អូស្រា្ដលី៖អតីតតារាសម្ដែងដាញ់ ម៉ូនីកា ដែលកំពុងរស់នៅប្រទេសអូស្រា្ដលីជាមួយស្វាមីលោកប៊ុន ថែល រយៈពេលជិត១២ឆ្នាំទៅហើយនោះកន្លងមកនាងនៅតែផ្ទះនិងមើលថែរកូនៗ មិនបន្ដការច្រៀងសម្ដែងដូចតារាស្រីមួយចំនួនដែលយកប្ដីនៅបរទេសនោះទេ។ប៉ុន្ដែថ្មីៗនេះគេឃើញអ្នកនាងម៉ូនីកា បានចេញរកស៊ីវាយលុយទីផ្សារលក់គ្រឿងCosmetics តាមOnline ហើយរូបសម្រសប់នាងនៅតែមិនប្រែប្រួលទៅតាមវ័យខ្លាំងនោះទេ បើទោះជាពេលនេះនាងមានកូន២នាក់ទៅហើយក្ដី។គេចាំបានថាមុនផ្ទុះកូវីដអ្នកនាងម៉ូនីកា បានចុះឡើងមកស្រុកកំណើតជាញឹកញាប់ហើយនាងក៍ឆ្លៀតឡើងតាមបណ្ដារប៉ុស្ដិ៍ទូរទស្សន៍ទៀតផង បើទោះជានាងមិនដែលថតសម្ដែងភាពយន្ដឡើងវិញដូចអ្នកនាងអម្ពរ ទេវី និងសារ៉ាយ សក្ខណា ជាដើមក្ដី។ប៉ុន្ដែថ្មីៗនេះម៉ូនីកា ចាប់ផ្ដើមចេញមុខលក់គ្រឿងសម្អាងដោយពេលខ្លះស្លៀកពាក់បញ្ចេញស្បែកទៀតផង ខណៈដែលចំណងស្នេហានាងជាមួយស្វាមីកាន់តែបង្ហាញពីភាពផ្អែមល្ហែមស្នេហ៍និងរស់នៅយ៉ាងមានសុភមង្គលបើទោះជាមុនរៀបការមានអ្នកគាំទ្រម៉ូនីកា សម្ដែងក្ដីបារម្ភនិងអាណិតជំនួសនាងថាប្រាកដជាពិបាករក្សារស្នេហាព្រោះគេល្បីថាស្វាមីនាងជាបុរសកាចបន្ដិចក្ដី តែពេលនេះអ្វីៗបានបញ្ជាក់ច្បាស់ថាម៉ូនីកា និងប្ដីរស់នៅចុះសម្រុងគ្នាល្អណាស់ ហើយចំណងស្នេហាឆ្លងទ្វីពរយៈពេលជិត១២ឆ្នាំនេះពួកគេកាន់តែរស់នៅយ៉ាងមានក្ដីសុខថែមទៀត ក្រោយពីទទួលបានចំណងដៃកូនប្រុសស្រី២នាក់។
សូមរំលឹកថាដាញ់ ម៉ូនីកា ដែលធ្លាប់ល្បីល្បាញឈ្មោះខ្លាំងតាមរយៈរឿង”ទុំទាវ”នោះបានរៀបការជាមួយអាណិកជនខ្មែរនៅអូស្រា្ដលីលោកប៊ុន ថែល កាលពីថ្ងៃទី២៤ខែកុម្ភៈឆ្នាំ២០១០ ដែលពេលនេះកូនស្រីច្បងរបស់នាងមានអាយុ១០ឆ្នាំ និងកូនប្រុសអាយុជាង៦ឆ្នាំ។ម៉ូនីកា ធ្លាប់ធានាយកម្ដាយទៅអូស្រា្ដលីជាញឹកញាប់ ពិសេសគឺអំឡុងពេលនាងសម្រាលកូន តែម្ដាយអតីតតារាច្នើមរូបនេះធ្លាប់ថាលោកស្រីមិនចេះរស់នៅស្រុកគេនោះទេ ទើបបានតែចុះឡើងៗ។
ក្រៅពីដាញ់ ម៉ូនីកា តារាដែលយកប្ដីនៅអូស្រា្ដលីមានដូចជាគឹម លីហ្សា(លែងលះ),អឿន ដាលីស ,សុខ ចាន់ណានូ និងជាតិ សុច្ចកា ជាដើម។ចំពោះម៉ូនីកា តាំងពីមានប្ដីនាងបានបោះបង់អាជីពសិល្បៈចោលទាំងស្រុងដើម្បីផ្គាប់ចិត្តស្វាមីបើទោះជានាងធា្លប់អះអាងថាអារម្មណ៍របស់នាងនៅតែស្រលាញ់សិល្បៈនិងនឹករលឹកដល់មិត្តរួមអាជីពក្ដី៕
