ភ្នំពេញ៖អំឡុងពេលដែលពេជ្រ សោភា កំពុងមានក្ដីសុខជាមួយសង្សារថ្មីនៅថ្ងៃឆ្លងឆ្នាំសកល២០២១ ឈានចូល២០២២ នោះលោកឆឹម សក្កដា ដែលពេលនោះស្រងូតស្រងាត់តែម្នាក់ឯងទាំងតូចចិត្តព្រោះតែសោភា ថាគូស្នេហ៍ថ្មីរបស់នាងព្រះយេស៊ូគ្រឹស្ដប្រទានឲ្យនាងនោះ ស្រាប់តែពេលនេះលោកតាំងចិត្តឈប់កើតទុក្ខរឿងស្នេហាមួយនេះទៀតហើយក្រោយលោកបានងាកទៅស្និតស្នេហ៍ជាមួយថៅកែពេជ្រម្នាក់។ប៉ុន្ដែគ្រប់សកម្មភាពទាំងអស់របស់លោកសក្កដា ត្រូវបានគេកត់សម្គាល់ថាចាប់ពីឈានចូលឆ្នាំ២០២២ នេះលែងត្រូវបានសោភា ចាប់អារម្មណ៍និងយកចិត្តទុកដាក់ទៀតហើយពោលគឺអ្វីៗនៅសល់តែស្រមោលប៉ុណ្ណោះ។ការប្រែប្រួលរបស់សោភា នៅពេលនេះត្រូវបានគេសន្និដ្ឋានថានាងមិនចង់ឲ្យមានការប៉ៈពាល់ឬរំខានដល់ចំណងស្នេហាថ្មី បើទោះជាគូស្នេហ៍ក្រោយរបស់នាងមិនដែលបង្ហាញរូបភាពប្រចណ្ឌឬហួងហែងនាងក្ដី។
គូរកត់សម្គាល់ថាពេជ្រ សោភា ធ្លាប់ប៉ៈរឿងស្នេហាមិនសមប្រកបជាច្រើនលើកច្រើនសារ តែនាងមិនដែលចាត់ទុករឿងស្នេហាធំបំផុតសម្រាប់ជីវិតនាងឡើយ តែអ្វីដែលនាងត្រូវធ្វើនិងផ្ដោតគឺក្រុមគ្រួសារនិងការងារសិល្បៈ។ការតាំងចិត្តបែបនេះទើបធ្វើឲ្យសោភា នៅតែអាចឈជើងយ៉ាងរឹងមាំក្នុងពិភពសិល្បៈ ខណៈដែលស្ថានភាពជីវភាពរបស់នាងនារយៈពេលចុងក្រោយនេះកាន់តែមានភាពល្អប្រសើរដោយសោភា រស់នៅផ្ទះវីឡារ និងជិះរថយន្ដទំនើបៗស្ទើគ្រប់ម៉ាកដែលគ្មានតារាណាអាចធ្វើបានដូចរូបនាងឡើយ។ប៉ុន្ដែអ្វីដែលគេមើលឃើញនោះគឺតាំងពីសោភា ភ្ជាប់ស្នេហ៍ថ្មីជាង២ខែមកនេះអ្នកមេម៉ាយរូបស្រស់មិនដែលហ៊ានបង្ហាញមុខគូស្នេហ៍ជាចំហម្ដងណាឡើយ ទើបធ្វើឲ្យចំណងស្នេហាថ្មីបាត់បង់ស្ទើតែទាំងស្រុងនូវភាពផ្អែមល្ហែម រហូតពិបាកក្នុងការសន្និដ្ឋានបានថាតើសោភា នឹងរក្សាររឿងស្នេហានេះបានយូអង្វែងប៉ុណ្ណានោះ?
អ្នកយកព័តមានយើងធ្លាប់ស្នើសុំឲ្យពេជ្រ សោភា បង្ហាញរូបមុខសង្សារថ្មី តែនាងបានប្រកែកដោយពេលនោះអះអាងថាកំពុងច្រៀងនៅខេត្តអ៊ីនធើណេតដើរយឺតពិបាកទាក់ទងគ្នា។យ៉ាងណាសោភា ធ្លាប់បង្ហាញសញ្ញាចង់រៀបការជាលើកទី២ ជាមួយសង្សាររូបសង្ហារម្នាក់នេះ ដែលនេះជាការផ្លាស់ប្ដូរចិត្ត១៨០ដឺក្រេ ព្រោះអំឡុងសោភា ស្អិតល្មូតជាមួយលោកសក្កដា នោះនាងវាចាថាមិនដែលមានកូនចិត្តចង់ក្រាបផ្ទឹមម្ដងទៀតនោះទេ ព្រោះថានាងបានឆ្លងកាត់ជីវិតអាពាហ៍ពិពាហ៍ម្ដងមកហើយ៕