ភ្នំពេញ៖តារាចម្រៀងថោនលោកឆឹម សក្កដា ដែលជាអតីតគូស្នេហ៍របស់ពេជ្រ សោភានោះបានអះអាងកាលពីថ្ងៃទី៣០មីនា ថានៅលើលោកនេះគ្មានអ្នកណាម្នាក់ចង់បែកបាក់សង្សារ ឬពីមនុស្សដែលខ្លួនស្រលាញ់នោះទេ តែរឿងដែលវាកើតហើយយើងមិនអាចឃាត់ពេលវេលាមិនឲ្យកើតឡើងបានឡើយ អីចឹងមានតែសម្របខ្លួនទៅតាមពេលវេលាចុះ។លោកសក្កដា បានសារភាពថាលោកពិតជាមានការខកចិត្ត និងខូចចិត្តខ្លះដែរ មិនអត់នោះទេ ពេលដែលបែកពេជ្រ សោភា ព្រោះថានៅសុខៗរឿងក៍វាបានមកដល់ហើយអ្នកដែលពិបាកប្រឈមគឺជារូបលោក។យ៉ាងណាលោកសក្កដា តាំងចិត្តថាសម្រាប់ការជ្រើសរើសគូស្នេហ៍ថ្មីថ្មីនាពេលខាងមុខនេះវិញលោកចង់បានអ្នកនៅក្រៅរង្វង់សិល្បៈច្រើនជាង ព្រោះថាលើកទី១ជួបរឿងខកចិត្តម្ដងទៅហើយ អីចឹងមិនចង់ខូចចិត្តម្ដងទៀតនោះទេ។
ឆ្លើយតបសំណួរថាតើលោកសក្កដា នៅតែមានការយកចិត្តទុកដាក់ទៅលើពេជ្រ សោភា ពិសេសនៅថ្ងៃខួបកំណើតរបស់នាងដូចមុនពេលបែកបាក់គ្នាឬអត់នោះលោកថាគឺអាស្រ័យទៅលើពេលវេលា ព្រោះបើសកម្មភាពដែលលោកធ្វើទៅសោភា ពេញចិត្តលោកត្រូវមើលទៅលើអ្នកថ្មីរបស់គាត់ដែរថាតើគេយ៉ាងម៉េចនៅពេលឃើញលោកបន្ដរាប់អានជាមួយសោភា បើគេមិនចូលចិត្តទេនោះលោកនឹងមិនធ្វើរឿងណាដែលនាំឲ្យពួកគេមិនសប្បាយចិត្តឡើយ។
ទោះជាលោកឆឹម សក្កដា ថាក្រោយបែកពីសោភា ៣ខែនេះលោកមិនទាន់មានសង្សារថ្មីក៍ដោយ តែមុននេះមានព័តមានថាលោកបានងាកទៅកៀកកើយជាមួយថៅកែពេជ្រ ម្នាក់ដើម្បីជាការឆ្លើយតបទៅតារាហង្សមាសដែលបញ្ឈឿរលោកនៅនិងភ្នែកស្រស់នោះ។តែលោកសក្កដា ថាទំនាក់ទំនងរវាងលោកនិងថៅកែពេជ្រ គឺរូបលោកជាកូនចៅ ហើយថៅកែជាមេ អីចឹងមិនអាចមានទំនាក់ទំនងពិសេសដូចគេលើកឡើងនោះទេ។លោកថាដើម្បីជម្រះមន្ទិលសង្ស័យលើរឿងលោកនិងថៅកែពេជ្រ នោះនៅក្រោយពិធីបុណ្យចូលឆ្នាំខ្មែររួចលោកគ្រោងនឹងរៀបចំធ្វើសន្និសីទកាសែតដើម្បីបង្ហាញមុខថៅកែឲ្យគេស្គាល់ច្បាស់ព្រោះថារូបលោកគ្រាន់តែជាផ្នែកមួយដែលមានហ៊ុនតូចបំផុតនៅក្នុងហាងនោះប៉ុណ្ណោះ។
ក្រៅពីរបូតបាត់សង្សារសំណព្វចិត្តពេជ្រ សោភា នោះនៅឆ្នាំ២០២២ នេះលោកសក្កដា ក៍មិនសូញវរីករាយដែរព្រោះថាលោកមិនមានបទចម្រៀងថ្មីៗសម្រាប់ចេញក្នុងពិធីបុណ្យចូលឆ្នាំខ្មែរឡើយ។យ៉ាងណាលោកសក្កដា ថាលោកនៅតែជាតារាថោន ដែលមានកុងត្រា ហើយនៅអំឡុងខែឧសភា លោកនឹងត្រៀមបញ្ចេញស្នាដៃថ្មីបន្ថែមទៀតទាំងបទចម្រៀងនិងភាពយន្ដ៕
