរាយការណ៍ថាបានប្រមូលផ្តុំកងទ័ពរាប់ម៉ឺននាក់ឈរជើងក្បែរប្រទេសអ៊ុយក្រែនហើយបានទាមទារកុំឱ្យប្រទេសជិតខាងភាគខាងត្បូងរបស់ខ្លួនមួយនេះត្រូវបានគេអនុញ្ញាត្តចូលក្នុងអង្គការណាតូ។កងទ័ពមួយចំនួនបានចាប់ផ្តើមត្រឡប់ទៅមូលដ្ឋានអចិន្ត្រៃយ៍វិញបន្ទាប់ពីសមយុទ្ធនៅជិតអ៊ុយក្រែន។ការធ្វើសមយុទ្ធនេះក៏កើតមានឡើងស្របពេលដែលប្រធានាធិបតីលោក វ្ល៉ាលឌីមៀ ពូទីន បានគំរាមថា បើសិនជាអាមេរិកនិងអង្គការណាតូច្រានចោលសំណើរបស់ខ្លួននោះ រុស្ស៊ីនឹងឆ្លើយតបទៅវិញបើទោះជាលោកមិនប្រាប់លម្អិតក៏ដោយ។កាលពីសប្តាហ៍មុនរុស្ស៊ីបានដាក់សំណើមួយទៅអោយអាមេរិកនិងណាតូដែលក្នុងនោះមាន២ចំណុចសំខាន់គឺរារាំងមិនអោយអ៊ុយក្រែនចូលអង្គការណាតូនិងមិនអោយអង្គការនេះដាក់ពង្រាយកងទ័ណនិងមីស៊ីលបន្ថែមទៀត។
កាលពីចុងសប្តាហ៍មុននៅក្នុងកិច្ចសម្ភាសន៍ពិសេសមួយអ្ន កសារព័ត៌មានបានសួរលោកពូទីនថា តើរដ្ឋាភិបាលរបស់លោកនឹងធ្វើអ្វីប្រសិនបើលោកខាងលិចបដិសេធការទាមទាររបស់លោក។លោកពូទីនបានឆ្លើយថា ការឆ្លើយតបរបស់យើងអាចមានភាពផ្សេងៗគ្នាជាច្រើនដោយលើកឡើងថាទីក្រុងម៉ូស្គូអាចមានជម្រើសជាច្រើននៅក្នុងចិត្ត។វានឹងអាស្រ័យលើសំណើរបស់អ្នកជំនាញយោធារបស់យើង។
លោកពូទីនបានរំលឹកឡើងវិញថា រុស្ស៊ីចង់ជៀសវាងការកើនឡើងបន្ថែមទៀត និងស្វែងរកដំណោះស្រាយការទូតជាមួយប្លុកដែលដឹកនាំដោយសហរដ្ឋអាមេរិក។ក្នុងអំឡុងសន្និសីទសារព័ត៌មានចុងឆ្នាំលោកបានសង្កត់ធ្ងន់ថារុស្ស៊ីអាចនឹងត្រូវបង្ខំចិត្តឱ្យសងសឹកចំពោះការឈ្លានពានដែលមិនអាចទទួលយកបានរបស់ណាតូ៕
