ដូចការគ្រោងទុកទីបំផុតសហរដ្ឋអាមេរិកបានឆ្លើយតបជាលាយលក្ខ័អក្សរទៅភាគីរុស្ស៊ីដោយច្រានចោលការទាមទាររបស់រុស្ស៊ីដែលបានហាមប្រទេសអ៊ុយក្រែនមិនអោយចូលជាសមាជិករបស់អង្គការណាតូ។នេះបើយោងតាមប្រភពព័ត៌មានប៊ីប៊ីស៊ី ចេញផ្សាយកាលពីថ្ងៃព្រហស្បតិ៍ទី ២៧ មករា ២០២២។រដ្ឋលេខាធិការលោកAntony Blinken កំពុងផ្តល់ឱ្យរុស្ស៊ីនូវការឆ្លើយតប ជាផ្លូវការចំពោះការទាមទាររបស់ខ្លួនដើម្បីដោះស្រាយវិបត្តិអ៊ុយក្រែន។លោក Blinken មិនបានផ្តល់សម្បទានអោយរុស្ស៊ីទេប៉ុ ន្តែបាននិយាយថា លោកកំពុងផ្តល់ជូនរុស្ស៊ីនូវផ្លូវការទូតដ៏ជាក់លាក់មួយឆ្ពោះទៅមុខ ប្រសិនបើរុស្ស៊ីជ្រើសរើសវា។រដ្ឋមន្ត្រីរុស្ស៊ីម្នាក់បាននិយាយថាប្រទេសរបស់លោកនឹងសិក្សាការឆ្លើយតបរបស់លោកBlinkenដែលធ្វើឡើងដោយមានការ សម្របសម្រួលជាមួយណាតូ។លោក Blinken បានបញ្ជាក់ថា ការឆ្លើយតបរបស់សហរដ្ឋអាមេរិកបានធ្វើឱ្យ គោលការណ៍ស្នូល របស់ខ្លួនច្បាស់លាស់រួម ទាំងអធិបតេយ្យភាពរបស់អ៊ុយក្រែន និងសិទ្ធិរបស់ខ្លួនក្នុងការជ្រើសរើសអ៊ុយក្រែនធ្វើជាផ្នែកមួយនៃសម្ព័ន្ធភាពសន្តិ សុខជាមួយណាតូ។លោកបានបន្តទៀតថា មិនគួរមានការងឿងឆ្ងល់អំពីគោលបំណង ដ៏ធ្ងន់ធ្ងររបស់យើងនៅពេលនិយាយ អំពីការទូតនោះទេ។យើងកំពុងធ្វើសកម្មភាពដោយផ្តោតការយកចិត្តទុកដាក់ និងកម្លាំងស្មើៗគ្នាដើម្បីពង្រឹងការការពារ របស់អ៊ុយក្រែន និងរៀបចំការឆ្លើយតបរួមគ្នាយ៉ាងឆាប់រហ័សចំពោះការឈ្លានពានរបស់រុស្ស៊ី ។
ណាតូច្រានចោលសំណើរបស់រុស្ស៊ី
មិនខុសពីការសម្រេចចិត្តរបស់អាមេរិក អង្គការណាតូ ក៏បានច្រានចោលសំណើរបស់រុស្ស៊ីដែរ។អគ្គលេខាធិការអង្គការណាតូលោក Jens Stoltenberg បានប្រាប់អ្នកយកព័ត៌មានកាលពីថ្ងៃព្រហស្បតិ៍ ថា ខ្លួននឹងមិនសម្របសម្រួលលើការពង្រីកកងកម្លាំងនិងការដាក់ពង្រាយសព្វាវុធសក្តានុពលទៅកាន់ប្រទេសអ៊ុយក្រែន ហ្សកហ្ស៊ី និងអតីតសាធារណរដ្ឋសូវៀតផ្សេងទៀតទេ ដោយសារតែវាប៉ះទង្គិចគ្នាជាមួយនឹងគោលការណ៍ស្នូល នៃសម្ព័ន្ធភាព។
អង្គការណាតូបានកំណត់គោលការណ៍សំខាន់ចំនួនបីរួមមាន
១-បង្កើតទំនាក់ទំនងការទូតឡើងវិញរវាង NATO និងរុស្ស៊ី ដែលលោកបានបន្ទោសក្រុងម៉ូស្គូចំពោះការផ្តាច់ខ្លួន។
២– ការត្រៀមខ្លួនរបស់ណាតូក្នុងការ ចូលរួមក្នុងការសន្ទនានិង ស្តាប់ការព្រួយបារម្ភរបស់រុស្ស៊ីខណៈពេលដែលគោរពសិទ្ធិរបស់ប្រទេសនីមួយៗក្នុងការជ្រើសរើសការរៀបចំសន្តិសុខរបស់ខ្លួន។លោក Stoltenberg បាននិយាយថា ប្រទេសរុស្ស៊ីគួរតែដើរចេញពី ការឈ្លានពានដែលសំដៅទៅលើសម្ព័ន្ធមិត្តណាតូ ហើយដកខ្លួនចេញពីប្រទេស អ៊ុយក្រែន ហ្ស៊កហ្ស៊ី និងម៉ុលដាវី”
៣-កិច្ចសហប្រតិបត្តិការដែលអាចធ្វើទៅបាន
ពាក់ព័ន្ធនឹង ការកាត់បន្ថយហានិភ័យនិងកិច្ចព្រមព្រៀងតម្លាភាពស្តីពីសមយុទ្ធក៏ដូចជាសំណើគ្រប់គ្រងអាវុធដែលរុស្ស៊ីបានប្រកែកកាលពីមុនមក។លោកStoltenbergបាននិយាយថាដំណោះស្រាយនយោបាយនៅតែអាចធ្វើទៅបាន ប៉ុន្តែជាការពិតណាស់ រុស្ស៊ីត្រូវតែចូលរួមដោយស្មោះត្រង់ដោយចោទប្រកាន់ទីក្រុងម៉ូស្គូពី ការឈ្លានពាន”ប្រឆាំងនឹងអ៊ុយក្រែនចាប់តាំងពីឆ្នាំ 2014 នៅលើតំបន់គ្រីមៀរ៕