ភ្នំពេញ៖កែវ ពេជ្រពិសី ដែលសាកល្បងចេញបង្ហាញម៉ូដជាលើកដំបូងកាលពីថ្ងៃទី៦ខែមីនាឆ្នាំ២០២២ ក្នុងពិធីមួយរបស់មិត្តភក្ដិដ៍ជិតដិតរបស់នាងគឺអ្នកនាងដាញ់ ម៉ូនីកា ក្រោយនាងសម្រាលកូននោះបានឲ្យដឹងថានាងមិនទាន់កំណត់ពីពេលវេលាជាក់លាក់ណាមួយក្នុងការឈានជើងចូលប្រឡូកក្នុងអាជីពសម្ដែងសារជាថ្មីនោះទេ ព្រោះពេលនេះកូនប្រុសទើបមានអាយុជាង៥ខែ ។យ៉ាងណានាងថាឱកាសនៃការវិលមករកអាជីពចាស់នៅតែមានភាគរយខ្ពស់ដដែលបើទោះជាឥឡូវនាងមានស្វាមីដែលជាអ្នកជំនួញម្នាក់ក្ដី ប៉ុន្ដែប្ដីនាងបានបើកសិទ្ធិឲ្យនាងលេងសិល្បៈតាមចិត្តចង់។អ្វីដែលគូរឲ្យចាប់អារម្មណ៍នោះពេជ្រពិសី ហាក់សម្ដែងការអង្វរដល់ផលិតករទាំងឡាយគឺសូមឲ្យតម្លៃតួទាំងអស់ដែលគេខំសន្សំកេរ្តិ៍ឈ្មោះរាប់ឆ្នាំមកផង កុំចេះតែទម្លាក់តួពេលគេអាយុ៣០ឆ្នាំជាងឲ្យសម្ដែងជាតួម្ដាយ និងសូមឲ្យក្រឡេកមើលតារាគេនៅប្រទេសជិតខាងយើងផងទៅ។នាងថាជូនកាលតារាដែលល្បីម្នាក់ផ្អាកពីសិល្បៈច្រើនឆ្នាំ ពេលត្រឡប់មកវិញលេងខុសបន្ដិចគឺធ្លាក់យកតែម្ដង។ពេជ្រពិសី ថានាងមិនមែនជាចឬកតួឯកឡើយ តែសូមឲ្យអ្នកដឹកនាំរឿងឲ្យតំណែងតួលេងនោះឲ្យសាកសមជាមួយនាងផង តែថ្ងៃក្រោយបើនាងមានអាយុច្រើន ឬចាស់ជាងនេះបន្ដិចទោះជាឲ្យធ្វើជាតួម្ដាយឬលោកយាយក៍នាងមិនបដិសេធឡើយ។
តាមរយៈការប្រកាន់ជំហចង់ថតសម្ដែងភាពយន្ដណាឲ្យត្រូវនិងអ្វីដែលនាងចង់បាន តែបែជាផលិតករមួយចំនួនចង់ឲ្យធ្វើជាតួម្ដាយនោះទើបកែវ ពេជ្រពិសី បានបោះបង់ភាពយន្ដចំនួន៥រឿងមកហើយដោយមិនទទួលថត។ប៉ុន្ដែពេជ្រពិសី ថាចិត្តនៅតែចង់វិលវិញនៅថ្ងៃណាមួយព្រោះជាអ្នកសិល្បៈទៅដល់ណាក៍នៅតែជាតារាហើយពេលនេះ១ប្រទេសគេទទួលស្គាល់ អីចឹងនៅពេលដែលកូននាងមានវ័យធំជាងនេះបន្ដិចនាងនឹងវិលមកថតសម្ដែងភាពយន្ដសារជាថ្មីទៅតាមរឿងណាដែលនាងពេញចិត្តសម្ដែង។
គូររំលឹកថាកែវ ពេជ្រពិសី បានលែងលះជាមួយអតីតប្ដីលោកចន្ថា ស្រី កាលពីឆ្នាំ២០១០ ក្រោយរៀបការមិនបាន១ខែនោះ ហើយអំឡុងធ្លាក់ខ្លួនមេម៉ាយជាង១០ឆ្នាំនេះពេជ្រពិសី បានប្រកែកទទួលស្នេហ៍ថ្មីជាបន្ដបន្ទាប់ទាំងបុរសនៅក្នុងនិងក្រៅស្រុក។តែដូចពាក្យគេថានៅពេលដែលគូព្រេងមកដល់ទោះជាប្រឹងប្រកែកយ៉ាងណាក៍មិនរូចនោះទើបកាលពីថ្ងៃទី១៧ខែឧសភាឆ្នាំ២០២០ ពិសី បានបើកបេះដូងទទួលយកស្នេហ៍ថ្មីតាមរយៈការភ្ជាប់ពាក្យជាមួយលោកពៅ សម្បត្ដិ ជាបុរសពោះម៉ាយវ័យជាង៥០ឆ្នាំមកពីកាណាដា ហើយកាលពីថ្ងៃទី១៤ខែកញ្ញាឆ្នាំ២០២១ នាងបានសម្រាលកូនប្រុស១ដោយដាក់ឈ្មោះថាដូរ៉ា ។ពេជ្រពិសី ថានាងគ្មានបំណងរៀបការជាលើកទី២នោះទេព្រោះថាទាំងរូបនាងនិងស្វាមីសុទ្ធតែបានឆ្លងកាត់ជីវិតអាពាហ៍ ពិពាហ៍ ដូចគ្នាម្ដងហើយ ហេតុនេះហើយរឿងដែលនាងត្រូវធ្វើនៅពេលនេះគឺការត្រៀមយកកូនទី២៕
