ភ្នំពេញ៖វ៉ាង ស្រីណូ បានចុះឡើងពីអាមេរិកមកខ្មែរជាញឹកញាប់ជាងមុននៅរយៈពេលចុងក្រោយនេះ ហើយបច្ចុប្បន្ននាងមិនទាន់វិលទៅរដ្ឋកាលីហ្វ័រញ៉ាវិញឡើយ បើទោះនាងបានសិទ្ធិរស់នៅស្របច្បាប់(Visa)ក្ដី តែអតីតតារាស៊ិចស៊ីហាក់កាប់កបមុខជំនួញនៅខ្មែរតាមOnline និងការទិញលក់ផ្ទះរបស់នាងគ្រាន់បើទើបពន្យាពេលចេញទៅក្រៅស្រុក។ស្រីណូ ហាក់មានវ័យចំណាស់ជាងមុនបន្ដិចតែសាច់នាងនៅតែសខ្ចីរលើបរលោងម៉ដខៃដដែលហើយជាញឹកញាប់គេឃើញនាងជិះរថយន្ដទំនើបម៉ាកMercedes ២គ្រឿងឆ្លាស់គ្នា យ៉ាងកាលីពទៀតផង។ប៉ុន្ដែស្រីណូ ហាក់គ្មានសកម្មភាពសិល្បៈថ្មីៗនោះទេ បន្ទាប់ពីនាងបានផ្អាកនិងដើរចេញពីអាជីពចាស់នេះរយៈពេលជាង១០ឆ្នាំមកហើយ។ស្រីណូ ធ្លាប់ប្រាប់ថាការចេញចូលអាមេរិករបស់នាងគ្មានបញ្ហារចោទនោះទេ ព្រោះថានាងទទួលបានGreen Card ដែលមានសុពលភាព២ឆ្នាំតែអាចតបាន១០ឆ្នាំទៀតឯណ្ណោះ។យ៉ាងណានាងធ្លាប់សារភាពថាចំណងស្នេហានាងជាមួយថៅកែហាងមួយជាបុរសខ្មែរកាត់ចិននោះបានចែកផ្លូវគ្នាទៅហើយទាំងដែលមិនទាន់បានរៀបការ ខណៈដែលសព្វថ្ងៃនាងមិនទាន់មានគូសង្សារថ្មីនោះទេ។
ទោះជាវ៉ាង ស្រីណូ មិនទាន់បង្ហាញមុខគូស្នេហ៍ថ្មីមែន តែសម្រស់គូឲ្យបេតីដូចនាងប្រាកដជាមានបុរសមិនតិចនាក់ទេរងចាំត្រងស្នេហ៍អតីតតារារូបនេះ ស្របពេលដែលមុនផ្ដាច់ខ្លួនពីអាជីពសម្ដែងស្រីណូ បានប៉ៈស្នេហ៍ថៅកែសណ្ឋាគារមួយនៅក្រុងព្រះសីហនុ ផងដែរ។តែស្រីណូ មិនដែលបណ្ដើរម្ចាស់ចិត្តជាសាធារណៈឡើយ ហើយស្រាប់តែពេលនេះសា្ងត់ៗនាងថាបានចែកផ្លូវជាមួយសង្សារនៅអាមេរិកទៅវិញ បន្ទាប់ពីប្រុសនោះជាអ្នកធានាឲ្យនាងទៅនៅអាមេរិកបានដូចបំណង។
តាមព័តមានថាវ៉ាង ស្រីណូ ត្រូវបានផលិតករមួយចំនួនចង់ហៅនាងឲ្យថតសម្ដែងឡើងវិញក្នុងឋានៈជាតួម្ដាយ តែអ្នកដឹកនាំសម្ដែងទាំងនោះពិបាកព្រោះការចចារថតរឿងឬMV ទាំងនោះស្រីណូ កំណត់តម្លៃខ្លួនមួយដែលនាងពេញចិត្ត ហើយបើមិនបានតម្លៃនោះទេទោះជាខុសគ្នាតិចតួចក៍នាងមិនព្រមសម្ដែងឡើយ។ស្រីណូ ធ្លាប់ប្រាប់អ្នកយកព័តមានយើងថាទោះជាពេលនាងនៅអាមេរិកក៍អាជីវកម្មទិញលក់ផ្ទះរបស់នាងនៅខ្មែរតំណើរការជាធម្មតាដែរ ព្រោះនាងមានក្រុមការងារធ្វើកិច្ចការនេះជំនួសនាង ហើយឲ្យតែចំណេញទោះជាផ្ទះដែលនាងរស់នៅក៍លក់ចេញដែរ។យ៉ាងណាការមកខ្មែរលើកនេះបានយូជាងលើកមុនៗនោះតាមព័តមានថាស្រីណូ រងចាំចូលរួមមង្គលការរបស់នាងទឹម រដ្ឋា នៅថ្ងៃទី២៦ខែមីនាឆ្នាំ២០២២ នេះដូចសារ៉ាយ សក្ខណា និងយ៉ាន់ លីនដា ដែរ៕
