ភ្នំពេញ៖តារាចម្រៀងសំនៀងក្រអួនក្រអៅនាងបាន មុន្នីល័ក្ខ ត្រូវបានគេកត់សម្គាល់ថាសម្រស់របស់នាងមានការប្រែប្រួលច្រើននៅរយៈពេលចុងក្រោយនេះដូចជាស្បែកសាច់កាន់តែសខ្ចីនិងចង្ការវែងហើយស្រួចជាងមុនទើបនាំឲ្យមានការសង្ស័យថាតារាថោនរូបនេះកែសម្ផស្សដើម្បីយកត្រេមុខអក្សរV ។ប៉ុន្ដែការទាក់ទងសុំការបំភ្លឺពីមុន្នីល័ក្ខ មិនទាន់ទទួលបានចម្លើយឡើយកាលពីពេលថ្មីៗនេះព្រោះទូរស័ព្ទនាងតេមិនចូល។យ៉ាងណាគេកត់សម្គាល់ថាភាពប្រែប្រួលសម្រស់របស់មុន្នីល័ក្ខ នៅពេលនេះក្រោយពីនាងបានចែកផ្លូវគ្នាជាមួយអតីតគូដណ្ដឹងលោកDj Cake អស់រយៈពេលជាង៣ឆ្នាំមកហើយ ប៉ុន្ដែអ្នកទាំង២មិនបានយកគ្នាជាសត្រូវនោះទេពោលគឺនៅពេលដែលជួបគ្នាដោយចៃដន្យនៅកម្មវិធីណាមួយនោះអតីតគូស្នេហ៍តារា១គូនេះនៅតែនិយាយរកគ្នាដូចមុនហើយថែមទាំងថតរូបជុំគ្នាហាក់គ្មានរឿងអ្វីកើតឡើង។ប៉ុន្ដែមុន្នីល័ក្ខ ធ្លាប់ប្រាប់អ្នកយកព័តមានយើងថាម្ដាយនាងមិនចង់ឲ្យខាងសារព័តមានភ្ជាប់ការសរសេរអត្ថបទនាងដោយរំលឹករឿងអតីតកាលជាមួយDj Cake ទៀតឡើយព្រោះថាជារឿងចាស់យូរណាស់ហើយ ។
អតីតតារាចម្រៀងហង្សមាសបាន មុន្នីល័ក្ខ ត្រូវបានគេចាត់ទុកថានាងច្រៀងបទស្លូវបានល្អជាងគេនៅថោន ក្រោយមាស សុខសោភា ដើរចេញទើបធ្វើឲ្យបណ្ដារកម្មវិធីមង្គលការជាច្រើនតែងតែលេចមុខនាង។ប៉ុន្ដែមុន្នីល័ក្ខ ដែលមុននេះឈឺក្រពះខ្លាំងរហូតចូលដេកពេទ្យជាបន្ទាន់នោះហាក់ចាញ់ប្រៀបការច្រៀងបទញាក់និងលេងក្បាច់រាំរបស់តារារួមទ្រនុំនាងរ៉ាប៊ី ទៅវិញទើបធ្វើឲ្យនាងមិនសូវមានសន្ទុះលេចធ្លោរខ្លាំងឡើយនៅថោន ។ដោយឡែកទាក់ទងរឿងបេះដូងវិញមុន្នីល័ក្ខ ក៍មិនដែលបង្ហាញការកៀកកើយគូស្នេហ៍ថ្មីជាចំហម្ដងណាដែរ បើទោះជាមុននេះមានព័តមានថាថៅកែដីឡូតិ៍ម្នាក់ជាប់ចិត្តខ្លាំងទាំងសម្លេងនិងរូបឆោមនាងក្ដី។
ក្រៅពីបាន មុន្នីល័ក្ខ តារាដែលចេញពីហង្សមាសចូលថោន មានដូចជានាងសុន ស្រីពេជ្រ,យក់ ថិតរដ្ឋា និងឈិត សុវណ្ណបញ្ញា ជាដើម តែពួកគេមិនសូវទទួលបានភាពជោគជ័យខ្លាំងនោះទេ។ដោយឡែកសម្រាប់មុន្នីល័ក្ខ នៅរដូវក្ដៅនេះនាងរកប្រាក់ចំណូលបានច្រើនពីការច្រៀងតាមបណ្ដារកម្មវិធីដែលរៀបចំដោយAgency ទាំងឡាយ៕
