ភ្នំពេញ៖អ៊ីវ៉ា ឈានជើងចូលសិល្បៈរយៈពេលជាង១០ឆ្នាំមកហើយដែលពេលនេះនាងនៅតែរក្សារសម្រស់ពីធម្មជាតិ១០០%ដោយគ្មានការកែកុនផ្នែកណាមួយនេះទេ បើទោះជាមិត្តភក្ដិរួមអាជីពជុំវិញនាងពួកគេសុទ្ធតែបានកែផ្នែកមួយចំនួនដើម្បីឲ្យមានភាពទាក់ទាញថែមទៀតក្ដី តែស្រីនាថ ខ្លាចចុងកាំបិតវះកាត់សាច់នាងណាស់ ហេតុនេះហើយបានជាសម្រស់របស់នាងមិនមានការប្រែប្រួលច្រើនឡើយ។ការមិនចង់បានសម្រស់សប្បនិម្មិតមកបន្លំភ្នែករបស់អ៊ីវ៉ា នៅពេលនេះគឺស្របគ្នាទៅនិងបំណងរបស់ឪពុកនាងលោកអ៊ូ វ៉ាវ ដែលចង់ឲ្យកូនស្រីសំណព្វចិត្តរបស់លោកគេចឲ្យផុតពីការកែផ្នែកណាមួយ ព្រោះថាការបាត់បង់សម្រស់ដើមដោយជំនួសវិញដោយសម្ផស្សក្លែងក្លាយនោះលោកមិនពេញចិត្តនោះទេ។ប៉ុន្ដែលោកវ៉ាវ ធ្លាប់ប្រាប់អ្នកយកព័តមានយើងថាលោកមិនដែលហាមកូនស្រីមិនឲ្យកែសម្រស់នោះទេ តែកូនរបស់លោកដឹងខ្លួនឯងតែម្ដងដោយលោកមិនចាំបាច់ប្រាប់ ហើយនាងរីករាយចំពោះការទទួលបានបទាំងសម្រស់និងកេរ្ដិ៍ឈ្មោះដូចសព្វថ្ងៃ។
តារាចម្រៀងសាន់ដេឃីន ស្រីនាថ ហៅអ៊ីវ៉ា បានសម្រេចចិត្តបន្ដច្រៀងតឲ្យផលិតកម្មសាន់ដេដោយគ្មានការកុងត្រាដោយមើលរំលងផលិតកម្មធំ៣ដែលចាំត្រងនាងនោះគឺហង្សមាស,Galaxy និងថោន។ការមិនផ្លាស់ទ្រនុំរបស់អ៊ីវ៉ា នៅពេលនេះ ក្រោយលោកវ៉ាវ ថាកូនស្រីលោកបានចាត់ទុកសាន់ដេ ប្រៀបបានជាឪពុកម្ដាយទី២ព្រោះទ្រនុំមួយនេះបានផ្ដល់ឱកាសឲ្យអ៊ីវ៉ា បានសាងកេរ្ដិ៍ឈ្មោះល្បីល្បាញដល់សព្វថ្ងៃ។ដោយមើលឃើញការមិនចង់ឃ្លាតពីទ្រនុំដំបូងរបស់ខ្លួនទៅជ្រកនៅផ្ទះទី២នោះទើបសាន់ដេបានផ្ដល់សិទ្ធិយ៉ាងពិសេសឲ្យអ៊ីវ៉ា តាមរយៈរាល់បទចម្រៀងទាំងឡាយដែលទម្លាក់ឲ្យនាងច្រៀងហើយបើនាងមិនពេញចិត្តបទនោះអ៊ីវ៉ា អាចប្រកែកមិនច្រៀងបាន ពោលគឺនាងថតជាAudio និងMV បានតែបទណាដែលនាងស្រលាញ់ពេញចិត្តប៉ុណ្ណោះ។
តែលោកវ៉ាវ ថាទោះជាយ៉ាងណាក្ដីនៅពេលខាងមុខគ្មានអ្នកណាដឹងមុនថាមានរឿងអ្វីកើតឡើងនោះទេពោលគឺអ៊ីវ៉ា អាចនឹងសម្រេចចិត្តធ្វើការទៅតាមពេលវេលា ដែលអាចនិយាយបានថានាងនឹងពិចារណាទៅផលិតកម្មណាមួយដែរ បើសិនជាយល់ឃើញថាទីនោះសាកសមជាមួយនាង។ចំពោះអ៊ីវ៉ា ថានាងមិនចង់និយាយថាចង់ទៅផលិតកម្មណាមុនរឿងកើតឡើងនោះទេ ព្រោះបច្ចុប្បន្ននាងនៅតែជាតារាសាន់ដេដដែល។ចំណែកទាក់ទងរឿងគូជីវិតវិញពេលនេះអ៊ីវ៉ា ឈានចូលវ័យ២៨ឆ្នាំទៅហើយដែលតាមការសន្យារបស់នាងថានៅពេលគម្រប់អាយុ៣០ឆ្នាំនឹងរៀបការប្ដីពោលគឺនៅឆ្នាំ២០២៤ ខាងមុខនេះ ខណៈដែលថ្មីៗអ៊ីវ៉ា បង្ហើបថាអនាគតស្វាមីរបស់នាងជាអ្នកធ្វើការពាក់ព័ន្ធជាមួយវិស័យកីឡារ តែនាងមិនទាន់បង្ហាញមុខបុរសនោះថាជាអ្នកណាឡើយ៕